أتاريها (الإنشاء ) بتاعة سنة رابعة عندها عوزه

صابنها
محمد عبد الماجد
أتاريها (الإنشاء ) بتاعة سنة رابعة عندها عوزه

زمان عندما كنا في المدارس كنا بنعتقد ان هناك دروس كثيرة ومواد ما في ليها داعي ولا بتلاقينا تاني في حياتنا.
بنقول عليكم الله بطلوا تنظير – هسع الحاجات دي ح تقابلنا وين؟
بنفتكر انهم بيشحنوا المقرارات بحشو ساكت.
وكنا فاكرين ان كثير من المواد حدها معانا الثانوي العالي – تاني لا بتلاقينا ولا بنلاقيها.
ولا في زول فاضي ليها.
يمكن عشان كدا ما طلعنا (دكاترة) – لأننا كنا بنتعامل مع الكثير من المواد باللا مبالاة.
ولغاية الآن وقت تشوف مقرارات طلاب مرحلة الاساس والمعدلات والمسائل التى يحشوهم بيها بنقول هسع الحاجات دي لزومها شنو؟
بس عاوزين يحللوا قروشهم.
اتاريه الموضوع عندو علاقة بالمستقبل – وان كل الاشياء التى تمر عليك في المدارس بتلاقيك بشكل او اخر في الحياة وفي المستقبل.
الدنيا دي اصلو ما فيها حاجة ساكت.
الدين ادي ضيقة شديد.
ما عاوز اتكلم عن معادلات الكيمياء والفيزياء والرياضيات الصعبة ديك والكنا بنشوف ما عندها أي علاقة بالحياة.
بس عشان يعذبونا في الامتحانات.
بس عشان تتلتلونا. ويسهرونا في الفاضي.
محمد صبحي مرة كتب في صفحته قال نحن وقت كنا طلبة كنا بنعتقد ان حياة الطلاب هي الاصعب وان الحياة ما فيها اصعب من (الامتحانات) بتاعة اخر السنة. لمن كبرنا اكتشفنا ان هناك اشياء كثيرة اصعب من الامتحانات ، وان ايام المدارس سوف تكتشف فيما بعد انها اجمل ايام الحياة.
كنا بنظن ان العالم دا كله بتآمر على الطلبة.
وانو ما في شريحة مسحوقة ومطحونة اكتر من شريحة الطلبة.
الآن اكتشفنا انو ما في اجمل من حياة الطلبة.
المهم يا جماعة – عاوز اكتب سريع قالوا الكهربة ح تقطع الساعة تمانية من اجل اعمال الصيانة في الفندق.
والنت.
هنا قطع التيار الكهربائي بعلنوا عنو قبل ساعات.
ما عاوز انظر ليكم كتير عشان مستعجل شديد. كنت فاكر ان (العجلة) فقط في السودان . وهذه من الاعتقادات الخاطئة.
بالمناسبة في حاجات كتيرة بتكون اعتقاداتنا فيها ما صحيحة – عشان كدا ما في زول يصر على رأيه.
ما هو تظنه صحيح اليوم يمكن ان تكتشف انه غلط في اليوم التالي.
لمن كنا في المرحلة الابتدائية كانوا في حصة الانشاء بقولوا لينا اكتبوا موضوع عن (الاستقلال). كنا نحن بننداح وما نخلي لينا بيت شعر وطني ما نكتبو.
الواحد فينا كان بعمل فيها (العطبراوي).
ما بنخلي شيء.
كبرنا واكتشفنا بعد ذلك ان السودان لغاية الآن ما نال استقلاله.
وين مع ناس البرهان ديل.
الظاهر نحن بدل الاستقلال دخلنا غلط وبقى علينا (الاستغلال).
زمان في مواضيع الانشاء – كانوا اول السنة بقولوا لينا اكتبوا موضوع عن استقلال السودان.
في المولد النبوي كانوا بقولوا لينا اكتبوا موضوع عن ذكرى المولد النبوي الشريف.
وبقولوا لينا اكتبوا عن (الام) او (الصديق).
دي مواضيع ثابتة.
من المواضيع الثابتة ايضا انهم كانوا بقولوا لينا اكتبوا عن الخريف عندما يحل فصل الخريف.
ونحن حسب فهمنا كنا وقت يجيبوا لينا سيرة الخريف نكتب عن الرزاز والطل ونختم الاجواء بكلمة قاعدين نستهلكها ساكت وهي كلمة (زخات) المطر.
جنس زخات . كنا اصلو ما بنقصر في هذه الكلمةز
اها طول عمري في السودان حكاية (الزخات) دي ما قابلتني في مطرة.
يعميني منها.
كنا قاعدين نكتب ساكت.
