السر دوليب..(استاذ) في الجامعة..(أساسي) في الفن و(كنبة) في الهلال!!
صابنها
محمد عبدالماجد
السر دوليب..(استاذ) في الجامعة..(أساسي) في الفن و(كنبة) في الهلال!!
· في بداية عملي في صحيفة (الصحافة) وصحيفة (الاحداث) في العشرية الاولى للقرن الواحد وعشرين …(ما تشوفوا الارقام دي تقولوا الزول دا كبير)..كنت احتشد بعثمان حسين ..كنت شائل (شجن) وحائم بيها في الطرقات.
· (شجن) كان بشاكل بيها.
· وكنا (الفول) دا ما بنضوق ليه طعم لو ما اكلناه بي (عشرة الايام)..عوض احمد خليفة.
· زمان وقت الدنيا كانت بي خيرها …ونحن (طلبة) في الجامعة ..كنا ما بنركب في (الباص) إلّا يكون فيه محمد وردي او عثمان حسين او محمد الامين او ابراهيم عوض شغال.
· ما بنركب في (باص) ساكت.
· وكنا نتخير في الباص (الشباك) الناصية وقت نلقي عثمان حسين بغني في (شجن) لحسين بازرعة او (لا وحبك) لمحجوب سراج ..عشان نأخذ راحتنا ونسرح بعيد.
· كنا بنتمنى (الباص) ما يصل.
· وكان يمكن نفوّت المحطة ..عادي وقت يكون عثمان حسين شغال في (استريو) العربية…بنداغل على روحنا.
· كنا (شفوت) بنكاتل في الحتة دي.
· كنا بننسي (الباقي) مخصوص عند الكمساري وقت نسرح مع اغنيات عثمان حسين تحفيزا للكمساري وتشجيعا لذوقه الجميل.
· كان عثمان حسين ونحن طلاب في المرحلة الثانوية بيشرقنا …وكنا وقت نسمعه يغني (قصتنا) لبازرعة او (مسامحك يا حبيبني) للسر دوليب بنقعد ليه في الواطة …تقول نحن الغالطنين.
· بنحنس في ظروفنا…ونعضعض في اصابعنا.
· نطلب (السماح)…ما نخلي لينا (طابونة) او (دكان) بدون ما نجيب فيهم سيرة عثمان حسين.
· بي موضوع او بدون موضوع.
· بنتلكك.
· بتلقونا جبنا سيرة عثمان حسين ..وقعدنا نتحدث عنه.
· نمشي الاستاد…نحضر مباراة ساردية والنسر …نخلي الكورة ونقعد نتحدث عن عثمان حسين.
· في المدرسة….ننسى الحصة ونتكلم عن عثمان حسين.
· في النادي.
· في أي حتة كنا بنفتش لينا موضوع عشان نعرّج بيه على عثمان حسين ونقعد نتكلم عنه.
· بس ما نلقي لينا (ضل) فاضي.
· كنا بنتفنن في ذلك ..حتى اصبحنا من (حرفاء) ذلك المجال.
· بقت عندنا (موهبة) في الحتة دي.
· أي حاجة بتخص عثمان حسين كنا بنقعد نطاردها ونسكها لمن نجيب خبرها.
· بنلاحق اخباره …واغنياتها.
· بنسك اشرطته.
· سعيد اني حاورت عثمان حسين مرتين …وفي كل مرة كنت بمشي وأنا في حالة نشوة من الفرح.
· ما بصدق روحي…بحسدها على ذلك.
· شفنا تفاصيل عثمان حسين …بتكلم كيف ..بقول شنو؟…بضحك متين؟…بعمل في شنو؟.
· ما خلينا ليه حاجة.
· بعد ذلك انتقل بينا (الهوس) الى جوانب اخرى.
· أي شاعر غنى ليه عثمان حسين بقينا عاوزين نقيف عندو …وعاوزين نعرف عنو أي شيء.
· مسكنا (هوس) في الحتة دي.
· عشان كدا في العشرة سنوات الاولى بعد عام 2000 حاورت على ما اعتقد البروفيسور السر دوليب اكثر من (5) مرات.
· كنت في كل خميس بفتش لي سبب عشان امشي احاور السر دوليب في جامعة الاحفاد.
· كنت في كل مرة بتعلم منو….الحوار معه كان بمثابة (المحاضرة).
