أزمة الوقود حلها في قون (بشة)

وان طال السفر

محمد عبدالماجد

• ما تبقى (حُتحات) للفرح…
• ما تلملم (الشوق) من جراح …
• انفض (قميصك) من شجن …
• وارفع يديك…
• الناس بقت بي الف (وش)..
• وش في الصباح…
• وش في المساء..
• وش في الضهر…
• وش في العصير…
• وش لي سحر …
• وش لي حسين…
• ما عرفت بس، بي ياتو (وش) لاقتني في وضح النهار…
• لخبطت شوقك بالحنين..
• وقعدت أرقم في الجراح…
• أول جرح كان في الطريق…
• تالت جرح كان في العرس …
• خامس جرح في (الحافلة) كان وسط الخلق..
• وسابع جرح…
• تاسع جرح..
• عيييييك والجراح…
• مليون جرح …
• كترت عليّ…
• مات الحسن..
• وصديق وعباس والخليل..
• مات الحنين …والغالي …والزين والفضل..
• مات (الوليد) الكان بيفتح في الدروب …
• يسقي الجُهال …
• (العاقب) الكان في سفر…
• قطّع قلوب …
• ضحكاتو تمحاها الذنوب….
• مات الجميل …القال قبل فُوت الأوان (فات الأوان)..
• وركبت في (الحافلة) القبيل مات فيها عثمان والامين..
• وكتين يصيح فينا الجنا (تمت) خلاص …
• كت قايلو قاصد (حافلتو) …
• تاريه كان قاصد (عميرنا) الاكتمل…
• تاريه كان قاصد (رويحنا) الانتهت….
• وكتين الهلال يكون عندو مباراة ، تتداخل علينا المشاعر…
• نفتح (الشباك) ، نرجع نقفلو.
• يضرب التلفون …نشيل (الفندق) عشان نرد على المكالمة…
• نركب وصلة الكهرباء في عين الشافع.
• نتلخبط قدر كدا.
• اوعكم الليلة من العدس.
• والقرع.
• والبامية المفروكة.
• الليلة لو قابلك أي زول من ناس الحلة في الحافلة …ادفع ليه.
• ما تعمل فيها ما شايفو.
• الهلال الليلة عندو مباراة.
• ما تتداغل.
• خليها (الدغالة).
• وكت الهلال تكون عندو مباراة..بتمر علينا ذكريات وحاجات مختلفة.
• بنتذكر اعزاء رحلوا من هذه الدنيا ، كانوا أكثر عشقا منّا للهلال.
• نتخيلهم وهم في حالة من السؤال والخوف والترقب.
• وقت الهلال يكون عندو مباراة نتذكر عبدالموالي الصديق ..مشى وخلى لينا رجفتو.
• قاعدين نرجف لي يوم الليلة.
• نتذكر داؤود مصطفى….وكلماته الهادئة…
• زول رزين حتى في تعصبه للهلال.
• نتذكر عبدالله عبدالسلام…
• ونتذكر الصحفي عبدالمنعم مختار – كان يعشق الهلال بطريقته ..لا يشبهه في ذلك الحب أحد.
• يجمع بين وردي وتنقا.
• كندورة والمساح.
• نتذكر العاقب عبدالباقي – كان كتلة من الادب والتواضع…
• نتذكر والي الدين …
• وزعيم امة الهلال..
• والفريق الطاش …
• والبلولة..
• ود البان…
• وود الجنيد…
• اسماء كثيرة كان تقدم في عشقها للهلال اشكال فريدة في الحب والعطاء..
• وقت يلعب الهلال بهيج فينا كل هذه المشاعر.
• نبقى ندخل …ونطلع..
• نمشى ونقيف…
• نتوزع في الشوارع بدون مناسبة…
• الليلة يمكن الازمة بتاعة الوقود تنتهي.
• بقينا ما بنصدق الجرايد.
• كل يوم يقولوا ليك الازمة سوف تنفرج في هذا الاسبوع.
• زي ناس الهلال وقت يكون عندهم (محترف).
• كل يوم يقولوا ليك محترف الهلال يصل غدا.
• يحولوا فيه من يوم لي يوم ، زي اعلان نتيجة امتحان الشهادة السودانية.
• نحن فترنا من (الوعود) دي.
• بقى ما عندنا حيل للصبر.
• كملنا في (الانتظار).
• ح نظل ننتظر كدا لمتين؟.
