يوسف عبده (ولدا متين بقى للسفر)؟

صابنها

محمد عبد الماجد

يوسف عبده (ولدا متين بقى للسفر)؟

• في السودان نحن شعب واحد (غصبا عن العالم كله ) – رغم تعدد الالوان واختلاف الثقافات وعصبية (هلال مريخ).
• نحن بنفرح كلنا في حاجة واحدة .. وبنحزن كلنا من نفس الشيء – مشاعرنا واحدة ، كل اجزائه تحكي ذلك وتثبت … في الشمالية في دارفور .. في الجزيرة في الشرق.
• حاجة تفرحنا.
• وحاجة تحزنا.
• ما في اختلاف بيناتنا.
• يمكن نختلف في البيئة والجغرافيا واللون والطقس والمرتبات !! .. لكن بنتشابه في الاحساس .. في الفرح والحزن وشاي المغرب.
• في الدموع والضحك.
• في وردي وعثمان حسين.
• ما في فرق بيناتنا.
• يتخيل ليّ ان الناس في البلد دي كلها كان يمكن تكون (هلالاب) لولا قاعدة (الظل) لكل جسم (ظلا) معكوس منه.
• ونحن (ضلنا) معروف.
• ضل عندو ثلاثة رؤوساء – غير مزمل ابوالقاسم.
• عندهم ثلاثة رؤساء وما عندهم (نجيلة).
• نحن هكذا .. حتى الحزن في السودان يمكن ان تسخر منه وإلّا اتقسمنا اتنين من شدة الاحزان والوجع.
• ما عندنا (فرقة) غير اننا نطلع برة النص ونرجع تاني.
• ويمكن ما نرجع.
• نفوت عِدل.
• البلد دي غريبة – الابواب الفاتحة بتمرق منها – والأبواب المغلقة بتدخل بيها.
• معادلة غريبة.
• الكهربة وقت تجي بنفرح.
• وقت تقطع برضو بقينا نفرح .. عشان (الصرف).
• عشان (العداد).
• الشعب دا اقل حاجة ممكن تفرحه. بحاول يفرح من أي شيء.
• من أي موضوع.
• بنفتش في الفرح.
• وما بنحزن إلّا في الشديد القوي.
• في الحاجة الكبيرة.
• مقتل ووفاة مدثر كمال في قسم الشرطة (قصة) حقيقية في واقعنا المر.
• الموت بقى يحدث في اقسام الشرطة التى يفترض ان يكون فيها الآمن والعدالة.
• اسرة الشهيد مدثر كمال الدين تذوب (وجعا).. تجاوزت مرحلة (الوجع).
• نحن ماشيين وين؟
• كل ما تقبل على حتى تلقى (الوجع) شارع.
• نمرق مننا ولينا ونتاوق برة نلقى الوجع اكبر.
• امس صدمني هذا الخبر – لقيت الناس كلها شائلها (وجعها) في صفحتها .. وحائمة بيه.
• الحزن وقت يلاقيك في أي حتة .. في كل الاتجاهات عشان خاطر زول واحد .. بكون حزن كبير.
• عريض .. وغليد.
• حزن قدر ما تقبل منو .. يجيك من الاتجاه القبلت ليه.
• حزن زي (القطر) ما بديك أي فرصة.
• انتقل الى رحمة مولاه بمدينة ودمدني، صباح الجمعة، يوسف عبده يوسف حارس مرمى الوفاق طيبة أحد أندية الدرجة الرابعة في المدينة، ولاعب فريق مدرسة محمد عبدالله موسى الفائز بلقب نسخة العام 2016م، من بطولة كاس (ج) التي أقيمت في دولة قطر .
• فجعنا الخبر هذا ، مثلما حدث معنا كلنا (إلتقاء وجداني عام )عندما رحل الهلالابي متعصم الخليفة سيد احمد – لا اعرفه على المستوى الشخصي لكن عرفتوا من عيون الناس.
• عرفتو وقت حزنت عليه .. رحمة الله عليه.
• لقيت الناس شائله (اختياري).
• متوشح بعلم الهلال – زي كأنو عارف (الفجوة) الممكن يعملها فينا رحيله المر.
• زول مسافر.
• مغادر.
• ما قاعد لينا.
• زمان ونحن طلبة السؤال الاجباري دائما نغلط فيه .. ما بنحب (الدكتاتورية) و (الاجبار) حتى في الاسئلة والامتحانات… يتخيل اننا كنا بنقصد نغلط في السؤال الاجباري.
• عشان كدا مرات بنقصد ما نقيف في السؤال الاجباري حتى لو كنا عارفين الاجابة الصحيحة.
• يوسف عبده – متين بقى للسفر؟ الموت بقى يعزل مننا ويشيل.
• الموت بقى يشيل من (وش القفص).
• ولا بنتعلم.
• ولا بنتعظ.
• يوسف عبده وضع بصمته (الوطنية) وفات – وضعها وهو صغير في السن .. عشان عارف نفسو ما قاعد.
• الرحيل مرات قبل ما يكون احساس .. بكون شغل .. بكون خطوات ودلائل.
• لكن نحن ما بنعرف نستوعب ذلك.
