ينتهي العزاء بانتهاء مراسم الدفن..!!

صَابِنّها
محمد عبد الماجد
ينتهي العزاء بانتهاء مراسم الدفن..!!

• وقلبي من الفرحة بقى زي (المَلّاحة) في صينية الغداء.. يحوِّلوا فيها من حِتّة لي حِتّة.
• أو متل (مروحة التربيزة) تقبِّل جايي وتقبِّل جايي.
• وعيوني متل (باكات) مانشستر سيتي طائرات من الدقيقة الأولى.
• عندي مشكلة ما قادر اطلع منها.. وما عارف أعمل معاها شنو؟
• أي هدف بسجِّلو الهلال بشوف فيه أغاني الفنان محمد وردي.
• بشوف في شخصك أحلامي.
• بشوف في أهدافك أحلامي.
• وقت الهلال يسجِّل بسمع محمد وردي يغني… بشوف لي طفلين كلامهم كله بالهمسة.
• ومرّات بشوف لي طفلة وسط اللّمة مَنْسِيّة.. زي حالة الشناوي بعد المباراة.. فقد أصبح الشناوي في مقام (بَوّابة عبد القيوم).
• واحد يشرح للمصريين ويحكي ليهم عن (بَوّابة عبد القيوم)… أو عن الشناوي حارس الأهلي!!
• أهداف الهلال بشوف فيها وردي.
• مَرّة الطير المهاجر.
• ومَرّة المُستحيل.
• ومَرّة خاف من الله.
• ومَرّة يا أعز الناس.
• ومَرّة لو بهمسة.
• ومَرّة بدون جمهور!!
• لكن للأمانة هدف ليليبو في شباك الأهلي المصري حسّيت فيه بعثمان حسين… مرة يبقى لي (شجن) وقت أشوف حالة الشناوي… ومَرّة يبقى لي (قصتنا) وقت أشوف الشناوي (نفس الزول) طاير المسافة دي كُلّها عَشَان يَطلِّع الكورة ومَا قدر يَعمل حاجة!!
• الشناوي قال (الشمس)… يعني الشمس في السودان بتغيب من (الشرق)!!
• هدف ليليبو جاء من اتّجاه الشرق… والشمس كانت في ساعة الغروب عندما سجّل الهلال.
• الشناوي بقى متل (الشافع) وقت يرسلِّوه الدُّكان وما يرجع سريع.
• الشناوي طبق (مصر للطيران).
• طائر سنة كاملة ما لحق الكورة.
• ما عارف ليليبو عمل في الكورة شنو؟
• وبرضو ما عارف علاقة الشناوي بالشافع شنو؟
• لقيت نفسي فجأةً كدا داخل في الحِتّة دِي.
• الزول وقت يكون فرحان ما بعرف يتصرّف!!
• الشناوي بقى لي زي إسماعيل يس.
• أنا ذاتي ما عارف أكتب شنو؟
• بقول لي في كلام زي (الهضربة).
• أدخل واطلع.
• وأقعد.
• وأقوم.
• أقيف.
• وأرجع أكتب تاني.
• اِتذكّرت المُمثلة المصرية الراحلة القديرة أمينة رزق.
• ما عارف ليه اِتذكّرتها الآن.
• هدف ليليبو بخلِّيك تتخيّل حاجات بالشكل دا!!
• وأنا في الحالة دي قُلت أشوف قناة الأهلي – الأستديو التحليلي بعد المُباراة بقول شنو؟!
• يا ريت ما فتحت القناة.
• تتخيّلوا ما جابوا سِيرة (الجمهور).
• بي جمهور.
• بدون جمهور.
• الهلال غالب!!
• الهلال ما فاقد الجمهور فقط… الهلال كان ناقص صلاح عادل وناقص انغوما وناقص ايبويلا… وناقص الطيب عبد الرازق!!
• الأهلي راجع من كأس العالم.
• فرحانين عشان لعبوا أمام ريال مدريد… وأمام فلامنغو.
• تلعبوا مع الريال.
• مع الجن الأحمر.
• بي جمهور.
• بدون جمهور.
• نحن في (المقبرة) بندفن طَوّالي!!
• إكرام الميت دفنو.
• ولا بنكضب!!
• دفن الأهلي في المقبرة في عدم حُضُور الجمهور ذكّرني ليك بالعزاء الذي ينتهي بعد الدفن.
• برفعوا الفراش من المقابر.
• أرجع ليكم لقناة الأهلي… فتحت القناة لقيت لاعب الأهلي السابق شريف عبد المنعم بَحلِّل عن المُباراة.
