ألفين جنيه من أمو مابجيبنو

فى السلك

بابكر سلك

ألفين جنيه من أمو مابجيبنو

أمس اتصل أحدنا على قناة الهلال أثناء برنامج صباحي

*أحدنا ده ذكر أنه من الأبيض

*موضوع الحلقة كان الغلاء البطحن فينا ده

*صاحبنا في اتصالو قال لافي غلاء ولا شي

*أول حاجة كنت قايلو بهظر

*أو اكتشف كلمة توصف الأسعار بدقة أكتر من كلمة غلاء

*لكن ألقى ليك زولي جااااادي

*ده لو كانت مداخلتو دي على النيل الأزرق

*أكيد المذيعة بدون ماتشعر كانت قالت ليهو أنت جادي؟؟؟

*المهم صاحبنا كان جادي جداً

*وأضاف قائلاً على حد تعبيره

*إنو ألفين جنيه في اليوم بتكفيهو هو وأطفالو

*الحمد لله وقتها كنت لابس

*ومرقت

*وحمدت الله أني كنت لابس

*لأني لو كنت مالابس وقال ألفين جنيه بتكفيهو هو وأسرتو

*كان مرقت بعدم لبسي داك

*المهم

*وصلت المحكمة

*لقيت حديث الزول ده هو محور نقاش الناس

*واحدة مننا قالت ممكن يا إخوانا

*الناس هناك عندها البهايم بتحلب لبنها

*ومربية الجداد

*تاكل بيض وفراخ من البيت

*والجداد ذاتو بياكل لقيط ساااي

*وبزرعوا العيش

*وبزرعوا البصل

*عشان كدة ألفين جنيه برااااحة بتكفيهو

عاينت ليها كداااااا

*وحمدت الله أني كنت لابس

*قلت ليها يا أستاذة

*قولي حلب الناقة في الشنقاقة

*وفور اللبن على حطب لماهو من الشارع

*وزارع البصل والطماطم في البيت

*ومابياكل رغيف

*كسرة بس من العيش الزارعنو

*الطاحونة ذاتها قول جلوها

*قولي المرة طحنت العيش في المحراكة

*السكر الطعم بيهو اللبن والشاي الكباهو في اللبن والكبريتة الولع بيها الحطب والملح الكباهو في الأكل

*والزيت الفقع فيهو البيض بتاع جداد البيت

*ديل بس ألفين جنيه مابتجيبهم

*قالت لي والله هناك ألفين جنيه براحة بتأكل الأسرة يوم

*قلت ليها علي الطلاق هو وأسرتو لو لاكو الصبر ألفين جنيه ماتكفيهم في اليوم

*ياخ سمسم القضارف ألفين جنيه من أمو مابجيبنو

*زولك ده يا أستاذة لو بياكل في خيالو ألفين جنيهو دي مابتكفيهو

*وكلامو ده والله عضو مجلس سيادة مايتجرأ يقولو

*غايتو يا الزول ده مجنون

*يا أنا ضعيف في الرياضيات

*ألفين جنيه؟؟؟؟؟

*نجي لي شمارات والي الخرتوم

*والينا المكلف بينا

*وكت ألفين جنيه بتعيش أسرة بأطفالها في اليوم وتعينا

*ماترحلنا وللأبيض تعدي بينا

شمارات الكلب

ننساك كيف والكلب قال زول وأسرتو بعضو بألفين؟؟؟علي الطلاق أنا الكلب ده بألفين مابعضي

وإلى لقاء.

سلك