الاحداثيات اترفعت غلط!!

صَابِنّها
محمد عبد الماجد

الاحداثيات اترفعت غلط!!

الزول وقت يكون عنده نقص في الأفراح، لو لقى ليه (دومة) بفرح بيها، بشيلها وبتكسر بيها في ضل.
على أيّامنا من (كَدّ) وجد، هسع الحاصل شنو؟ ما عارف.
في حاجات اِتغَيّرَت.
زمان كان على قدرنا.. نجيب اللبن بالبستلة.. الحِلة كلها تشرب شاي بي لبن.
هسع اللبن بقوا يجيبوه زي (العينة)، كأنه نتيجة فحص.
قبل الحرب، أيِّ زول تسأل منو.. يقولوا ليك عرسه يوم الخميس.
هسع أيِّ زول تسأل منو، يقولوا ليك مات.
او مسافر الخميس القادم.
الحاصل شنو يا جماعة.
عشان كدا بقينا ما بنسأل من زول.
بقينا نخاف.
زمان ـ قبل الحرب، ما زمان بعيد، ضُل المقيل تقعد فيه 8 ساعات، هسع ضُل المقيل قبل ما تقعد فيه بروح.
عليكم الله في زول بسمع بي (ضُل المقيل) الأيامات دي.
كنا مبسوطين.. نلعب قدام البيوت، أيِّ بيت كان قدامه في فسحة.
الفسحات دي مشت وين؟
في حاجات اختفت.
الشاي بالزلابية.
الشاي باللبن.
شاي الصباح ذاتو قرّب يختفي.
كدى هسع خلونا في (الدوم)، ما تطلِّعونا برّه الموضوع.
نرجع.
كانت ثقافتنا محدودة.. فاكرين (الدوم) مرحلة من مراحل (البصل) المتقدمة.
قمة تجلينا ـ لمن يجيبوا ليك الغداء ، وتقول ليهم : قطعوا لينا معاه بصلة.
كدا انت اتقطعت.
كنا فاكرين (آلبرت اينشتاين) واضع النظرية النسبية وأبو الفيزياء الحديثة نوعاً من إسبيرات العربات اليابانية.. أي (اينتش) بنعتقد عنده علاقة باليابان.
مرات بتصنع ليك علاقات من رأسك وبتحاول تقنع بيها الناس.
نحن كنا في غاية البساطة، الخميس لو وقع عُطلة رسمية الفرحة بتكتلنا.
ما عاوزين أكتر من كدا.. عاوزين بس نجمع الخميس والجمعة.
كباية اللبن الكبيرة، منتهى الإبداع، ما كنا عاوزين حاجة كبيرة.
ولا بنفكِّر في (الهجرة).
نمشي نلقى الكوبري فاتح، غاية الآمال.. لمن تخش صالون حلاقة وتلقى ما في زول قِدّامك بتعتبر نفسك محظوظ.. دا كان نوع من السعادة الغامرة.
اللوتري حقنا كان نحضر لينا حفلة في قاعة الصداقة.
نحضر حفلة لمحمد الأمين في نادي الضباط، بقميص مكوي مكوة فحم.
مكوة (مويس).
لغاية الآن ما عارف ليه ربطنا أغنيات محمد الأمين بالقمصان المكوية بمكوة فحم.
القمصان المكوية بمكوة فحم كنا بنلبسها في حالتين.. يا لحفلات محمد الأمين أو لتمارين الهلال.
كنا بنكتفي بتمارين الهلال، مباريات الهلال كنا بنشوفها كتيرة علينا، احتراماً ليها كنا بنحضر مباريات الهلال في الإذاعة.
الرشيد بدوي عبيد قبل الديجتال وتقنية الفيديو (الفأر) كان بجيب لينا الصورة بالإعادة.
إنت قاعد قدام الراديو بتعرف الكورة ضربة جزاء أم لا.
في الراديو بتعرف الهدف صحيح أم تسلل؟
كنا مجانين كلما كان الموضوع أو المشوار مهماً، كلما ظهر ذلك في مكوة القميص.
زي نظرية (النسبية) بتاعة اينشتاين.
والله ـ ودي شئ أحلف عليها نظرية النسبية ما عندها علاقة بالموضوع.
مكوة الفحم!!
ولا مكوة الفحم.
ما عارف ليه الليلة مُركِّز في مكوة الفحم؟
يا ربي الموضوع عندو علاقة بتأهُّـل السودان إلى نهائيات الأمم الأفريقية في المغرب.
يمكن دا جن مني ساكت.. ويمكن شعور بالسعادة.
لمن تكون فرحان بتفتح الشباك، أو من غير ما تشعر بتلقى نفسك عاينت في شاشة التلفون.
ما عارف علاقة فتح الشباك بالسعادة شنو؟
نحن قادرين نشعر بالسعادة حتى ونحن في هذه الظروف.
حتي والشباك مقفول.
معلق مباراة السودان وأنغولا المصري الرائع علي محمد علي كان يتحدّث عن عودة المنتخبات والأندية السودانية لكي تلعب في ملاعبها بالسودان وفي أم درمان (الحنينة) تحديداً.. علي محمد علي ما عارف أننا في هذا الوقت ما عاوزين أكتر من نرجع إلى بيوتنا.
