أتوقع منهم أي حاجة وفي أي لحظة !!
شارعين وناصية
محمد الطيب الأمين
أتوقع منهم أي حاجة وفي أي لحظة !!
* ستندم كثيراً على (۹۰) دقيقة ضاعت من عمرك الغالي إذا فكرت تشاهد مباراة في الدوري الممتاز عبر التلفاز.
* أول حاجة ما بتفهم حاجة.
* وتاني حاجة عادي ممكن المباراة تكون بين الهلال وودنوباوي وتلقاها في التلفزيون الهلال والموردة.
* مع إنو الموردة ما في الدوري الممتاز.
* لكن التلفزيون عندنا ممكن يعملها.
* نقل بطال يكرهك الكرة ويكرهك التلفزيون.
* لا كاميرات زي الناس.
* ولا إخراج.
* ولا إحساس.
* ولا تعليق.
* ما في أي حاجة.
* بس إسم نقل تلفزيون.
* تلفزة حفلات الزفاف في الصالات تبدو أجود وأفضل من نقل مباريات الدوري.
* المباراة ممكن تكون (۱/۲) يكتبوها ليك في الشاشة (صفر/صفر).
* ده طبعاً إذا كتبوها اصلاً.
* مرات بجيبوليك الفريقين بشعار واحد.
* الحكم ذاتو بظهر ليك لابس نفس شعار الفريقين.
* أنا ما عارف الناس ديل الكاميرات الشغالين بيها دي جنسها شنو؟
* وتاريخ صناعتها متين؟
* لا يعقل أن يكون النقل عبر كاميرا الموبايل أنضف وأوضح من الكاميرات نفسها.
* اللايفات البنشوفها من تلفونات المشجعين افضل من التلفزيون.
* ولو جيت سألتهم يقول ليك إمكانياتنا محدودة.
* يقول ليك انتو بتتكلم ساي ما عارفننا شغالين في ظروف كيف.
* طيب إنت وقت إمكانياتك ضعيفة داير تنقل شنو؟
* الرشاقة الكاتلاك دي شنو؟
* في زول جبرك؟
* شهر ما عندك فيهو نفقة ما تحسب ايامو.
* من قبل قدمت قناة الملاعب اسـوأ تجربة نقل تلفزيوني لمباريات الدوري.
* وجاءت الآن قناة النيلين التابعة لتلفزيون السودان وواصلت في ذات الدرب.
* بل ربما النيلين اسوأ حتى من الملاعب.
* النقل التلفزيوني في كل أنحاء العالم تطور بشكل كبير.
* حتى أفريقيا المتخلفة الآن تقدم نموذج راقي لنقل المباريات.
* شوف القنوات الإثيوبية والتنزانية والكنغولية كيف إنها تبدع في نقل المباريات.
* تلفزة الدوري هو عنوان للكرة في البلد.
* الناس ممكن تعرفنا عن طريق التلفزيون.
* لكن بطريقتنا الشغالين بيها دي إن شاء الله ما يشوفونا.
* لانو لو شافونا ما ح يصدقوا.
* الإتحاد العام نفسه غير معفي من هذا الجريمة.
* الإتحاد الذي هو غير أمين على الكرة السودانية تجده (يرمي) الدوري لقنوات لا تملك القدرة على نقل أي حدث حتى وإن كان (طهور) في المبنى المجاور للتلفزيون.
* ليهم حق المحترفين الكبار يرفضوا اللعب في الدوري السوداني.
* ليهم حق والله.
* المحترفون يسألون عن النقل التلفزيوني لأنهم يبحثون عن تسويق أنفسهم.
* دايرين يظهروا.
* لكن النقل بتاعنا ده بغطس حجرهم والله.
* حاجة تكسف.
* و.. و..
* الله في.