البياع الشاطر!
العمود الحر
عبدالعزيز المازري
البياع الشاطر!
*البياع الشاطر زول بتحمل المسؤولية كاملة من البيعة بربحها وخسارتها دون ان يتذمر
*العليقي دا بياع شاطر جد احتكر الشغلة كلها في فترة وجيزة وأصبح اسم يردده الهلالاب في كل مكان
*رغم عدم ظهوره في الوسائط الإعلامية لكن اعماله تتحدث والفتي عاشق متيم بحب الأزرق
*هو من النوع البدس بضاعتو وبعرف يطلعها في الوقت المحدد الذي يريده ربما ليرتفع سعرها او لتزايد الطلب عليها وكلها وارد في عالم التجارة
*ترأس العليقي القطاع الرياضي في الهلال ولم نعد نسمع غير صفقات كبيرة ابرمت واموال دفعت دون وجود لأي سمسرة في منتصف الطريق وهذا ما يفعله التاجر الشاطر
*يعني العليقي دا بتعامل بالجملة ما شغل كيري ساي زي الجماعة الطيبين ..ناس الهلال عليهم ان يحمدوا الله كثيرا فالرجل يدير ميركانو التسجيلات الهلالية بكل حرفية
*صحيح ان العليقي (زود ) القصة حبتين حتي علي الالية الإعلامية للمجلس فقد أصبحت هي الأخرى مثل تجار القطاعي تبحث عن الاخبار شأنها شأن الصحف اليومية الرياضية
*كل الفرق بما فيها الوصيف قفلت وعرشت واشترت بضاعتها بل وعرضتها حتي تعرضت للسيول والامطار! لكن صاحبنا دا مقفل البضاعة وارد بلدها حتي الان وشغال يطلع في المحترفين بالقطارة مرة سوداني ومرة محترف اجنبي
*الصحافة الافريقية نفسها بما فيها صحافة المغرب وغيرها انشغلت بتسجيلات الهلال وعرض الهلال الخرافي لشراء اكسيل ماي ! إكسيل المدلع !
*البضاعة من المحترفين التي اتي بها التاجر الشاطر العليقي مرضية جدا للمستهلك الهلالي وغير مرضية ولا يطاق طعمها لدي اخوتنا في الوصيف الخفيف
*يسارع اهل الوصيف عبر إعلامهم لتبخيس صفقات الهلال وبضاعة العليقي التي استجلبها وهذا فئة محددة بينما اهل المنطق من المريخاب راحوا في توجيه اللوم لحازم الحاسم وعنفوه علي شراء بضاعة رخيصة مثل كل عام متوفرة في الأسواق والغالي بغلاتو يضوقك حلاتو
*الجابري عندو اغنية بتقول( اخت اللوم على نفسي… ولا اتحسر على عمري… والا الوم حنيني الراح)..
*الهلالاب السنة دي سقف الطموح ارتفع شديد خالص خالص …والسبب بقي عندهم ماستر كارد للتعامل مع السوق العالمية ..سمحة المقدرة محطات تمشي ومحطات تفوت
*التاجر الشاطر العليقي قال ببني في فريق لينافس علي السوبر ليق الافريقي يعني الشغل بقي ما محلي ودي نظرة كبيرة للدخول للسوق الافريقية ومن ثم العالمية ..