• مطار الخرطوم من الانتظار الكتير بقى برندة وغرفتين.
• اللاعب الجزائري عبدالعزيز القشي اول مرة اعلنوا عن وصوله الاربعاء الماضية.
• قلنا جميل.
• ممكن.
• واحتمال.
• وما بعيد.
• والكاردينال بيعملها.
• ثم قالوا سوف يصل الخميس.
• اتقصرنا شوية.
• ثم قالوا بل الجمعة.
• الشك دخلنا.
• ثم السبت.
• قربنا نقنع.
• أمس قالوا الأحد.
• الله يستر.
• الله يجمعنا بيه.
• (القشي) أظنه الآن اصبح (القصبي).
• طول شديد.
• يخلقوا لينا (الفة) وعشرة وملاح بينا وبين (المحترف) ثم يقولوا لينا الصفقة فشلت.
• بتخلونا نولف ليه؟.
• ما عاوزين نشرع.
• ما عاوزين ننظر.
• خلونا الليلة في المباراة.
• الشفقة مسكتنا.
• لكن (الثقة) عريضة في الهلال..
• عندنا أمل كبير..
• في (تفاؤل).
• قادرين نعملها اليوم باذن الله.
• ننتظر فرحة من (المغرب) قبل (المغرب) اليوم.
• عاوزين نتحلل من (حزنا).
• نمرق منو.
• عاوزين ننفط (الهم).
• نطلع منو.
• ونشرب لينا (موية باردة).
• نطلع في الشارع.
• نشم لينا هوا نضيف.
• عاوزين نرجّع للنبق ريحتو الزمان.
• من زمن ما لاقتنا (نبقة) طبيعية.
• النبق اتغير.
• يمكن عشان الاشياء كلها بقت غير (طبيعية).
• اتغيرت.
• حتى النبق بقى ما نبق.
• يوم داك لاقيت لي زول كان ود خالي قبل 9 سنوات.
• تتخيلوا لقيتو بقى ما ود خالي.
• ما عارف الحصل شنو؟.
• عاوزين نظبط الساعة الليلة بـ (بشة).
• نقدم (جيوفاني).
• نأخر (ابوعاقلة).
• عاوزين نعملها.
• يطلع (شلش) بي هناك.
• نقوم نحن ننطط في الخرطوم.
• زمن ما نططنا.
• في ناس بتتكلم.
• بقولوا ليك درجات الحرارة (مرتفعة).
• فلاحتكم في (الحرارة).
• بقت على الحرارة.
• الحرارة خلوها.
• ما سألوكم منها.
• وفي ناس بقولوا مواصلات مافي.
• ومنتظرين الفرج.
• منتظرين (شلش).
• شلش عاوز يحل ليكم مشكلة المواصلات.
• منتظرين ليهم (فرحة) من المغرب.
• في ناس راجين بشة يجيب ليه قون.
• يقوم يحل لينا أزمة الوقود.
• الظاهر كدا.
• شكلها كدا.
• الأزمة دي ما بحلها إلّا انتصار الهلال.
• ما تقولوا لي مصفاة الجيلي اشتغلت.
• ما اتقولوا لي في 7 بواخر في بورتسودان.
• لكن قولوا لي الهلال انتصر.
• شوفوا تاني لو لقيتوا ليكم صف.
• الصرافات.
• المخابز.
• الطلمبات.
• كلها بترجع تشتغل زي زمان.
• كلها بترجع.
• ما ح تكون في أي مشكلة…
• الناس في البلد دي بفرحوا بالهلال.
• ممكن يزعلهم الجاز.
• ممكن يزعلهم البنزين.
• والصراف الآلي.
• وحاجات كتيرة.
• وبيفرحهم بس الهلال.
• بنفرح بالهلال.
• مالكم مستكترين علينا الفرحة.
• الليلة ونحن على مقربة من الشهر الكريم.
• قربنا ندخل على رمضان.
• في شعبان.
• وفي هذه الايام..نسأل الله ان ينتصر الهلال اليوم.
• عاوزنو انتصار عديل.
• ماعندنا صبر للتعادل.
• عاوزين (فوز).
• السخانة دي ما سخانة (تعادل).
• دي سخانة فوز.
• بتبرد.
• وترجع تغيم تاني.
• مع كل هذه الاحزان.
• وكل هذه الأوجاع.
• انتصار الهلال بيفرحنا.
• بيرجع لينا حاجات كتيرة.
• ان شاءالله.
• ويا رب ينتصر الهلال اليوم.
• قولوا يا رب.
• وخلوها على الله.
• ما بتجيكم أي عوجة.
• ………….
• ملحوظة : فترنا من الصفوف.
• هوامش

