اختفت كلمة (نحن) وساد حب الذات … من هو (سوبر مان) ومن اي زمان آت

معاذ ابو مؤيد
تغريدة واتساب
اختفت كلمة (نحن) وساد حب الذات
من هو (سوبر مان) ومن اي زمان آت

•••••••••••••••••••••••••
وبعدين ياكوكب المريخ
وبعدين ياعالم المريخ
وبعدين ياوطن المريخ
بعد مانقول مريخنا شم  العافية
يطلع صوت نشاذ يشهينا العافية!!!
قدر مانقول خلاص نلتفت للاهم
نلاقي في ناس شغالين في وادي والكيان في وادي
نتحسس خطانا ونقول ياربي دا المريخ النادي!!!!
وبعدين يااخر متنفس لينا!!!!
القصة ومافيها الوضع اصبح عندنا ليس شغل  كورة ولاشغل عمل عام وتطوعي!!!
الشغل الان بحث عن مصالح وراسي وراسك ويروح الكيان في …..
الواحد كان بسال الناس تتهافت علي شغل الرياضة ولا الاندية لشنو !!!
حتى وقت قريب كنت متخيل بحث عن علاقات !!!
لكن الحاصل الان تجاوز العلاقات!!!
وتجاوز المصالح الشخصية
وتعدى خطوط الشهرة
واصبح الكل يضغط علي الكيان ويحاول يكون هو سوبرمان !!!!
وعند سؤال نفس الشخص
اخر مرة زكرت اسم الكيان بتين
يجاوبك علي عجل كيان شنو
ولم يشوف الدهشة في عينك
يقول ليك فسر عليك الله
وبعد شوية يتزكر انوا اللقاء والسؤال اصلا عن المريخ
وهنا تتضح الرؤية ان مصالحهم الشخصية اكبر من مصلحة الكيان
او بالاصح الكيان اخر اولوياتهم واهتمامتهم!!!!
وتاني شجرة اللبلاب عايز يقوم وينبت مع الاجواء الخريفية الماطرة!!!
الرسالة الصريحة لكم حضرات السادة اطفال الانابيب
الجمهور الان واعي وعارف الصالح من الطالح
وعارف منو بتاع مصالح
لكن في ناس مفتكرين هم سوبرمان
ونرجع لتاريخهم لا نعرف من اي كوكب هم ولا من اي زمان
وللاسف يلعبون في زمن العولمة والسوشل ميديا التي اصبحت وبال علي حكومات قبل تكون وبال علي الافراد
الصورة واضحة للجميع
سارد عليكم باسلوب خدمات المشتركين
(عفوا كوكب المريخ غير متاح لاصحاب المصالح حاليا)
رفعت اول جلسة
••••••••••••••••••••••••••
تدخل قروب واتس او تفتح صفحة فيس تلاقي العجاج قايم والنفس حار والزيطة والكلام كتير
ولم تمسك اخر سطر تلاقي الموضوع لايخلو من اشياء معينة
ياشتلة والناس هايجة في الفاضي
وياكمان واحد عايز يثبت راي خاطي
وياكمان صاحب مصلحة دايس ابنص للاخر
وياكمان واحد يدافع عن فكر واحد تاني !!!!
ولو جيت ولحصت دا كلو تلاقي الكيان برئ منه براءة الذئب من دم ابن يعقوب!!!
لو استمعنا باعيننا ونظرنا بقلبنا لوجدنا ان كل مايدور بعيد من الكيان المريخي ولن يستفيد الكيان مثقال زرة من الحاصل الان!!!!
ودا كوم وواحد يدافع عن وجهه شخص اخر كوم!!!
والادهى والامر ان صاحب وجهه النظر ربما غدا يغير راية وصاحبنا لسة بيدافع عن وجهه النظر الاصبحت في طى العدم او متلاشية باعتزار صاحبها
افيقوا ياعالم
اصحوا ياناس المريخ
الحرب اتت اؤكلها وقضت علي الاخضر واليابس
لمصلحة من كل هذا الزمن المهدر في اثبات وجهات نظر!!!
لمصلحة ياتو كيان الناس قاسمة التشجيع كيمان!!!
