الاهلي المصري من بايرن ميونخ وبالميراس البرازيلي للمريخ

صابنها

محمد عبد الماجد

الاهلي المصري من بايرن ميونخ وبالميراس البرازيلي للمريخ

• عندما تمر بشارع الموردة في طريقك الى البوستة او في طريقك الى الخرطوم ، تشم (رائحة السمك) ، حتى انك تتهيب من ان تخنقك (شوكة) ، وانت ليس لك من (السمك) غير رائحته.
• كنا نركب بص ام درمان – بلونه الاخضر – وشبابيكه المفتحة ، وسواقه الذي لا يطيق احد.
• عندما جاء الينا ونحن نقعد في مقاعد خليفة (الكمساري) وهو يطقطق لاستخلاص (تعريفة) الراكب ، استخلص منّا الكمساري ايضا حق (ريحة السمك).
• حق البص.
• وحق السمك.
• وانت في البص بتشوف ليك (شافع) ماسك امو وقاطع الشارع.
• بتشوف عمة وجلابية.
• وتوب.
• بتحس في شارع الموردة بالاصالة وعشرة الايام وعوض احمد خليفة وليلي المغربي وشمس الدين ابو شلة وهاشم صديق ومحمد حامد الجزولي والجقر وحسن حامد.
• وانت في (البص) حتى وقتنا هذا بتشعر بعشق الموردة في كتابات محمد عمر الامين.
• محمد عمر الامين زول كله (موردة).
• طيبته.
• وبساطته.
• وحبه للناس.
• وثقافته.
• وعشقه للموردة الذي لا يجاريه فيها احد.
• اخر مرة التقينا فيها بالاستاذ محمد عمر الامين كان في احتفال الموردة ومهرجانها الذي اقامته بسبب عودتها للدوري الممتاز.
• محمد عمر الامين كان فرحان وسعيد بالعودة اكتر من (الموردة) نفسها – فهو (الموردة) نفسها ، جاء للاحتفال برفقة طفله وكأنه (عريس) في ليلة عرسه.
• لا بد ان هبوط الموردة من الدوري الممتاز جعل اوجاعه واحزانه تكبر – فقد رحل محمد عمر الامين رحمة الله عليه قبل ان يشهد عودة الموردة مرة اخرى للدوري الممتاز.
• غادر في هدوء والموردة بعيدة عن الممتاز.
• تبقى الاشياء التى لها علاقة بالموردة دائما اصيلة وعريقة ومن صلب هذه البلد ومن مكوناتها الاجتماعية والطبيعية.
• محمد عمر الامين كان في الصحافة الرياضية بهذه الاصالة لم نعرف عنه تعصب (الهلالاب) ولا عدم حياد المريخاب.
• محمد عمر الامين كان (الموردة) وهذا وحده يكفي ليجعله بتلك (الوسطية) و (الاريحية).
• كان مثل شارع الموردة – تقيف فيه تلقى اي شيء.
• لو ما عندك قرش – تشبع من ريحة السمك.
• كان قلم بسخرية اولاد الموردة اللطيفة – كلماته الانيقة التى تشبه شباب اناقة عصاري الموردة – عندما يتبادل اهاليها الزيارات.
• كان راضى ، ومقتنع ان الموردة افضل من الريال وبرشلونة وليفربول.
• نسأل الله الرحمة والمغفرة لابن الموردة وقلمها الانيق محمد عمر الامين – كما نسأل الله الرحمة لاستاذنا عوض ابشر – اشهر اقلام الموردة الذي عرف بحبه للهلال.
• ولا ننسى محمد احمد دسوقي احد ابناء الموردة – والذي يجمع بين الهلال والموردة في العشق والهوى.
• دائما اقول ان الهلال والموردة يجمعهم الكثير من الحب والهوى والمصير المشترك.
• نحن من غير ما نشعر بنلقى نفسنا في الدرب الذي يؤدي الى الموردة.
• في حاجة بتجذبنا الى الموردة.
• وتاني.
• وتاني.
• عاوزين نشوف الموردة في الدوري الممتاز.
• دوري بدون (موردة) لا دوري ممتاز ولا عندو علاقة بالممتاز.
• سوف يبقى محمد عمر الامين – وسوف يظل في قلوبنا الى ان نلحق به – وكلنا على الدرب سائرون.
• نخرج من (فقه) هذه الاحزان.
• ونطلع لي برة.
• رغم ان الخروج صعب.
• لكن هذه هي طبيعة الحياة.
• محمد عمر الامين عندما فكر في الهجرة والمغادرة الى الامارات كانت لنا هجرته تلك صعبة.