*فلوران كمان مدير شاطر ومدير ولا فيهو شق ولا طق ..الجماعة جابوا حارس كده وارد نيجيريا وصاحبنا اجتاز الكشف الطبي وحتي العقد زاتو اتكتب !! يقوم فلوران من علي البعد يوقف الصفقة ويرد البضاعة ..العليقي بذات شحمو ولحمو ماقدر يقول حاجه مش فلوران المدير
*وكيل لاعبين مشهور جدا بتعامل مع فلوران قال اهم مواصفات فلوران اللاعب لازم يكون بنية جسمانية ومهارة كروية !! يعني القصار ديل الا يعملوا تمارين استطالة لان هلال السوبر القادم حيكون شكل اخر
*ماعلينا صابرين ومنتظرين !! والبضاعة مصيرها ان تعرض في متجر الهلال ويا العليقي بلاش احتكار
*كلمة حرة أخيرة …الهلال السنة دي غير …
كلمات حرة
*جاء في الاخبار المتداولة ان الهلال يخطط لدعوة ثلاثة فرق افريقية قبل منازلة الاثيوبي حسب طلب الداهية فلوران
*فلوران اختار السودان للمعسكر واثبت الرجل انه صاحب نظرة كبيرة لا مثل غيره من المدربين الذين همهم معسكرات سياحية خارجية
*جماهير الهلال من اجل إنجاح مشروع العليقي لقيادة الهلال للسوبر الافريقي عليهم الصبر فالفرصة باتت اقرب بكثير من السابق
*غياب الغربال عن اولي مواجهات الهلال الافريقية خسارة كبيرة للهلال لكنها درس للغربال نفسه فقد كانت فرصة كبيرة للغربال للظهور وكسب تقييم كبير من المدرب
*يعول الجمهور الهلالي علي خط الهجوم الهلالي بقيادة الشعلة بجانب المحترفين ليكون رأس رمح الأزرق وما خاب من راهن علي الشعلة
*متي يعلن الهلال عن صفقة ولدنا الصيني !! الصيني جوكر حبابو في ازرق السودان
*علينا ان نشكر مريخاب الاتحاد العام بقيادة ود عطا المنان فقد تم إجازة ملعب شيكان وكده الهلالاب ارتاحوا من زوبعة الجيران
*اول مرة اشوف فريق يعلن عن تسجيلات قدامي لاعبيه وداسي الجدد!! جدودنا زمان وصونا علي الوطن
*اخر كلمة حرة…. الجماعة بقوا علي ملعب شيكان وامدر في امان
حكاية
للذكري والتاريخ سانت جورج الاثيوبي فاز علي المريخ بزيادة هدفين علي سباعية الوحدات
حكاية ثانية
الهلالي الجميل دكتور تاج السر الخراط .. زعلان من الحرمان ومشاهدة البدور والمحترفين في ارض السودان…الدكتور مالو زعلان ولا يهمك ان كنت في القرية ولا امدرمان الهلال في كل مكان …الخراط خراط بلاش اعذار
حكاية أخيرة .
.كمبالي لاعب المريخ الجديد مجنس من منازلهم ولسه ما شاف السودان!!
تعرف يامازري لو صبرتوا شوية كان الدلاقين رمونا بتساعية سانت جورج وانسلوا. طبعا هم بارعين في التزوير واحسن تركزوا عليها وعلي بيعة العتبة قبل ان يتنصلوا منهما ويرموا بهما كبير البلد😹😹😹😹
ارجو من الإعلاميين ان يضبطوا كتاباتهم؛ لان حكاية انو الهلال سجل لاعبين كثر و جيدين لا يعني نجاح الجميع و لا يعني ان الفريق سيكون تيم لا يهزم ، و انه سينال كاس أفريقيا. فبناء فرق البطولات يحتاج للصبر و عوامل أخرى حتى تنجح. الزمالك الذي يتصدر دوري مصر عانى قرابة العشرة أعوام حتى يزيح الاهلي من الصدارة في الموسم الماضي. الكتابات المتفائلة اكثر من اللازم تعود بآثار سالبة على الفريق و الجمهور. فرجاء روقو المنقة؛ ولو في نجاح سيظهر في الوقت المناسب.
والله يا دلدوم .. من زمان و أنا عاوز أقول كلامك ده …. تسلم يا زول يا عاقل
دائماً .. نلاحظ حكاية الفرحة الزائدة ( ال أكتر من اللازم ) دي .. في فترة التسجيلات .. في كل عام .. و مع بداية المنافسة الأفريقية .. نجد أن المحترفين مستواهم متواضع جداً .
السنة دي ..شايف في تغير للاحسن …لكن كمان الناس مفروض تنتظر لكي تحكم .
الكلام الكتير و الفرحة الزائدة .. هي ذاتا البتجيب النحس .. بالعربي كدا ..في كل سنة ما قاعد يجينا خير ..من كتابات الاخوة …المازري ، محمد الطيب والاخ طارق … رغم هلاليتهم
التي تجمعنا و التي على العين و الراس
يا شباب … ختوا الكورة واطة