البومة والرقم (١٣)
في السلك
بابكر سلك
البومة والرقم (١٣)
ـ من خلق الله خلق الدنيا دي.
ـ الناس بين تشاؤم وتفؤل.
ـ الفراعنة كانوا بقدموا أجمل بنات الحلة هدية للنيل إنطلاقا من ذلك الفهم.
ـ وجدودنا زمان.
ـ والكلب الأسود شوم.
ـ المرأة لو براها راكبة عربية مع زول او ضمن ناس.
ـ بقولو عارض.
ـ عشان كدة كتير من السواقين… بالذات سواقين الخلا بختو حجر في العربية بفك عارض المرة.
ـ البومة في السودان شوم الشوم زاتو.
ـ وفي انجلترا مدعاة للتفاؤل.
ـ ورغم ان الاديان اتت بما يحارب تلك الفكرة.
ـ الا انها لا تزال تعشعش بعقول ملايين الناس في العالم.
ـ الرقم ١٣ رقم شوم عند أهل شرق الدنيا.
ـ وهو نفسه رقم فال عند غيرهم من الخواجات.
ـ المهم.
ـ يوم ١٣ الجاري بومة بي جاي وفال بي هناك.
ـ اصلوا اهل المريخ كواقع انقسموا بين بي جاي وبهناك.
ـ قسم يرى ان يوم ١٣ الجاري هو يوم الخلاص.
ـ يوم الفال.
ـ اليوم الدايرنو ليك.
ـ والجزء التاني بشوف يوم ١٣ شوم على منو؟.
ـ شوم بالنسبة ليك.
ـ لكن بالنسبة لينا ( لينا دي ترجع لأصحاب الجزء) هو يوم النصر الكبير.
ـ ايها الناس.
ـ الفيفا اظنها ايام حركات الجيش اعملها سر الختم.
ـ لم تعترف الا بمعتصم جعفر.
ـ لانه الشرعي المنتخب.
ـ والفيفا ياها الفيفا.
ـ لا خفيفة ولا لفيفة.
ـ واظن ان اخر قراراتها في شأننا كان.
ـ ( ما بخسنا).
ـ عليه.
ـ ننتظر يوم ١٣ الذي نتوقعه يوما حاسما لكثير من الجدل وبعض الجدال.
ـ وبالتأكيد سيكون يوما بومة منططة عيونها على قسم.
ـ وستكون بومة مصدر فال على القسم الاخر.
ـ في الحالتين بومة.
ـ المهم.
ـ قصر الأخ الناجي في عمله كمدير للاستاد الساعة سبعة.
ـ سبعة وربع كان مواطنا عاديا.
ـ ده شكل حاسم من أشكال الإدارة.
ـ مفروض الحال يكون كدة.
ـ مش تقصر وقاعد في منصبك سنين وسنين كان الله لم يخلق سواكا.
ـ سواكا دي في ناس حا يقروها سوداكال.
ـ غايتو جنس غايتو.
ـ المهم.
ـ ناس كتار يحاربون برقو ( الكوز) ويطلبون بابعاد الكيزان.
ـ هذا الطلب لا يشمل جميع الكيزان.
ـ احترنا في المعيار والمكيال البشتغل بيهو أنصار ذلك الرأي.
ـ ولكن ان الأوان لنلتف حول المنتخب للاستحقاقات القادمة.
ـ ونحن بنلعب للسودان.
ـ لا لجماعة ولا لفلان.
ـ ايها الناس.
ـ ان تنصروا الله ينصركم.
ـ اها.
ـ نجي لي شمارات والي الخرتوم.
ـ معقولة يا والينا.
ـ بعد دا كلو ما عرفتو منو فض الاعتصام؟؟؟؟؟.
سلك كهربا
ننساك كيف والكلب قال اذا اختلف اللصان ظهر المسروق…. حا نعرف منو العمل العملة المهببة دي ومنو الكان عارف وسكت ومن الكان عارف ووافق.
والي لقاء
سلك.
لا جديد
إنتوا المرخرخين يا عمك تنقو ماعندكم مشكلة كوز ولا جك يتعين في حفرتكم، إنتوا ناس ملحسة وأهم شئ عندكم صاحب الجيب الكبير البكب ليكم قروش الشعب في الحفرة رب رب رب، وإنتوا مستعدين في سبيل ذلك تجيبوا إبليس ذات نفسه رئيس للمرخرخ !!
أعمدة كتاب الإعلام المرخرخ السالب كلها بعام وبوم وسحالي وشنو داك ما عارف، وليهم حق طالما البعام والبوم المستعار تلقاهوا راكي في كل حتة 😆😆😆