اكتلوا الزول الكتل الكلب
في السلك
بابكر سلك
اكتلوا الزول الكتل الكلب
*طبعا تقريبا كلنا سمعنا بقصة الزول الكتل الكلب
*بالنسبة للناس الما سمعوا بالقصة نختصرها ليهم
*قالوا في زول كتل كلب ناس كده
*أها الناس ديل كلموا أبوهم
*قالوا ليهو يابا في زول كتل كلبنا
*أبوهم قال ليهم اكتلوا الزول الكتل الكلب
*قالوا أبونا ده ببالغ
*معقولة نكتل زول عشان كلب!
*وصهينوا على كده
*بعد فترة جوا حرامية سرقوا بهائم الجماعة ديل
*قاموا كلموا أبوهم
*يابا في حرامية سرقوا بهايمنا
*أبوهم قال ليهم اكتلوا الزول الكتل الكلب
*طلعوا من أبوهم وهم مقتنعين بأنو أبوهم خرّف
*زول يقولوا ليهو الحرامية سرقوا بهمنا
*يكمل فهمنا
*ويقول لينا اكتلوا الزول الكتل الكلب؟
*أسى الدخل الزول الكتل الكلب في سرقة البهايم شنو؟؟؟؟
*وبعد فترة في ناس خطفوا أخت الجماعة ديل
*مشوا لأبوهم وكلموه
*قال ليهم اكتلوا الزول الكتل الكلب
*طلعوا من أبوهم وقالوا أبونا مصرّ على عبارة اكتلوا الزول الكتل الكلب
*كدي تعالوا نجرب كلامو ده
*وكتلوا الزول الكتل الكلب
*تاني يوم لقوا بهايمهم جوه الزريبة بالزيادة كمان
*الحرامية قالوا ناس بكتلوا زول في كلب !!!!!
*أمال في بهايم يعملوا شنو
*اليوم البعدو الجماعة الخطفوا البت رجعوها وطلبوها لزعيم قبيلتهم على سنة الله ورسوله
*لأنهم قالوا ناس بكتلوا زول في كلب
*حا يعملوا شنو في ناس خطفوا بتهم؟؟؟؟
*أها
*القصة دي راودتني وأنا أسمع ما يدور حول التجديد والتمديد لتيري
*لكن بيني وبينكم
*لو كتلنا الزول الكتل الكلب
*تفتكروا التفاوض مع تيري كان وصل للمرحلة دي؟؟؟
*قلنا ليكم الكبير كبير
*والنادي الكبير أكبر من الجميع
*النادي الكبير بكتل الزول الكتل الكلب
*المهم
*أمس حوالي إتنين مليون دولار على أرض ملعب دار الرياضة أم درمان تبعثرت تحت أقدام أولاد القضارف
*وتم ضبط الدولارات كمعروضات بأمر الشرطة
*لازم يودوها المعامل الجنائية للفحص
*يمكن مزورة لا سمح الله
*إتنين مليون دولار تنهار أمام حفنة من الجنيهات الوطنية؟؟؟
*قلت لي يا روشا الغربال بقريب مليون دولار والجديد المسك الحكم بتمنمية ألف دولار؟؟؟
*إتدلري
*الحقي يا فطومة
*نقيط السنة دي كمل صهريجكم
*أيها الناس
*شفنا مباراة الأهلي المصري الأولى في كأس العالم للأندية
*ما عارف ليه اتذكرت تلك المقولة
*نشرب البحر جوووووووت
*ونبولوا فووووووووو
*وحدس ما حدث
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*نرجف قبل البرد يجينا
*مكندكين قبل الكتاحة الفينا
*مفلسين والواقع بضحك علينا
*وسنعبر بالتأكيد قالوا لينا
سلك كهربا
ننساك كيف والكلب قال إنتوا بتصدقوا أي كلام يتقال ليكم؟؟؟؟.
وإلى لقاء
اها يا عمك تنقو ايه رايك في صهريجكم ابو مويه حلوه الجبتوه للنجيله باقي ليك فيه جردل من نقيطكم ولا كمل قبل ما النجيله تقوم ههههههه اتنقطي واكتلو الزول الكتل الكلب
يا سلك البحر ما (بنشربو شوووووووووووت لكن بنبقه بق بق بق بق بق هههههههه ونبولو شوووووووووووووووو) ضحكتنا يا أبو السلوك مع الدولار المطلع عينا ده أنا ما عارف الناس ديل بلقوهو وين؟؟؟؟!!!!
هههههههههههههههه الدولارات الكشحت امبارح لقطوها الأولاد قال تيري قال ههههههههههههااااااااااااااااااااااااااي
الظاهر عمك تنقو نسي التلاتة مليون دولار من الخزينة العامة الضاعت في وارقو وكمان معاها ملايين الحضرى. الاختشوا ماتوا ياعم تنقو!!!
استاذ سلك طبعا نحن فاهمين ان فرق الدوري السوداني تطورت وأصبح الفوز عليها يتطلب بذل واحترام لذلك ممكن اليوم المريخ يتعادل او بخير او يفوز ولا غرابة في ذلك وطبعا دا في مصلحة الكورة عامة وتطورها لكن مين يفنع الفراعنة ناس الجديد شديد وعارضين بالشرفي الباذخ ابوناصر وقالوا يا دنيا ما فيك الا الهلال وصابنها يزبد ويرغي ويرعب ويهدد في افريقيا عامة ما السودان فقط وانه عندهم ٣ اقوان قبل الكورة ما تبدأ وتاني ما فريق يقيف امام ابوالهل… سبحان الله اخدوا علقة رباعية من سيمبا ومازيمبي غشاهم غسة عصام الدحيش لبازي الذي ذرف الدمع حارا…يا أخي متى يترك الرشاشات النفخ وفريقهم يحتاج ثقافة احترام الآخر مش كان دعمهم آل الشيخ هههه جيبوا الشيخ يقرأ لي دولار سجل لي غربال ههههه وانت يا شداد عطل لي رمضان مع رشبد وخميس اشطب المريخ ريح لي بالي… الهلالاب مشغولين بالمريخ قبل المجموعات والمريخ يمشي والكلاب تنبح.
صهريجنا نقطت عشان تسقي يباس دار الغبار و لكن صهريجكم مالو بتنقط بالغلط، ما اولى بيهو ناس البيت الهجروه على الاقل تستفيدوا من تيري الطير نومكم.
و سؤال بريء: الزول داااك جايييكم و لا تقعدوا مكلكلين كده؟!!!!!