• الصفوف الكتيرة دي لو عملوتها في الزراعة.
• كانت اتحلت.
• ممكن تجيب ليها مطرة.
• أي حاجة جايزة.
• ما في شيء بعيدة.
• الخرطوم الوطني حجزت موقعها في دور النخبة.
• ليبقى في مرحلة النخبة الهلال والخرطوم الوطني والمريخ والاهلي شندي والمريخ الفاشر.
• هذه هي الاندية التى حجزت موقعها في مرحلة النخبة.
• هلال الابيض طبعاً أمره محسوم وسوف يكون ضمن اندية النخبة.
• ويبقى التنافس مفتوحاً في المجموعتين على البطاقة الرابعة.
• في المجموعة الاولى التنافس سوف يكون مشتعلا بين أهلي مروي والشرطة القضارف.
• وفي المجموعة الثانية التنافس سوف يكون مشتعلاً بين ود هاشم سنار ومريخ نيالا وحي العرب وهلال كادوقلي.
• مرحلة النخبة سوف تكون مرحلة حامية الوطيس.
• عشان كدا – الهلال عليه ان يخطط للاجادة افريقياً ومحلياً.
• وهذا أمر يحتاج لتسجيلات ممتازة.
• محمد موسى البلدورز في موسم واحد استطاع ان يضع بصمته.
• سجل في النجم.
• وسجل في المريخ.
• وسجل في الأهلي شندي.
• وكانت له العديد من الاهداف الحاسمة.
• نتمنى لمحمد موسى التوفيق في مسيرته القادمة.
• نعيب على محمد موسى انه كسل شوية في الفترة الأخيرة.
• لو اجتهد محمد موسى أكثر كان بقى في كشوفات الهلال.
• الاهلي الخرطوم امس قدم مباراة جيدة امام المريخ.
• هيثم مصطفى بصمته واضحة في الأهلي رغم ان النتائج غير مساعدة له.
• الأهلي الخرطوم عاوز تسجيلات جيدة ..لكي يبقى في الممتاز.
• صراع البقاء في الممتاز سوف يكون قوياً بين الاندية العشرة.
• الأمل والأهلي عطبرة أندية كبيرة سوف تلعب من أجل البقاء في المرحلة المقبلة.
• الأمل عطبرة هو الآخر يحتاج لاضافات قوية في التسجيلات الحالية.
• الأمل من الأندية التى لم تهبط من الممتاز بعد صعودها.
• على ادارة نادي الامل الحفاظ على هذا الامر.
• قناة الملاعب ، كل مرة تقدم لينا في مباراة في قناة ما معروفة.
• كل مرة تظهر لينا بي قناة جديدة.
• الناس ديل قنواتهم زي بيوت النضارة.
• رف ..رف.
• نحن يعني ح نقعد نباريكم كدا.
• يا جيوفاني …ما تخليها تمغرب.
• احسمها قبل (المغرب).
• ما عندنا صبر للكلام دا.
• ولا فايقين.
• مازيمبي في الأبطال فاز على وفاق سطيف.
• أندية شمال افريقيا تراجعت كثيراً في السنوات الاخيرة.
• الهلال عليه اليوم ان يلعب على الخبرة والثقة.
• الخبرة والثقة.
• ما بتجيكم عوجة ان شاءالله.
• وابقوا على سفر.
• ………..
• عاجل: راجيين (المطرة) تمرق تخش!!.

حمل تطبيق كورة سودانية لتصفح أسرع وأسهل 

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملوh التطبيق               

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app 

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app