هسع الظروف ودتنا على (كيب تاون) وشفنا (الزخات) على اصلوها.
والله انا كنت فاكر انو اصلا ما في حاجة اسمها (الزخات) – كنت فاكرها خيال علمي او خيال (انشائي) ساكت …وانها كلمة من محسنات اللغة وهي من دواعي الاستهلاك الخريفي ، ليس اكثر من ذلك.
اتاريه في الدنيا في حاجة اسمها (الزخات).
الموضوع طلع جد.
غايتو الكيزان ارتكبوا في حقنا جرائم .. عدمو المطرة (الزخات).
المطر في السودان ما بتشوف ليها غير الطين والبعوض والهدم والكسير.
الكيزان كانوا بتاجروا في المطر عشان يلموا العجوة والخيم من الخليج.
يفتحوا لينا في طلب النجدة والمطالبة بالدعم والإغاثة.
لمنانت ذاتو تصدق وتقول السودان غرق.
تشفق.
وابناء السودان في دول المهجر ما بقصروا.
يرسلوا ويضربوا في التلفونات.
ما بخلوا حاجة.
اقول ليكم حاجة الدينا دي فيها جنس (زخات).
والله (زخات) لمن بي غادي.
غايتو امس شفت (الزخات) شوف عين.
اتفشيت في (الانشاء) الزمان.
نحن ما عندنا حاجة ساكت.
الحي مصيرو يلاقي.
ما بنكتب ساكت.
حتى زخات (الانشاء) بتاعة زمان لاقتنا الآن.
الزخات دي حاجة كدا زي رش العطر …مطر خفيفة .. لا بتحميك الحركة ولا بتبلك.
تتخيلوا المطرة من صحينا لمن غبنا شغالة .. لا ترعت ولا شفنا لينا طين.
ولا بالغلط.
نحن هنا المطرة لو صبت في مدني تلخبط ليك الخرطوم.
المطرة بتاعة حلفا الجديدة اثرها بيظهر في عطبرة.
ما تستغربوا الكلام دا حاصل .. المطرة لمن تصب في الدمازين بتظهر في دنقلا في انها بتقطع الكهربة من المدينة.
يا زول هنا (المطرة) عندها علاقة بالطل والندي.
يطرشنا بيها.
الحاجات البسمع بيها زمان شفتها في كيب تاون.
عندهم مطرة لو قمت على حيلك تتخيل انك ح تضرب ليك سحابة بي رأسك ..لمن تدنقر من هذا الاحساس.
السحابة هنا اقرب من المروحة.
عشان كدا ما في بيت فيه (مروحة).
بعدين السحب مع الجبال عاملين شغل عالي.
زي الضل وقت يدخل العصر.
بتحس انو في صراع دائر بين الطرفين.
نحن في السودان اقصى دهشة عندنا (قاعة الصداقة).
لو دخلت ليك فيلم هندي في القاعة ..اسبوع ما بتتكلم مع زول.
في الفترة الاخيرة ظهرت الجوهرة الزرقاء.
شيء بديع.
الضحك عازز يشرطنا.
جينا (كيب تاون) لقينا الطبيعة عاملة شغل عجيب.
غايتو اول مرة اشوف لي لوحة (سريالية) على ارض الواقع.
لوحة كدا مرسومة بعناية فائقة.
قدرة الخالق …وهو القادر على كل شيء.
نحن في السودان عندنا حاجات عجيبة في الشرق وفي الغرب ..عندنا روعة في الجنوب وتراث في الشمال.
ما في كلمة.
بس الحاجات العندنا .. اهملناها وما عرفنا نديرها.
ضيعنا البلد.
والسلطة كمان بقت تكتل في شباب البلد – اروع ما عندنا.
نحن (المدنية) عاوزين يحرمونا منها.
ولكن هيهات.
الشباب دا بيصل في النهاية.
ويعمل السودان اجمل دولة.
اجمل مكان في العالم.
اصبروا بس.
بس ما تصبروا على العسكر.
……….
متاريس
الملاوي فنان.
التنزاني بديع.
النيجيري رائع.
ديل براهم ح يعملوا نقلة كبيرة في الهلال.
الهلال يخوض صباحا مباراة مع كيب تاون.
ان شاءالله المباراة تكون في نفس الاجواء.
طبعا الاجواء بشكل عام ممتاز.
تفاهم كبير بين الغربال واجاجون وياسر مزمل وجيرالد.
صلاح عادل في هذه الايام في اعلى مستوياته.
بوجبا لعاب.
عيد مقدم يبدو ان المدرب سوف يعتمد عليه بشكل اساسي امام صن دوانز.
عيد مقدم يمكن ان يكون مفاجآة مباراة صن دوانز.
…..
ترس اخير : ما تنظروا كتير.