وكل شخص ينادي براهو ومعتبر نفسة صاحب النادي والبقية مجرد كومبارس او بالاصح ناس ماعندها اي حق في تصحيح المسار!!!
اصحوا وافيقوا ياهؤلاء
انتم تحكمون علي المريخ بالاعدام مع سبق الاصرار والترصد
تقتلون المريخ في اليوم الف مرة اكثر من سيوف وسكاكين الاعداء!!!
هل اصبحنا القطة التي تأكل جناها!!!
هل من الحب ماقتل
ام انها حرب بايادي خفية تخدم مصالحهم الشخصية!!!
ماذا تريدون ياهؤلاء
هل المريخ ملك احد ونحن لانعلم
من يملك صك امتلاك المريخ فيخرجه للعالم ويوضح نحن نشجع نادي ملكية خاصة !!!
المريخ مريخ الشعب
والشعب هو الجمهور
وليس ملك احد ايها القراء والحضور
رفعت الجلسة الثانية
••••••••••••••••••••••••••
مسك الختام وفاصل مابين الجلسات
من يسعى لمنصب او شهرة او مصلحة شخصية
بامكانك البحث عن مايخصك بعيد عن مصلحة الكيان التي تعتبر العليا
ابحث عن امورك الشخصية في الضيعة التي ورثتها من والدك ولاتبحث فيها في املاك الشعب
تلميع وشهرة وطولة لسان وانفه وكل واحد رافع كتفيه في السماء ولو سالت سقف طموحه شنو لرفعة الكيان يقول ليك وقبل كل حاجه (اناااااااااا)
قبل مايتم جملته ابتعد عنه
لان نحن في المريخ
وطالما قال انا تاكد انه من اصحاب المصالح الشخصية
لن نقول (انا ) في محراب المريخ
سنقول (نحن) فقط،،،،،،
••••••••••••••••••••••••••
و(نحن) علي المدرج ندعم ونشجع ونتفرج
لماذا (نحن)
عشان كلامنا عن كيان
مش عن فرز كيمان
عشان المريخ امة ودولة وشعب
عشان المريخ وطن نسكنة وليس فريق نشجعه
طالما طلعت عن ذور الجماعه واصبحت تتكلم بكلمة ( انا) فينقول لك (انت) تغرد خارج السرب
امة المريخ شعارها (نحن)
وكلمة (نحن) لم تختفي من جماعة تاكد انها في حالة صراعات
وهذا مانراه بام اعيننا
اختفت روح الجماعه وسادت روح الانانية وروح الفرد
حب السلطة وحب الشو والوجاهه لن تخدم الكيان تخدم صاحبها وبمجرد ترجلك عن منصبك سيقول الناس كان فلان يوم ما
ساعتها سيدرك الجميع انك لم تضع بصمتك
في حالة وضع بصمتك ستتحدث اعمالك ويقولوا دي في عهد فلان الذي صحى بماله ووقته من اجل الكيان،،
مايهمنا ومايرفع قدر الكيان
نفرتنا
الزمان ٢٠١٦/٨/١٠
المكان نادي المريخ
تحت شعار (بنفرتنا) سنسدد غرامتنا
••••••••••••••••••••••••••
همسة اخيرة
كل ماكان كلامك بصيغة الجماعة تأكد انك في الطريق السليم وكل ماكان كلامك بصيغة الفرد فانك حاليا تبني في سرب جديد عكس خط السير وضد الكيان!!!!
المريخ يمر بمنعطف خطير
منعطف الانانية لبعض الاشخاص
منعطف البحث عن شخصنة المواضيع والشهرة الوقتية!!!
منعطف لايد من الوقوف خلف الكيان
منعطف لابد ان يسود فيها صوت الجماعة وتختفي الاصوات النشاذ
اصوات البحث عن المناصب وحب الذات!!!!
(نحن)حاليا ليس في فضاء الدولة الفاضله او رحابها
عشان في ناس همها واحد تكبير كومهم ويروح الكيان في………..
ابتروهم قبل ان يتكاثروا ويصبح مجتمعنا مليان باطفال الانابيب
واول كلماتهم (انااااااااااااا)
••••••••••••••••••••••••••
خارج النص

