يا مستجد
في السلك
بابكر سلك
يا مستجد
*لن ندعي شرفا لا علاقة لنا به
*ولن ننتظر شهادة من شخص تؤكد علاقتنا وقناعتنا بالديمقراطية
*ولن نتشعبط في قطار الثورة لاننا وقوده
*شوفوا الركبوا بعد حداشر ابريل
*والارشيف قاااعد
*فحينما كنا نتحدث عن ديمقراطية المريخ ورفضها لحزب الرجل الواحد
*ما كنا نكتب ذلك علي الحوائط ليلا
*ولكن علي صفحات الصحف نهارا جهارا
*ولن نستشهد بالمحاكم التي رقصت طربا ونحن ندافع عن الثوار والانقاذ تمارس سعرا وغلظة وتهدد بكتائب الظل
*نحنا مابورونا الديمقراطية
*والديمقراطية مابعرفوها بينا
*بتعرفنا زي جوع اليومين دي
*ولن نتخلي عنها ولو رفضها كل الناس الذين يبحثون عن الشمولية والتسلط
*يبقي لما تقول رأي ادرسو كويس يامستجد
*فالديمقراطية حاشاها ان تطلق علينا لقب مستجد
*يامستجد
*وبنتمرد علي الواقع علي التاريخ
*ونطلع بره للشارع في وش الريح
*في وش الريح بنتمدي
*نقيف للطلقة نتحدي
*عن اهدافنا وعن المبدأ
*ابدا ما حانرتدي
*الكلام ده يامستجد كان بزين كثير من كتاباتنا علي الصحف
*وقع ليك يامستجد
*ايها الناس
*تحدثنا عن لجنة الانتخابات وسلطاتها
*نط واحد قال كيف لجنة يعينها المجلس تشيلو
*تخيلوا؟
*زول بعارض في النظام الاساسي تلاتة سنين
*وماعارف لجنة الانتخابات منو البعينها وسلطاتها شنو
*ولكنه يعارض كقطيع
*وفعلا القلم مابزيل بلم
*ارجعوا للنظام الاساسي
*اقروهوا اول مرة
*علي الاقل تقدروا تعارضوا بفهم
*اللهم انعم علي الزعيم بالعضوية ام راس
*العضوية بالراس دي مابتقدم شبر
*فهم القطيع ان يساق ويوجه
*ودي مامرحلة كدة
*كل الاحترام للذين يعارضون النظام الاساسي بعد الاطلاع عليه
*مهما كان رأيهم
*لكن الكورس البردد في اغنية مافاهمها ببوظ الحفلة
*المهم
*الشعب بقي زي اللابس كيس(اتي)
*كلو يوم بضيق عليهو
*نعم سبب الضيق اليابا صديق
*ذلك العهد الفاسد الظالم
*لكن استفحاله لهذه الدرجة يعود للحكومة الانتقالية
*لانها الي الآن لم تمس سبب الداء
*تكمن العلة في دوائر يجب تفكيكها بسرعة
*معلوم ان النظام المباد لم يترك للبلد فرصة لتنتج سلعة
*كلو مستورد الا صابون بشري والدكوة
*تلك الدوائر هي
*المورد
*الوكيل
*الرقيب
*وتلاتتهم كيزان
*كيف تستقر الاسعار يا مدني؟؟؟
*فكك التلاتة دوائر دي وشوف شعبك حاينعم باستقرار الاسعار كيف
*والقصة مادايرة شرح اكتر من كده
*ايها الناس
*عشان رفع العقوبات قبلنا الابتزاز
*جيب التربيزة دي وامشي العب
*تجيب التربيزة
*بس املي الجك وختو فيها وامشي العب
*تجيب الجك وتختو
*اقفل الباب الصغير وتعال امرق بي جاي امشي العب
*تقفل الباب الصغير وتجي
*هاك امشي الدكان جيب لي ساردين وجيبو وامشي العب
*تجي تقول الدكان قافل
*يقول ليك امشي الدكان الفي الحلة التانية جيب الساردين وامشي العب
*تجيب الساردين من الدكان البهناك وتجي
*يقول ليك لأ ده فيهو صلصة رجعو ليهو وجيب القروش وامشي العب
*ترجعو وتجيب القروش وتجي تلقي الدنيا مغربت ومافي طريقة للدافوري واللعب
*تتخمد جوة تلقي امريكا هي الوحيدة البتلعب
*القصة دي دايره شفتنه سياسية مابوصوك عليها ياحمدوك
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*امريكا مادايرانا نلعب
*دايرة تلعب علينا
سلك كهربا
ننساك كيف والكلب قال هم اليهود مالهم؟؟؟
والي لقاء
سلك
والله انت الوحيد الفاهم مش ذي الكورال ذي ما قلت بيرددوا في الغنية وما فاهمنها والله حتي الكبير بتاعم ما فاهم شئ همه كله التصفيات الشخصية
الحمد لله صحافة الدلاقين ظهر فيها زول عاقل زي عم سلوكة الحمد لله مخدر اليخماو كبير الكهنة لم يتمكن منه. نسال الله الشفاء للمدمنين الذين ينقادوا خلف اليخماو كما يقاد القطيع.