يا مزمل أوع لا البُوهية لينة !!

قزاز ورزاز

محمد الطيب الأمين
يا مزمل أوع لا البُوهية لينة !!

* قبل كده مزمل أبو القاسم قال إنو المريخ ما سجل محمد أحمد بشة عشان بشة بعطش سريع.
* بلد فيها (نيلين) وتقول بشة بعطش سريع؟
* اها رأيك شنو في (الري المصري) ده؟
* ما سجلو بشة عشان بعطش سريع وما سجلو ياسر مزمل عشان عندو رباط صليبي.
* فعلاً ياسر عندو (صليب رباطي).
* (70) يوم قاعدين في مصر .. لا لونكم فتح ولا كورتكم بقت زي كورة الزمالك.
* لا لميتو في العدس ولا الكشري.
* قعدتو في مصر أكتر من محمد رمضان ذاتو.
* سمية الخشاب من الله خلقها ما قعدت في مصر (70) يوم ورا بعض.
* وبعد ده يا ريتو لو بفائدة.
* صحيح أنت المعسكر ما خسران فيهو حاجة لأنو الحساب على الكفيل.
* الكفيل الذي قام ب(الواجب) خارج الملعب وينتظر (المواجبة) داخل الملعب.
* الكفيل الذي وضع (الإصيفر) في جيبه الخلفي.
* الكفيل الذي داس على كرامتك وخلاك (اطوع من اصبعه الصغير).
* الأهلي يقول ليك يمين تمشي يمين يقول ليك شمال تمشي شمال.
* وخليكم كده.
* اسمعوا كلام حازم لما تلقوا نفسكم أضحوكة في أفريقيا.
* وخسارة النقاط والله لا تساوى ذرة مقارنة بخسارة الأخلاق.
* المريخ خسر بثلاثة أهداف أمام الأهلي وخسر تاريخ أخلاقي أكبر من الثلاثة نقاط.
* خسر النقاط أمام الهلال وقبلها خسر ما هو أغلى من النقاط.
* وفي النهاية ح يطير.
* الأهلي بعد (أكلك وشربك) ح يشيل منك ست نقاط ويخليك تتلفت زي الحرامي الطلعت عليهو شمس.
* أرجع القاهرة عشان الأهلي يوريك (الكشري بالبصل كيف).
* يوريك كتاب عمرك ما شفتو .
* المباراة الفاتت رحمك بالتلاتة والمباراة الجاية الخمسة ما بتحلك.
* وأوع تقول لي الخمسة أداك ليها مازيمبي.
* لأنو أنت الخمسة دي أداك ليها هلال الأبيض وما إدراك ما شيخ موكورو.
* هلال الأبيض أداك خمسة ولا أنا ظالمك؟
* قوم على حيلك.
* ياسر مزمل .. رِقيق رقيق وحرق (الإصيفر) حريق.
* فهم لأي وهم.
* مفتاح لأي طبلة.
* الحمدلله لا في فريق دفع لينا حق فندق ولا في فريق بدفع لينا حق الأكل والشراب.
* اسياد بلد قرارنا في يدنا وعينا في عين أي زول.
* وتعال اناقشك.
* كان لازم المريخ يعرف حجمو الطبيعي.
* والحمدلله شفوت الهلال ما قصرو.
* من أبوجا وللغربال ما في كلام.
* آخر حلاوة وجمال.
* لا شفنا السماني ولا سمعنا بالصيني.
* وين (النشاط).
* ولا إنتو بتكونوا (نشيطين) لما تكون في بلد الكفيل؟
* نشاط شديد.
* المهم.
* واحدين قالوا (9 طويلة) وواحدين قالوا (9 جميلة).
* ونحن وأولاد حلتنا بنقول : (رِقيق رقيق وحرق الإصيفر حريق).
* يا مزمل وأوع ولا البُوهية لينة.
* وغايتو السنة دي بالذات يا متنا من الضحك ويا كمان الضحك كتلنا.
* وتبكو بس .. عين قطرة وعين مس.
* ملحوظة .. نلتقي نهار اليوم عبر قناتي على اليوتيوب قناة (دقايق) في حلقة كاملة عن ياسر الكاسر وعن (الكسر أخلاقو في السوق المصري وجا كسر كراسينا).
* و.. و..
* والله يكفينا شر (المُصدي) اللمعتو الأيام.