الجاكومي في المطار بدون شاكوش والعرب صعب يا هلال !!

قزاز ورذاذ
محمد الطيب الأمين
الجاكومي في المطار بدون شاكوش والعرب صعب يا هلال
!!

* أمس رفض مولانا الميرغني النزول من الطيارة ما لم يتم إبعاد إبنه الحسن من المطار إلى جانب إبعاد كل المظاهر العسكرية من المطار.
* قالوا ساعة كاملة قاعد في الطيارة.
* رفض ينزل.
* وقبل يومين في وفد تركي جا السودان لاغراض تتعلق بنجيلة ملعب (المريخ الوطني).
* الوفد وصل الخرطوم وتم إستقباله من جهة الجاكومي ومن جهة المجلس.
* أبو جيبين عمل لجنة لاستقبال الوفد.
* اللجنة مشت تستقبل وفجأة ظهر ليهم الجاكومي.
* ظهر لكن بدون شاكوش.
* عشان ما نظلم الراجل ساكت.
* مشى بدون شاكوش والله.
* الوفد التركي ما عرف ممثل المريخ منو.
* إتخيل تجي ضيف زائر يقوموا يتشاكلوا فيك المستقبلين.
* ده يرحب بيك ويجُرك عليهو ، وداك يرحب بيك ويجُرك عليهو.
* شعورك بيكون شنو عليك الله؟
* أظن أن الجاكومي إستقبال الوفد التركي تحت شعار : (آخر الزمن جداد الخلا داير يستقبل ضيوف جداد البيت).
* الجاكومي عندو مشكلة كبيرة مع جداد الخلا.
* والله صحي.
* ممكن يقبل أي حاجة ما عدا جداد الخلا.
* وبصراحة معاهو حق والله.
* لكن أنا عندي سؤال للجاكومي.
* جدادة الخلا ممكن تبقى جدادة بيت بعد كم سنة؟
* محتاجة كم من الزمن عشان تبقى جدادة بيت؟
* غايتو جنس غايتو.
* المهم.
* في لقاء صعب ، الهلال أمام تحدي حي العرب.
* تعتبر هذه المباراة من أصعب المباريات.
* مباراة يحتاج فيها الهلال أن يكون في يومه.
* حي العرب من الفرق المميزة.
* يتوافر العرب على مجموعة كبيرة من العناصر القوية والموهوبة.
* وقد ظهر الفريق بمستوى أكثر من مميز في هذه النسخة.
* ويسعى من خلال مواجهة اليوم لتأكيد افضليته بتحقيق نتيجة إيجابية.
* الهلال من جانبه يملك من القوة ما يكفي لحسم كل مواجهة من حصتها الأولى.
* فقد نخشى عليه من التراخي أو الإستهتار.
* نمنح هذه المواجهة حقها من الإحترام والحذر.
* إحترام الخصم يسهل لك مهمة الفوز عليه.
* نلعب كل مباراة بإعتبارها النهائية.
* قد تشهد تشكيلة اليوم بعض التغييرات.
* وهي فرصة سانحة وكبيرة لكل وجه جديد من أجل تقديم نفسه بالشكل المطلوب.
* كل من يجد فرصة يجب أن يغتنمها على الوجه الأمثل.
* الهلال الجديد لا يشبع ولا يكل ولا يمل.
* هكذا يجب أن نكون.
* و… و…
* بالتوفيق يارب.