• كيف يبقى حالنا الآن اذا كانت مغادرة محمد عمر الامين هي المغادرة الاخيرة.
• مغادرة بدون عودة.
• اللهم ارحمه واغفر له.
• ولا حول ولا قوة إلّا بالله.
• ….
• عودة الى استديوهاتنا (الطبيعية).
• في جنوب افريقيا استعدادات الهلال ومعنويات اللاعبين تبدو مبشرة.
• مرات في نتائج مباريات بتعرفها من (صور التمارين).
• الانتصار بكون ظاهر.
• والهلال ان شاءالله من جنوب افريقيا يرجع لينا بي حاجة كبيرة.
• انتصار.
• او تعادل – ما في مشكلة.
• لكن نحن عاوزين (انتصار) عديل كدا.
• الهلال سافر من وقت مبكر – واظنه اعتاد على الاجواء في جنوب افريقيا ، لذلك يتوقع منه نتيجة جيدة.
• الهلال عندما يلعب في ملعب جيد ويلقى تحكيم عادل – لو قابلنا مانشيستر سيتي ذاتو ما بنسأل فيه.
• ولا بنقيف عندو.
• الطقس في جنوب افريقيا هذه الايام ايضا ممتاز.
• والمباراة سوف يديرها الحكم المصري جهاد ابوجريشة وهو حكم جيد.
• يعني ما عندنا اي مشكلة.
• قالوا ليك الجامايكي الفيس جنوب افريقيا كلها بتتكلم عنه.
• ومحمد عبدالرحمن الغربال اينما ذهب – اشاع الرعب والخوف.
• الغربال شهرته غطت افريقيا كلها ، واصبح وجوده في مجاهلها واحراشها وادغالها مثل وجودوه في بري واللاماب وتوتي.
• الغربال شهرته هناك اكبر من شهرته في ام درمان.
• الهلال ما عندو مشكلة في جنوب افريقيا.
• وما عندو مشكلة مع مازيمبي.
• المشكلة عند جماعتنا ديل.
• الاهلي المصري لعب مع بايرن ميونخ.
• ولعب مع بالميراس.
• وح يلعب المباراة القادمة مع المريخ.
• من بطولة كاس العالم للاندية لمواجهة المريخ في مرحلة المجموعات في القاهرة.
• ثالث العالم سوف يواجه المريخ الذي خرج من التمهيدي في المواسم الماضية ثلاث مرات على التوالي.
• عليكم الله هسع القاهرة في (البرد) دا الزول لو خدروه بمشي عليها.
• لو ربطوه.
• في زول بمشي القاهرة في (المطرة) دي.
• ويا ريت لو بقت على (البرد).
• ويا ريت لو بقت على (المطر).
• الموضوع اكبر من كدا.
• مشكلة القاهرة ما في البرد والمطر بس.
• مشكلة القاهرة في (لاهلي).
• البرد ممكن تقدروا عليه بـ (البطاطين) و (السيوترات).
• المطر ممكن تقدروا عليه بالشمسيات والقعاد في البيت.
• لكن (الاهلي) دا تقدروا عليه كيف؟
• دا لا بطاطين ولا شمسيات ما بتثبتوا.
• وناس صلاح نمر وقت يقولوا ليهم الاهلي المصري ثالث العالم – القاهرة بتبقى ليهم اضيق من خرم الابرة.
• والله ما بعرف يمشي وين؟
• مصر كلها الايامات دي بتتكلم عن الاهلي.
• فريق غلب ليه فريق برازيلي – ح تعملوا معاه شنو؟
• والله لو عندكم طريقة (زوغة) احسن تعملوها من الآن.
• شوفوا ليكم (مراقة).
• شوفوا ليكم فحص كورونا (ضارب).
• يمكن يمرقكم.
• يعتبروكم مهزومون 0 / 2.
• احسن ليكم من تتغلبوا 5.
• وانتوا متعودين على ذلك.
• المباراة ذاتها يمكن تتحول الى الجبل الاخضر.
• معقولة يبقى عليكم برد ومطر واهلي.
• دي كتيرة عليكم.
• صلاح نمر (البرد) براهو ممكن يجهجهو ليكم.
• عاوزين تلموهم عليه الثلاثة.
• …………
متاريس
• بكرة السبت.
• وان شاءالله السبت (ازرق) عديل كدا.
• نحسم موضوع التأهل لمرحلة المجموعات من جنوب افريقيا.
• جنوب افريقيا دائما فال خير للهلال.
• الدوري الممتاز اعد القمة جيد لمباريات المجموعات.
• رغم ان القمة بتعاني من مشاكل بدنية.
• لكن مع (كورونا) العالم كله بعاني بدنيا.
• ………
• ترس اخير : بكرة الفرح عصراوي.