افلام الخيال العلمي

في السلك

بابكر سلك
افلام الخيال العلمي

*تجد افلام الخيال العلمي مساحة واسعة وسط الناس
*برغم انها كلها تركيبات ساكت علي قول كردنة
*وبرغم انها كلها تتفق في القصة
*قوي الشر تركب فايروس او تغيير مخلوق ليصبح خارقا
*يسيطرون عليه
*يستخدمونه في تركيباتهم الاجرامية
*ثم يفقدون السيطرة عليه
*يطيح في الناس ويطيح بهم
*بما فيهم اهل التركيبة زاتهم
*ثم يموت في آخر الفيلم
*او يهرب تمهيدا للجزء التاني من الفيلم
*هذه المرة وفي هذا الفيلم لانجلس امام الشاشة نتفرج ونشاهد
*بل جميعنا يشارك بالفيلم
*وجميعنا يؤدي دور بطولة
*بعضنا صاحب الفكرة التركيبة
*وبعضنا مركباتي ركب التركيبة معمليا
*وبعضنا نشر ناتج تركيبات المعمل
*وبعضنا مات
*وبعضنا خائف
*هذا البعض الاخير يمثل الجانب الكوميدي في الفيلم المأساوي
*وديل نحنا
*قال ليك واحد في صف العيش عطس
*لالقي ناس في الصف ولالقي خباز ولا عيش زاتو
*الجميع اطلق سيقانه القادة عربي للريح
*قال ليك واحد عطس عطستين كاربات جوة الحافلة
*الناس بالشبابيك يافكيك
*بي سواقهم
*والكمساري جري بالباقي
*ياخ واحد اتصل تلفون علي صاحبو
*مع قولة الو قحة
*صاحبو جدع التلفون
*هواوي آخر موديل
*ياخ واحد وسط السوق عطس فحمد الله لم يجد من يشمته
*والخواف ربي عيالو
*هذا الداء التعامل معه بسبهللية
*لا حانحضر انتخابات
*ولا حا نشوف نجاحات حمدوك
*الحذر ثم الحذر
*والتعامل بجدية من الحكومة والشعب
*فالتركيبة المرة دي صعبة شديييد
*ومابتهاظر
*ياخ قال ليك واحد عندو ضيق نفس مشي يفحص
*لما فتح الباب البيت كلو بصوت واحد
*ان شاء الله طلع سل!!!!!
*ايها الناس
*بايديننا نبنيك يابادنا
*وبغسل ايديننا نهريك ياكورونتنا
*وخلو الاحضان لزمن الاحضان
*ايها الناس
*المبادرات الخدمية الطوعية هي فهم راقي وتعبير عن انتماء لوطن واعتراف بشعب
*في كل صباح يدهشنا الشباب بمبادرة تسر
*وهاهي مبادرة سودان بدون اوساخ
*تحدد الجمعة القادمة يوما لنظافة شارع العرضة من المحلية شرقا وحتي كوبري ود البشير غربا
*الدعوة للمشاركة لكل شاب عاشق للبلد ولكل شابة محبة للوطن
*ليست قصرا علي سكان العرضة
*ولا مقفولة علي ناس ام درمان
*بل لاجميع
*لان عنوان المبادرة سودان بدون اوساخ
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*ايه دوركم تجاه مبادرات الشباب قول لينا
*اذا كان المحلية عربية مابتدينا
*اذا كان الدولة العميقة بتعرقل لينا
*اذا واذا واذا يا والينا
سلك كهربا
ننساك كيف والكلب قال القصة ماقصة نضافه وبس…القصة قصة سلوك قيافه وثقافه نحافظ بيها علي النضافة
والي لقاء
سلك