• تتخيّلوا المخلوق دا قال شنو؟
• الله يسألني… شريف عبد المنعم كان بيشكي من (الملعب).
• الجمهور عرفناه… يعني نلعب ليكم بدون ملعب؟!!!
• شريف عبد المنعم قال الأهلي ما بعرف يلعب في ملاعب زي دي… وهو بتكلّم عن (الجوهرة الزرقاء)!!
• إنت يا شريف عبد المنعم صدقتوا رُوحكم… إنت فاكر لاعبي الأهلي ديل جايين من وين؟!!!
• ديل جايين من مناطق في الخريطة (مُشَخْبَطَة)..؟
• كَفرَ البَطيخ.
• ونجع حمادي.
• وقنا.
• والسّواركة.
• والدواعرة.
• إنتو كمان ما بتعرفوا بلدكم..؟!!!
• الأهلي المصري سوف يُغادر بعد المباراة ليلعب أمام أسوان يوم الثلاثاء القادم على ملعب أسوان.
• وملعب أسوان أرضية ملعب الهلال أفضل منو ألف مرة..!!
• الأهلي المصري في الدوري المصري بيلعب في إستاد غزل المحلة… وإستاد غزل المحلة هذا ليس (الكامب نو)..!!
• بس عشان تبقوا عارفين.
• إنتو يا شريف عشان لعبتوا أمام ريال مدريد واتغلبتوا بالأربعة صدقتوا نفسكم..؟!!
• السُّودان هذا الذي تسخر منه… لو قفل (البلف) بتموتوا في مصر.
• النيل هبة مصر بطلع من هنا.
• مُلتقى النيلين هنا.
• إنتو لا تاريخ ولا جُغرافيا.
• خيرات مصر كلها من السودان… وعاوز تتكلّم عن إستاد الهلال..؟!
• شريف عبد المنعم قال (الشمس) أثّرت في رؤية الشناوي… لذلك سجّل الهلال هدفه الوحيد!!!
• كمان ما عندكم (شمس) في مصر؟!!
• طيِّب يا شريف الشمس دي كانت وين وقت الشناوي تصدى لضربة الجزاء التي نفّذها ليليبو..؟!
• بعدين الشمس كانت في الاتّجاه الآخر… وليس في الاتّجاه الذي جاءت منه كورة ليليبو.
• علاء ميهوب… رغم إنه كان في الجهاز الفني للأهلي عندما فاز الهلال على الأهلي بثلاثية نظيفة… قال علاء هذا أول انتصار للهلال على الأهلي.
• علاء ميهوب لا يعلم أنّ الهلال فاز بهذه النتيجة على الأهلي المصري في القاهرة.
• أمَّا أحمد بلال مهاجم الأهلي السابق… فقد قال عن المباراة إنّ الأداء كان عشوائياً… وإنّ لاعبي الهلال استغلوا حالة توتُّر لاعبي الأهلي وانتصروا على الأهلي!!!
• خلاص يا أحمد بلال… كلِّموا الاتّحاد الأفريقي والمخابرات المصرية تشيل ليكم (التّوتُّر) دا برّه!!!
• يعني الأهلي في السُّودان يلعب بدون جمهور وبدون تَوتُّر..؟!!
• تاني الهلال لمن يلعب أمام الأهلي في أم درمان… مفروض المباراة تكون في مطعم (جاد)!!!
• أو في صالون حلاقة.
• أو في حضانة أطفال.
• أو في أستديو تصوير.
• عشان ما في زول يتوتّر!!
• وكان لشريف عبد المنعم الذي اعترض على (الأجواء) و(الملعب) والشمس… نوعدكم يا كابتن نرفع الأمر للاتّحاد الأفريقي عشان يشوفوا ليهم حَل للجو السُّوداني!!!
• وكان للشمس… مُمكن الاتّحاد الأفريقي يعمل ليكم (مَظَلّة) ويَشترط على الهلال أن يسقِّف ملعبه!!!
• كمّلنا ليهم فهمهم.
• بدون جمهور.
• وفي حُضور السفير المصري والمُخابرات المصرية وتقاعس الحكومة السُّودانية انتصر الهلال على الأهلي المصري!!!
• الجميل في المُباراة أنّ الهدف جاء في أول عشر دقائق من الشوط الثاني وفشل الأهلي في تعديل النتيجة.
• في مباراة المريخ والأهلي المصري المُوسم قبل الماضي كان المريخ مُتقدِّماً في الشوط الأول بهدفين على الأهلي.