خليها (الملاعب).. عاوزين نرجع (بيوتنا).
نحن برّه بيوتنا.. تفتكروا تفرق معانا الملاعب.
الملاعب ملحوقة.
المهم قادرين نتوافق مع كل الظروف.
قادرين نصنع المعجزة في أيِّ وقت.
الله يلعن الحرب والله من هنا لي بكرة يلعن من كان سبباً فيها.
وعلى كلٍّ نحن في هذه الظروف، قادرين نفرح وننبسط، وننتصر ونمد لسانا كمان سخرية من الأحداث.
قادرين نعيش السعادة بكل تفاصيلها.
نقع ونقوم.
نسمع صديق أحمد أو صديق عباس، نشعر بالشبع.
نشعر بالعزة والكبرياء.
ما كنا عاوزين حاجة كتيرة.
كفاية علينا كباية شاي بملعقة سُكّر زيادة.
ما عاوزين أكتر من كدا.. ما عاوزين أكتر من ملعقة سُكّر زيادة.
هذا ليس اضمحلالاً في الطموح.. طموحاتنا دائماً مُعلّقة في الثريا، بس حاجات الدنيا دي زي ما تقول كدا بقى عندنا فيها زهد.
كفاية ملعقة سُكّر.
بقي عندنا (فلسفة).. والفلسفة دي عادي ممكن تقلب الطحنية (شوربة حمام).
منطق!!
جيب ليك ربطة حطب، وشوية دقيق، وحَلة عدس، ممكن بهذه المكونات تعمل (سمك).
منطق!!
تمشي أم درمان عن طريق كوبري شندي – المتمة وإنت عينك في كوبري النيل الأزرق.
منطق!!
المنطق يعمل أيِّ حاجة.
الفاشر ذنبها شنو عشان تعيش في حالة حرب؟!
مدني.
مدني مالها؟!
الهلالية.. عملت شنو عشان الموت فيها يبقى بهذا الإسراف؟!
نيالا.
والجنينة.
وسط كل هذا الركام ـ تأهّل السودان ووصل لنهائيات الأمم الأفريقية في المغرب.
فشلنا في التأهُّـل في ظروف أفضل 25 مرة.. وفي ظروف الحرب وفي ظل هذه الأوضاع تأهّـلنا إلى نهائيات الأمم الأفريقية، وهذا تأكيدٌ على أن الظروف الصعبة والمعيقات يجب أن لا تكون مُبرِّراً للفشل.
بل إنّ الصعوبات في أحيان كثيرة تبقى محفزاً ودافعاً للنجاح.
منطق!!
حضرت المباراة.
الشوط الأول ما كنت فاهم حاجة.. ولمن ما أفهم شئ بعمل فيها فاهم أي حاجة.
عارف كل شئ.
طبعنا كلنا كدا.
الشوط التاني بديت أفهم شئ.
المباراة وقعت لي.
لكن الشئ الحيّرنا في المباراة، بوغبا عنده كورة دقّــت في العارضة.. قلت عادي في كأس العالم بتحصل.
قام في نفس اللحظة روفا دقّــت كورتو في العارضة، وفي نفس الحِتة.
معقولة دي تكون صدفة.
روفا دا بكون قاصدها.
الزول دا ما بعمل حاجة ساكت.
منطق!!
يا كمان الجماعة ديل (الاحداثيات) اترفعت ليهم غلط!!
كورة روفا زي القميص المكوي مكوة مويس.
مدافع أنغولا من البعمل فيه روفا بلع صرتو.
دي أول مرة تحصل في مباراة كرة قدم.
منطق!!
في ناس عندها انتقادات جاهزة، عندها انطباعات ما بتقدر تغيِّرها.
أي واحد عاوز ينتقد أبوعشرين.. دا بقى فهم أو موضة.
حتى في عدم مشاركة أبوعشرين، في ناس بنتقدوا في أبوعشرين.
بالمناسبة، المنتخب السوداني آخر بطولة أمم أفريقيا شارك فيها، كان لأبي عشرين دورٌ كبيرٌ في وصول السودان للنهائيات، زي ما كان لمحمد المصطفى دورٌ كبيرٌ في تأهُّل السودان هذه المرة للنهائيات.
محمد المصطفى هو أفضل حارس في التصفيات الأفريقية في اعتقادي، وتميز مصطفى لا يعني التقليل من أبوعشرين.
أبوعشرين حارسٌ كبيرٌ، ومنافسة محمد المصطفى، له سببٌ من أسباب تألق الأخير.
بعد الحملة على، أبوعشرين، هناك حملة أخرى على صلاح عادل.
صلاح عادل كان من نجوم المباراة.. إرنق النجم الأول للمباراة، ويأتي بعده صلاح عادل وروفا وأبو عاقلة ورمضان وبوغبا والغربال ومصطفى وكوكو، في النجومية.
