️تاني نلقي لينا توتي ويييييين؟
في السلك
بابكر سلك
️تاني نلقي لينا توتي ويييييين؟
*فرطنا
*كنا نتقدم الناس
*بقينا متأخرين
*وصل بنا التأخر لفارق خمس نقاط
*أها جات توتي
*بارك الله فيها
*انعشتنا وانعشت حظوظنا
*وبالأمس أضعنا مجهود توتي
*الفرق أصبح ست نقاط
*تاني مش توتي
*ثري تي ما تحلنا
*والسبب أننا أدمنا إضاعة الفرص في الشوط الأول دائما
*ثم نأتي لنبحث عن نصر بعقل مشتت يسابق الزمن
*أمس بقينا نفتش في الدرون
*وأثناء ما بنفتش في الدرون
*عينك ما تشوف إلا النور
*بقينا نفتش في ماء الوجه
*في طمبجة الدنيا ما لقينا ماء وجه
*مافي عذر
*ومافي سبب غير الاستهتار
*يعني أولادنا ديل لو أدوا لينا بإهتمام مثل اهتمامهم بحلاقات رؤوسهم دي
*كان شلنا كأس العالم للأندية
*والاستهتار لم يكن السبب الوحيد في خسارتنا
*فانضباط الوادي التكتيكي والأداء بحرفية واحترافية
*خلى شكل أولادنا شين
*مجرد طواويس تتقدل ساي
*قبل أن نحزن على الخسارة
*الروح الرياضية تلزمنا أن نهنئ وادي نيالا الذي كسب نتيجة وتكتيكا وانضباطا
*ياخ لاعب حاور داوود لأنو داؤود من قام كان جاري بتوتر لم يقصد من خلاله استخلاص الكرة بسهولة
*ده حمزة
*ضياء وأمير مالهم؟؟؟؟؟
*على كلٍ.. فور تي ولا الزول المشلخ تي الله أعلم يخدمونا تاني
*الرك لم يعد بين أقدامنا
*فلابد من أقدام صديقة
*وإذا اقدامك ما مضمونة
*ما تضمن أقدام غيرك
*المهم
*أسامة عطا المنان طلع أخطر منك ياسودا
*هجمة واااحدة بقونين؟
*لكن النصيحة هجمة مركزة
*أيها الناس
*نلحق التيم ولا نلحق الملعب ولا نلحق الموردة؟
*بالذات واسم الموردة صار يتردد كثيرا بمجتمع المريخ في الآونه الأخيرة
*وبمناسبة الموردة
*واحد مريخابي موت
*زماااان (قبل الانفصال)
*قبل انقسام المجلس لوطني وشعبي
* قال لي ناس أسد ديل بلحقوا المريخ الموردة
*بعد السنين دي كلها قابلتو في حديقة الموردة أيام العضوية
*قال لي يا سلك مش قلت ليك ناس أسد بلحقونا الموردة؟؟؟ أها أسي جابونا الموردة ولا ما جابونا؟؟؟؟
*أيها الناس
*الموردة ذلك النادي العريق المتألق المتأنق
*يقبع في محل ما بشبهو
*وأولاد الموردة يعتركون في غير معترك
*كانوا يتنادون لأجل ناديهم
*ويوم ما افترقوا
*الموردة ذاتها مشت الموردة
*فهل نحلم بابن بار من أبناء النادي العريق يجمع الشمل ويعيد النادي للبريق؟؟؟؟؟
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*الدولار تقريبا استقر لينا
*والأسعار كلو يوم زايدة يا والينا
*الحاصل شنو ورينا؟؟؟؟؟
سلك كهربا
ننساك كيف والكلب قال الفول غالي…. إنتوا مالكم بتضيقوا واسع!!!!!!
وإلى لقاء
ههههااااي يا عمك تنقو يعني كنت عاوز أسامة عطا المنان يفتح ليكم الشغلانة ولا شنو ؟ ده كان زمان أيام البتاع الطوالي موصل خرطوش من ماسورة أموال الشعب في وكالة السفر، أسي ضهركم مكشوف وسدوكل قافل البلف ومكنكش في الدركسون وما خلي طريقة للسمسرة والملحسة 😆😆😆
عمك تنقو فاق يادوب
زعلان من تيمه المضروب
لبس نعلاته بالمقلوب
فردة سفنجة وفردة مركوب
وطي بسفنجته فوق لالوب
وطار في الجو ذي شقلوب
قال ألحقني يا مجذوب
ودقش بي صلعته كوم الطوب
😝😝😝
والله يا أستاذ سلك مع اني هلالابي على السكين لكن حالة المريخ لا تسر وما يحدث مأساة بمعنى الكلمة لواحد من اعرق فريق القارة. عندما يذكر المريخ أتذكر بشرى وبشارة والهادي سليم والطيب سند وكمال عبدالوهاب وسانتو وسليمان عبدالقادر وفيصل الكوري ومحسن عطا وكاوندا وعمار خالد وسامي عزالدين وابراهومة وجمال أبوعنجة وكمال عبدالغني وحامد بريمة وحتى في القريب العجب. هل فعلا هؤلاء يحبون المريخ؟ لو كانوا يحبون المريخ لما اوصلوا النادي العريق لهذه الدرجة من الضغف والهوان. ولا يمكن ابدا صرف النظر عن دور الاعلام السالب المريخي ودوره الهدام. فبدلا من التركيز على مشاكل النادي وبحث السبل لإيجاد حلول لمشاكله المستعصية فإذا به يركز على قضايا انصرافية ويستهدف الهلال ويسعى للتقليل منه.