المريخ يختتم تدريباته لمباراة الرابطة كوستي واهل كنانة وكوستي احتضنوا المريخ بكل حفاوة والاجواء الجميلة تسود المعسكر القصير والاجواء اكتر من اسرية
واصحاب الشتل لم يجدوا مايزكرونه فانتقلوا الي اتمام صفقات اجنبية للمريخ
الحمد لله الان التفت اهل المريخ للشتل الحايم واخبار المريخ اصبحت تؤخذ من مصادرها
دعواتنا للمريخ بالنصر والعودة من كوستي بالنقاط الكاملة واتمني المعسكر القصير والابتعاد عن الضغط النفسي والجماهيري ان تاتي  نتائجه سريعا
كل التوفيق لمريخ السودان
ولا عزاء لمن يصطاد في الماء العكر
الزمان لايصلح ان نشوف وجوهكم في قيادة او في مقدمة ركب المريخ
ناس المصالح الشخصية
ساقول لكم كما قال علي عبدالله صالح
(لقد فاااااااتكم القطار)
وساردد في سري كثيرا مقوله القذافي
( من انتم ….. من انتم …….)
وسادعوا في سري
(ان يلتف شعب المريخ حول الكيان
كالتفاف الشعب التركي خلف اوردغان)
رفعت الجلسة الختامية
••••••••••••••••••••••••••
المريخ مريخ الشعب والشعب هو الجمهور
المريخ وطن للشعب والشعب هو الجمهور
المريخ وطن مساحاته شااااسعة وابداعاتة كثير لايتنفس هواءه النقي الي صاحب الرئة التي تنبض وتنطق بكلمة (نحن)
اصحاب رئة (انا) كالمتناول للدخان رئته يكسوها السواد لانها استنشقت كتير من حب الذات
نطقنا اخر الجلسة
(القصة ماقصة بطولة القصة عشق لكيان ونادي منذ الطفولة)
ومعاه صوت من الاعماااااااق
رفعت الجلسة
••••••••••••••••••••••••••
# هاشتاق طبي

عندما تعرض نفسك على الطبيب و تتوجه لصرف الروشتة الطبية فلا تقم بالتعديل من تلقاء نفسك في أي مكون من مكونات الروشتة الطبية فلا تلغ صنف دوائي مثلاً و لا تغير طريقة تعاطي الدواء مثلاً لأن الوحيدين العارفين بالمرض الطبيب والصيدلي
وربنا ينعم عليكم بالصحة والعافية
••••••••••••••••••••••••••
# هاشتاق عام
ﻧﻮﺑﻮﺍﻛﻲ ﻧﻮﺗﻮﻫﺎﺭﺍ هو كاتب ﻳﺎﺑﺎﻧﻲ درس العربية ومتخصص في الأدب والرواية العربية، ﻋﺎﺵ ﺑﻴﻦ ﺍﻟﻌﺮﺏ ﺳﻨﻴﻦ ﻃﻮﻳﻠﺔ
من ضمن ماكتب
أول ما اكتشفت في المجتمع العربي هو غياب العدالة الاجتماعية وهذا يعني غياب المبدأ الاساسي الذي يعتمد عليه الناس… مما يؤدي الى الفوضى.
••••••••••••••••••••••••••

هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية……..
التغريدة لن تخرج خارج نطاق المجتمع المريخي نهائيا الا ماندر
ونقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن  اخطأنا في يوم من الايام ،،،،،،،،

***تغريدتنا ونسة وحكاوي ونقاط  بصوت مسموع***