حقيقة كلهم كانوا نجوماً، لكن صلاح عادل تميّز لأنّه كان مُكلّفاً بمهام خاصة، وكان سبباً من أسباب تأهُّل السودان للنهائيات بما قدّمه (اللورد) في هذه المباراة.
المباراة أمام أنغولا عموماً كانت رائعة، والمنتخب الأنغولي للأمانة لعب مباراة كبيرة، تأهُّله للنهائيات كان مرتبطاً بنتيجة هذه المباراة.
المنتخب الأنغولي من أفضل المنتخبات الأفريقية، وهو مرشحٌ للقب بهذا المستوى الذي يقدمه.
السودان أيضاً بهذا المستوى مرشحٌ لجائزة أفضل منتخب في عام 2024، ينتطر منه أن يحقق نتائج جيدة في النهائيات.
ننتطر أن يقول المنتخب السوداني كلمته في النهائيات بالمغرب، خاصةً أنّ المنتخب السوداني يتصدر مجموعته في تصفيات كأس العالم، التي تضم إلى جانبه السنغال والكنغو وتوغو.
عموماً، المرحلة القادمة أو الأيام الآتية سوف يكون أمام المنتخب وأمام الهلال تحديات كبيرة.
المنتخب سوف يستفيد كثيراً من لاعبي الهلال بسبب التحديات التي تنتظر الهلال في البطولة الأفريقية، كما أن الهلال سوف يستفيد من المنتخب الوطني والمرحلة التي وصل إليها في نهائيات الأمم الأفريقية وفي تصفيات كأس العالم.
خطوات الهلال دائماً تتوافق مع خطوات المنتخب، لهذا فإنّ نجاح الهلال هو نجاحٌ للمنتخب والعكس صحيح.
من لاعبي المريخ شارك مع المنتخب فقط قائد المنتخب رمضان عحب وأحياناً يشارك طبنجة، وقد يكون ذلك بسبب (الراحة) التي ظل مدرب المريخ الإيطالي يمنحها للاعبين.
عندما كان لاعبو المريخ في الراحة، كان لاعبو الهلال يشاركون مع الهلال في الدوري، وكان نتيجة لهذه المشاركة اختيار الطيب عبد الرازق وعبد الرؤوف الذي كان مصاباً وجهّزه الهلال للمنتخب من خلال مشاركته مع فريقه في الدوري الموريتاني عندما كان المريخ في الراحة، ليشارك روفا مع المنتخب أمام أنغولا ويكون من نجوم المباراة.
برضو منطق.
نرجع لمكوة الفحم إلّا ما في داعي؟
غايتو إنتو أصلو الواحد ما يشاوركم.
…
متاريس
أبوعاقلة عاوز ليه عمود براهو.. نتمنى التوفيق له في تجربته الاحترافية الجديدة بليبيا.
ومحمد المصطفى حارس المنتخب برضو عاوز ليه عمود براه.
بنرجع ليهم إن شاء الله.
رهاني على الهلال في المجموعات هذه المرة إنّه إن شاء الله لن يخسر ولا مباراة.
إذا كان كوليبالي مصاباً.. أتمنى عدم المجازفة به أمام يانغ افريكا.
يجب المحافظة على كوليبالي وإراحته بشكل تام.
حافظوا على كوليبالي لقادم المباريات.
الأكيد أنّ الهلال لن يخسر إن شاء الله أمام يانغا.
عشمانين عديل في الانتصار.
التعادل مكسب ليانغا.
منطق.
ياسر عوض جوباك، هذا اللاعب مكانه المنتخب.
أكيد كواسي أبياه ما شافو.
الهلال كسب لاعباً.. ما شاء الله.
أتمنى مشاركة جوباك كلاعب أساسي أمام يانغا.
لاعب قوي وسريع وهدّاف ومقاتل وموهوب.
جوباك فيه كل المواصفات الجيدة.
جوباك برضو عاوز ليه عمود.
ما شاء الله عليه.
في يناير القادم الهلال عاوز إضافات محدودة.. ويبقى الهلال في حِتة تانية.
أطراف الهلال شمال ويمين محتاجة لإضافات.. هل تتخيّل أنّ أطراف الهلال يلعب فيها 4 عناصر فقط.
أيِّ طرف يجب أن يكون فيه على الأقل ثلاثة لاعبين.
في التسجيلات القادمة يجب أن يركز الهلال على إضافات (وطنية).
يبدو أنّ الهلال لا يحتاج إلى محترف.
إلا إذا كان هناك مهاجمٌ أجنبي على مستوى.
مهاجم يُساعد على تحقيق لقب الأميرة السمراء.
إذا كنا نبحث عن اللقب جيبوا لينا مهاجم أجنبي يكسر الدنيا.
اتمنى أن أشاهد محمد المصطفى في الهلال.
هاشتاق لوجود هذا اللاعب في الهلال.
العليقي الموضوع دا ما صعب عليه.
والسوباط، جمهور الهلال لو طلب لبن الطير بجيبو ليهم.
عاوزين محمد المصطفى في الهلال.
مصطفى هو الحارس الأفضل في أفريقيا الآن.
…
ترس أخير: المكوة شالت القميص!!!!