• الحكم احتسب ضربة جزاء للمريخ… كان يمكن أن تجعل النتيجة 3/ صفر… لكن رمضان عجب أضاع ضربة الجزاء.
• الأهلي استفاد من حالة المريخ بعد إضاعة ضربة الجزاء رغم أنّ المريخ كان مُتقدِّماً 2/ صفر… ونجح الأهلي في تعديل النتيجة لتنتهي المباراة 2 / 2.
• الأهلي أمام الهلال رغم أنّه كان (خسران) بهدف.. وعائد من كأس العالم فَشَلَ في تعديل النتيجة بعد إضاعة الهلال لضربة جزاء!!!
• والهلال كان بيلعب بدون جمهور.
• المُدرّجات الخالية كان يفترض أن تمنح لاعبي الأهلي قُوةً وجرأةً… الاتّحاد الأفريقي ما قصّر معاكم!!!
• عمل ليكم أيِّ شيء!!!
• ما خلى ليكم حاجة!!!
• مع ذلك خسروا بهدف من الهلال!!!
• والهلال يفتقد المُحترف الكنغولي انغوما.
• ويفتقد الهلال المُحترف الكنغولي ايبويلا.
• ويفتقد الهلال صلاح عادل.
• ويفتقد الهلال الطيب عبد الرازق.
• والسنغالي ديوف لأول مَرّة يلعب في إستاد الهلال.
• والغاني اباجنا لأول مَرّة يلعب في أم درمان.
• اتخيّلوا كيف كانت سوف تكون النتيجة لو كانت تلك الأسماء حاضرةً وجاهزةً… وكان الجمهور حُضُوراً..؟!
• مفروض يا ناس الأهلي تحمدوا الله على هذه الخسارة.
• علاء ميهوب قال الأهلي كان يُمكن أن يخسر بالثلاثة… وقال الخسارة بهدف وحيد مكسب ليهم!!!
• طيِّب وقت عارفين كدا.
• بتغالطوا مالكم..؟!!
• نحن من الصباح بنقول في شنو؟!!
• ……………..
مَتَارِيس
• لا قيمة لانتصار الهلال على الأهلي إذا لم يُحقِّق الهلال الانتصار على القطن الكاميروني في الكاميرون.
• أي نتيجة غير انتصار الهلال على القطن في الكاميرون يعني أّن فرصة الهلال في التأهُّل سوف تكون ضعيفة.
• صن داونز انتصر على القطن أمس الأول في الكاميرون… والأهلي بالتحكيم وبدون جمهور قادر على الانتصار على القطن في الكاميرون.
• لهذا يجب أن ينتصر الهلال في الكاميرون.
• الهلال مفروض يطبِّق الحِنّة للأهلي في القاهرة.
• عشان تاني ما في واحد يطلع يقول لينا (الشمس)!!!
• بدون جمهور لعبنا.
• نلعب ليكم كمان بدون شمس..؟!!
• والاتّحاد الأفريقي هو الذي رفض للهلال أن يلعب تحت الأضواء الكاشفة!!!
• نعمل ليكم شنو؟!!
• نتقطّع ليكم.
• على العُمُوم… شُكراً لشمس السُّودان.
• شَمْسَك طَلَعَتْ وأشرق نُورَهَا بِقَت شَمْسَين… شَمْسَ العِزّة ونُورها الأكبر هلّت شَامخة زَي تاريخي قوية وراسخة مَلَت الدنيا… وخيرنا بيكبر.. شَمس إيماني بأوطاني ودَه الخَلّاني أقُول للدُّنيا أَنَا سُودَانِـــــــــــــــــــــــــــــــــي.
• وَأَنَا هِلَالابِــــــــــــــــــــــــــي.
• المدير الفني للأهلى شكى من (الحرارة).
• طيب لو جيبتو في الصيف كان ح تعملوا شنو؟
• نحن في مصر بنلعب في درجة حرارة لا تتعدى 4 درجات .. وبنغلب الاهلي .. ما في زول بيشكى.
• مدرب الاهلي وبعد ان امتدت المباراة للدقيقة 100 .. معترض على اضاعة الوقت.
• اتعلمناهو منك.
• الشوط الاول كنتوا وين؟
• هل كان الهلال يهدر في الوقت قبل ان يسجل.
• شكرا لفلوران.
• انت معلم.
• حقك علينا.
• ……
• تِرِس أَخِير: المَا عَرّس السّنَة دِي تَانِي مَا بَعَرِّس..!