أمر شعبي واجب التنفيذ ….!!

سوبر هاتريك
طارق محمد عبد الله
أمر شعبي واجب التنفيذ ….!!

& مهما باعدت بينه وبين عشاقه الكثر مسافات ،مطارات و عوارض وفي عارض أكبر من الحرب العبثية اللعينة يظل الهلال بعيد عن العين جغرافيا ولكنه قريب من القلب قريب شنو..؟؟؟ جواهو عديل وجدانيا وطبعا سبب العشق الخرافي للهلال الزيو مافي انو ما بس مجرد فريق لكرة القدم والسلام بل وطن نعيش فيه لذلك جموع العاشقين وجل السودانيين الممكونين وصابرين في البيوت والحواري راجين منك بس إشارة كلمة تديهم البشارة عليه يبقى اذاقت الليتوال من حنظل الهزيمة المر أمر ومطلب شعبي واجب التنفيذ من قبل الأغلبية الغالبة بالوطن و مامنو مفر وباذن رب السماء هلال العزوالشموخ والكبرياء سيحقق المراد ويسعد البلاد انتوا بس اكثروا من الدعاء وانتظروا مساء الثلاثاء .
& والاخبار الجايه من تنزانيا قلب افريقيا النابض واخت بلادي الشقيقة كلها مبشرة بالخير الوفير و تقول ان الضرغام الازرق في اتم الصحة والعافية الكروية وجاهز مويه ونور لمعركة الثار ورد الاعتبار بجندلة الليتوال المغرور ولاول مرة فلوران محتار في تشكيلة فخر السودان جراء التألق الجماعي للفرسان يلعب منو ويخلي منو بعد التألق الجماعي للفرسان في التدريبات والمباريات الاعدادية كمان …؟؟؟
& الأساسي منو مامهم ،والبديل منو برضو مامهم ،غايتو الفهم انو نحن بربطة المعلم ياهلال.. منتظرين انتصارك على الليتوال.. الناس ، النيل،النخيل والبراحات والتلال .. وبرغم الفينا ومكفينا يارمز الجمال..واثقين منك ومعاك اكيد بكرة أحلى يافارس النزال ..وياعزنا ويافخرنا بالسمرة والناس الطوال.
اهداف سريعة ..اهداف سريعة
& فلوران محتار ايوه ولكن ولأنه متمكن وعارف بيعمل في شنو كويس خالص نراهن بأنه سيضع الأسلوب المناسب لرجم النجم .
& اطمئنوا يا اهلة وختوا في بطونكم بطيختين واحدة صيفي والتانية شتوي ونوموا قفا وباذن الكريم النصر المبين حليف هلال الملايين.
& وقطعا فان رفاق الغربال يعرفون على وجه الدقة المطلوب إثباته مساء الثلاثاء ألقدامنا ده .
& وبطريقة الكتابة على الشيكات المطلوب من الهلال الفوز على النجم فقط لا غير شفتوا كيف …؟؟؟
&و المعروف عن الكرة التونسية التكتيك المميز في الضربات الثابته على مشارف منطقة الجزاء .
& ونعتقد بأنها الخطر الوحيد على الهلال أمام الليتوال عليه يجب على المدافعين وفوفانا الحيطة والحذر طوال زمن المواجهة يعني فاولات بقدر الإمكان نهي نهي .
& نتطلع دائما لهلال قيافة فايت العرب والافارقة مسافة .
& ازرق وابيض لون الفل هلال القمة حبيب الكل .
& ويظل الهلال الرقم الصحيح بالكرة السودانية وغيره الكسور والبواقي .
& وياهلالنا يافخر الوطن تسلم انت من الألم والجراحات والنزيف.
& وأخيرا احمد الله كثيرا انني حي ازرق .