• نحن لغاية الآن صورته وهو بيبكي في مباراة منتخب السودان ومنتخب جزر القمر بنضعها ونتبادل فيها في المناسبات الوطنية.
• الصورة كانت تكفي.
• كانت صورة بتعبر عن (الوطنية) وبتقول لينا في كلام كتير .. نحن كنا ما جايبين خبره.
• لمن نكون عاوزين نتحدث عن الوطنية والإخلاص والوفاء بنجيب صورته.
• لمن نكون محتاجين نتعلم درس في حب الوطن بنشوف دموعه .. وهو في تلك السن كان اكبر مننا كلنا.
• كان اوعى مننا.
• قدم حاجة للوطن وعمل شيء .. ورحل.
• لماذا لا نتعلم حب الاوطان منه؟
• كلنا ح نفوت.
• عملنا شنو للوطن؟
• خلينا ليه ايه؟
• السودان فتر مننا.
• السودان تعب.
• السودان هرم.
• ونحن ما عملنا أي حاجة.
• يوسف عبده يوسف .. قدم لنا درس ومشى .. علمنا انه يمكن ان تقدم شيء للوطن في كل الاحوال ومع كل الظروف.
• ما مهمة الامكانيات.
• ولا مهمة الماديات.
• ما في حاجة صعبة.
• ولا في مستحيل مع حب الوطن.
• المهم تكون في روح وفي امل وفي شغل.
• الروح الكانت تعمل من اجل هذا الوطن مرقت من الجسد وراحت.
• فاتت.
• طلعت على الدرب البودي وما بجيب.
• متين يا يوسف عبده بقيت على الكلام دا؟
• متين بقيت على السفر الابدي .. ونحن السفر من مدنية الى مدنية ما عندنا ليه قدرة.
• ولا عندنا جيل.
• لسه يا يوسف.
• كان بدري عليك.
• كنا منتظرين منكم الكثير.
• جيل منتخب جيم عدنا فيه عشم وأمل.
• لكن الايام تمت.
• تمت سريع.
• ورحل يوسف عبده.
• نسأل الله له الرحمة والمغفرة .. ولا اعتراض على امر الله .. اللهم تقبله قبولا حسنا .. وارحمه واغفر له وألهم اهله وذويه الصبر والسلوان.
• ولا حول ولا قوة إلّا بالله.
• ……………….
متاريس
• اللهم ارحم الشهيد مدثر كمال.
• وارحم المعتصم خليفة سيد احمد.
• وارحم يوسف عبده يوسف.
• مباراة المريخ اليوم امام الاهلي طرابلس مباراة صعبة جدا على المريخ رغم النتيجة الجيدة التى خرج بها المريخ في الابيض.
• المريخ اذا لعب بتكتل دفاعي في مباراة اليوم سوف يخرج من البطولة .. وهو نفس الشيء الذي يمكن ان يتعرض له الهلال اذا لعب بتكتل دفاعي في الغد وأهمل الهجوم.
• على المريخ ان يلعب بإسلوب هجومي .. خاصة وهو يملك رصيد جيد .. اذا سجل المريخ في الاهلي اليوم سوف يخرجه من البطولة ويقضي على كل آماله.
• مباراة المريخ اليوم صعبة عليه.
• ومباراة الهلال بكرة ايضا صعبة.
• رضوان جيد .. حكم مباراة اليوم بين المريخ والأهلي ما مضمون.
• المريخ اذا اراد ان يتأهل .. يجب ان يخطف ليه هدف.
• غير كدا .. المريخ ح ينزل الى الكونفدرالية.
• الله يستر من نتيجة الوحدات.
• عاوزين تتأهلوا سجلوا في مرمى الاهلي .. ولو هدف وحيد.
• الهلالاب يجب ان يركزوا في مباراة الغد.
• خايف على المريخ من محمد المصطفى.
• ومن ضربات الجزاء.
• ومن الاهداف العكسية.
• في مباراة الغد امام الشباب يجب ان لا تعطي الجماهير الاتحاد الافريقي أي فرصة.
• الانضباط هو طريق الهلال الى التأهل.
• الاندية التنزانية بتلعب كورة وبس.
• ألعبوا كورتكم.
• والي الدين خضر قدم اداء ممتاز امام فريق ود نوباوي.
• ونتوقع ان يكون بوجبا من نجوم مباراة الغد.
• في انتظار ان يسجل بوجبا هدف.
• يا بوجبا .. صوب من بعيد .. انت افضل من يجيد ذلك.
• من برة الخط.
• كورتك سوف تكون في الشبكة.
• صوب وامشي احتفل طوالي مع الاولتراس.
• عبدالرؤوف ايضا يقدم في هذه الايام افضل المستويات.
• روفا حاجة عجيبة زي ناس حمد والديبة.
• ابوعشرين عليه كل الحذر .. ما تتقدم برة المرمى.
• أي خطوة محسوبة عليك.
• في وجود فلوران بقينا ما بنخاف على الهلال.
• تعالوا عشان تستمتعوا.
• تعالوا الجوهرة عشان تتأهلوا.
• نقول يا رب.
• ………….
• ترس اخير : اتاريه كان بيبكي عشان مودع … اللهم ارحمه واغفر ليه.