الخريف من رشتو والهلال من (شعلتو) !!
بالعربي الكسيح
محمد الطيب الأمين
الخريف من رشتو والهلال من (شعلتو) !!
* أهلنا بيقولوا : (الخريف رشة) .
* (الخريف من رشتو) و(العريس من بشتو) .
* والهلال من (شعلتو) .
* وكذلك يقولون : (الجواب عنوان) .
* والهلال بالأمس كان (جواباً وعنواناً) كان (خريفاً وعريساً) رغم أن اللقاء غير متلفز .
* لم نشاهد اللقاء ولكن ما وردنا من هناك أكد أن الهلال كان (بدراً في عصر كمبالا) .
* إدارة الخصم منعت (الاقتراب والتصوير) ربما لشئ في أنفسهم ولكنه الهلال وكفى .
* تمنع التلفزة ولا تمنع الإذاعة في النهاية (الفيهو طيب بنشم) .
* الأساليب بتاعت منع التلفزة دي كان بيعملها المريخ زمن جمال الوالي .
* المريخ في الزمن داك كان عندو مباريات (كاتمة صوت وصورة) .
* في مرة المريخ كان محتاج للفوز (كسر رقبة) في احدي مبارياته الإفريقية فمنع التلفزة وحتى الإذاعة.
* كانت مباراة (سرية للغاية) .
* المباراة ديك شدة ما ناس المريخ كانوا متكتمين عليها قربوا يلعبوها في (الضلام) .
* لو ما شافوها شينة كانوا لعبوها بدون إضاءة.
* كانت مباراة (سرية جداً) .
* في المباراة ديك بالذات (المريخ قضى حاجته بالكتمان) .
* أمبارح إدارة فايبرز (قلدت) هذه التجربة المريخية .
* منعت حتى التصوير بالموبايل ومع ذلك الزملاء الصحفيين الأعزاء المرافقين للبعثة كانوا (شفوت) ونجحوا في تقديم تغطية أكثر من محترمة .
* حقق الهلال ثلاث نقاط غالية جدا ومن خارج الديار .
* (فاتحة شهية) نسأل الله أن يكون لها ما بعدها .
* استبشرنا خيراً بالهلال الجديد وقد كان قدر (بُشرانا) .
* بحسب ما ورد .. لعب الهلال واحدة من أقوى وأجمل مبارياته الإفريقية.
* فايبرز فاكر كل الفرق (مريخ) .
* قايلين أي فريق جاي من السودان معناها (مريخ) .
* مساكين ما عارفين المريخ قاعد يشارك في الأبطال (هوادة ساكت) .
* عاد الشعلة بعد غيبة طويلة وحسم اللقاء .
* انتقدنا الشعلة بقسوة لأن ما ظهر به مؤخراً لا يشرفه ولا يشرفنا .
* استفاد وليد من النقد ومن زحمة النجوم وشراسة المنافسة واستعاد ذاكرة التألق.
* الزحمة الموجودة في جميع خطوط الهلال ح تخلي الفريق يولع نار .
* الدخول لتشكيلة الهلال يحتاج لدعوات الصالحين .
* ما تحقق بالأمس هو نتاج طبيعي لعمل إداري محترم .
* لجنة التطبيع اشتغلت بضمير فيما يتعلق بفريق الكرة .
* أنجزت تسجيلات مدهشة واستجلبت جهاز فني مميز وصنعت أجواء طيبة .
* كل هذا كان لابد أن يظهر في الميدان.
* ظهرت شخصية الهلال في (الشكل والمضمون) .
* الهيبة .
* الكاريزما.
* الحضور .
* الهلال الذي لم يتبقى منه إلا الإسم هاهو يعود الآن ليضرب بيد من حديد .
* فايبرز إذا أراد مباراة الإياب بملعبه لوافقنا ايضاً .
* حقو مع كورونا والموت الكتيرة ده نلعب معاكم الذهاب والإياب في يوغندا .
* ما فارقة معانا.
* عندنا أبو عشرين .
* أبو عشرين فريق بحالو.
* لون الدم حافظ على شباكه في أول لقاء أفريقي وقدم مباراة كبيرة بحسب ما ورد .
* بإذن الله ولأول مرة في تاريخه سيتجاوز أبو عشرين عقبة التمهيدي .
* أبو عشرين كان أسد.
* وفي أم درمان كان رمضان العجب حايم .
* أبو عشرين يتألق وبهنا محمد الرشيد يلعب في الليدو.
* والله (لون الدم) طلع ذكي جدا .
* نقول مبروك لكبير البلد ومبروك لجماهير صاحب المقام الرفيع .
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* وبالعصر مرورو .
كلامك ده بجيب ليك الهواء ياود الطيب. انتظر عصابات الدلاقين وشوف الردم. بس لاتهتم ووصل في اشعال نار القصب. 😹😹😹
بكل روح طيبة اتقدم ليك بالتهنئه بفوز الهلال خارج الديار وهو فوز مستحق واتمني التقدم للامام
وبكل الود ارد علي الاخ الذي يصف المريخاب بالدلاقين واقول ليه وصفك لا يجوز لانك لو نظرت فبي اسرتك حتلقي احدهم يشجع المريخ والاخر يشجع الهلال فاي لفظ يسيء لاهلنا وليس لفئه محدده وفيهم امهات واباء واخوات وما تبقي زي بعض الصحفين القابضين اجر كلماتهم
الاستاذ محمد الامين الطيب احترم فيك مداعباتك ولكن احترم اكثر احترامك لجمهور المريخ وعدم قول ماهو مسيء
بالامس تعادل المريخ بظلم واضح لكننا لن نرمي الراية ونعلق كل شيء علي الظلم فهي حتما نتيجه جيده للمريخ مبروك اشاوس المريخ والهلال والامل والي الامام