اخلاق الثورة

في السلك

بابكر سلك
اخلاق الثورة

*ايها الناس
*شعار الثورة حرية سلام وعدالة
*والعدالة تعني اعادة الحق المسلوب لصاحبه
*وتعني ان ثمن الدم هو الدم بصرف النظر عن السعر الموازي للعملات سواء كانت الموجودة حبسا بالبنوك من اصحابها
*او المقبوضة دهشة مع رموز النظام البائد بعد السقوط
*وتعني كذلك حقوق الذين تمت ابادتهم وانتهكت حرماتهم وعانوا من ويلات الاقتصاب الشامل
*اغتصاب الارض والعرض والشرف
*والعدالة كذلك تعني اعادة مال الوطن والتحقيق في الكباري التي صنعها نافذون في تكلفة كل مشروع يخص الوطن
*نافذون عملوا كباري صينيون مابعملوها
*والغريبه الفار حسب قولهم اكل احد كباريهم
*والعدالة تعني سرعة الانجاز في الاقتصاص واعادة الحقوق المسلوبة
*والعدالة تعني المساواة
*والمساواة معني كبير وعميق لا تعرفه الدولة العميقة ولاتعترف به
*لكن هذه الدولة العميقة لو بقت بئر
*حقو تقتنع بانو القصاص من القتله امر رباني ثابت ووارد في القرآن الكريم
*وان الدم بالدم هو شعار الشباب
*وان ارواح الشهداء لازالت ترفرف علي سارية الوطن تراقب الثورة وترقب موقف المجلس العسكري
*يا مجلسنا العسكري
*ماتلخمونا باخبار السرقات لتشغلونا عن القصاص
*الشعب عندما هتف يا حرامية
*كان عارف السرقات
*خلونا في الاهم
*حق الشهداء
*ناس هزاع ٢٠١٣ ومآب ٢٠١٩ ومابينهما
*حق الناس الخرج ولم يعد
*ولن يعد
*لان معدودته كملت بالتعذيب في معتقل او اصيب في مقتل
*حفر المطامير ضرورة
*فالمدفون بها كثير من خير هذا الشعب
*ايها المجلس العسكري
*تسمعني؟
*من اربعه واحد للعموم واضح؟
*حول
*الثوار ديل صابنها عارف دايرين شنو؟
*دايرين عقاب القتلة
*دايرين ابعاد الجماعة الكانوا سبب المرقة
*دايرين حق الوطن المسلوب
*دايرين حكم مدني مايشارك فيهو زول سارق
*دايرين موقف واضح
*واضح؟
*طيب حول
*ايها الناس
*ماننشغل بالقروش لانها بترجع
*ننشغل بارواح الشهداء المابترجع
*عشان ام الشهيد تبطل تتوجع
*المهم
*قالوا فكوا اللمبي
*قالوا فكوا حميدة
*قالوا فكوا بتاع البرلمان وفكوا الامين العام
*قالوا فكوا بتاع السدود
*فكوا…فكوا…..فكوا
*الحكومة دي ام الشعب ولا ام فكوا ؟
*وقالوا ماقبضوا المتعافي
*ولا قبضوا المتصافي
*ولا قبضوا اللسرقة مابجافي
*طيب الجوة منو؟؟؟
*اقول ليكم
*قبضت ماقبضت
*صابنها
*فكت مافكت صابنها
*ضحيتنا هنا ضابحنها
*ايها الناس
*الثورة هي تغيير سياسي اجتماعي كبير
*الشعب يصنعها ويرعاها
*وللتغير الاجتماعي اخلاق نتخلق بها سلوكا يتماشي مع ادب الثورة
*ثورتنا مستمرة
*واخلاق الثورة بميدان الاعتصام نريدها في الشارع العام
*الناس الفارشة في جاكسون وسوق بحري وسوق ليبيا وقافلين الطريق العام
*دي مافوضي
*دي ثورة
*ننظم بها انفسنا
*لابنحتاج لبتاع بلدية ولا بتاع محلية ولا شرطة شعبيه
*برانا نحس ونشعر
*نفسح الطريق احتراما للآخر وللطريق وللثورة
*نوسعها علي الناس مانضيقها
*ننظم انفسنا برانا
*ونلملم نفاياتنا ومخلفاتنا برانا
*نمارس اخلاق الثورة في البيت في الشارع في المسرح
*حتي يكتمل نجاح ثورتنا
*حتي لاتفشل
*الموظف المرتشي
*داك عهد ولي
*سألتك بالله ماترتشي
*خلي اخلاقك ثورجية
*الناس الكانت بتجاهر وتفخر بانتمائها للحقبة الفاتت
*واسي نكرتو حطب
*بل ونطت في بص الثورة
*والناس الكانت بتسئ الثورة والشعب
*واسي بتمدح في الشعب والثورة
*مرحب بيكم في الثورة
*لكن موقوفين اربعه سنين
*دي مرحلة صناع الثورة الاصليين
*ايها الناس
*الثورة اخلاق
*والثورجي بتعرف من اخلاقو
*ايها الناس
*البعض يحدثنا عن تفريطنا في عهد شرع الله
*ونسألهم
*عهد قتل وسرقة وكذب اين موقع الشريعة منه؟؟؟
*ايها الناس
*الناس دي حايمة
*وقاعدين في وظائفهم
*ويحتكمون علي اموال الشعب التي في طرفة بقت بطرفهم
*دي ثورة ولاكانت معانا الكاميرا الخفية يابرهاننا؟
*المهم
*كورتنا كانت بايخة جنس بوخة
*وكورة ابو الهل كانت بيض
*وبايخة بوخة المرقه من الكونفدرالية
*وجابت ليها استقالة كمان
*ارجع يافرجاني
*ايها الناس
*ان تنصروا الله ينصركم
*اها نجي لي الشمارات
*يامجلسنا العسكري الفنجري
*بشة حاتفكوهوا متين شان نبدأ الجري
سلك كهربا
ننساك كيف والكلب قال كان كدي من اسي ابدوا الجري كان بحلكم
والي لقاء
سلك