· اذكر كان الدخول لجامعة الاحفاد صعب …لكن كنت ارتب مع السر دوليب حتى ظن الحرس الجامعي في بعض الفترات التى كنت اتردد فيها كثيرا على مكتب السر دوليب اني شغال في الجامعة.
· الزميل محمد شريف مزمل …ترافقنا كثيرا في محاورة السر دوليب في جامعة الاحفاد عندما كنا نعمل في جريدة (الصحافة).
· بعد ذلك ونحن في جريدة (الاحداث)..ما خليت لي مناسبة ما نطيط فيها على السر دوليب في جامعة الاحفاد.
· قرأت هذا الخبر بوجع كبير (غيّب الموت السبت بمدينة أم درمان الأستاذ الجامعي والشاعر الغنائي الشهير، تاج السر محمد المهدي دوليب (السر دوليب) بعد حياة حافلة بالعطاء الأدبي والأكاديمي، حيث عمل أستاذاً لعلم النفس بجامعة الأحفاد).
· بقى ما عندنا (حيل) للحزن.
· خلاص فترنا.
· كملنا.
· كان رحيله في يوم السبت 5 سبتمبر 2020م…ولد في حي الركابية بام درمان ..ودرس الاولية فيها ثم التحق بمدرسة وادي سيدنا ليدرس الثانوية ..وبعدها انتقل لمدرسة خور طقت …ثم درس في بيروت بالجامعة الامريكية..وعمل في جامعة الخرطوم ثم جامعة الاحفاد.
· السر دوليب شاعر نشأ في ام درمان وقام في احياءها الدافئة …ولعب في الهلال غير انه لم يكن يشارك في التشكيلة الرسمية للهلال، لأن الهلال وقتها كان فيه جهابذة مثل صديق محمد احمد وجكسا وأسماء كبيرة كان شاعر برقة وحواس السر دوليب صعب يشارك معهم.
· كان بقعد ليهم في (الكنبة) وهو سعيد بالفرجة فيهم.
· شاعر بهذه الروعة والجمال ..سعداء ان يكون ارتدي شعار الهلال.
· هلال كرومة والسر دوليب …ومحمد وردي ..ما اعظمه.
· بدايات السر دوليب الشعرية كانت في تخفيه وراء كلمات مجهولة كتبها ولم يعترف بها وهي كانت في الاغنية الشعبية والتراثية الخفيفة (مبروك عليك الليلة يا نعومة) التى كتب كلماتها السر دوليب عندما تزوجت جارته (نعومة) حسب ما كشف للزميل الصحفي طارق شريف وأعلن عن ذلك (السر) الذي جعله يستغل ذلك اللحن التراثي ليضع عليه تلك الكلمات التى يتغن نبها البنات في مناسبات الزواج.
· (السر) بدأ يكتب في (السر).
· السر دوليب كان وقتها صغيرا ولم يكن يملك الجرأة للإعلان عن حالته العاطفية فكتب (مبروك عليك الليلة يا نعومة) دون ان يعلن عن ذلك حتى لا يدخل في حرج مع اسرته ومع المجتمع كله بعد ذلك.
· التجربة الرسمية الاولى للسر دوليب كانت مع عثمان الشفيع الذي كتب له اغنية (اللون الخمري) وارسل الكلمات عبر البريد لعثمان الشفيع ليضع الكلمات في لحن (قديم) وينتشله من كلمات البنات الى كلمات السر دوليب.
· بعد ذلك غني محمد ميرغني للشاعر السر دوليب وقد كتب دوليب اغنية (في بعدك انا والأشواق بقينا اكتر من قرائب ما بنغيب من بعض ابدا زي احب اتنين قرائب) في لبنان عندما كان يدرس علم النفس هناك في الجامعة الامريكية.
· السر دوليب درس علم النفس وقد انعكس ذلك في الكلمات التى كتبها السر دوليب فهي كلها كلمات تدعو للسماح …وفيها تصالح كبير …واريحية عريضة.
· السر دوليب كأنه يخاطب (النفوس)….استطاع بأغنياته ان يصل لكنهها ويخاطبها بمفردة جميلة ورائعة وفيها اريحية عريضة.
· مع الموسيقار الملحن حسن بابكر …تشكّل ثلاثي فني جمع بين محمد ميرغني (الفنان) والسر دوليب (الشاعر) وحسن بابكر (الملحن).
· غني له محمد ميرغني الى جانب (انا والاشواق) وغني له ميرغني ايضا اغنية (مين فكرك يا حبيب مين الهداك الي جرحي قرب يطيب جددتو تاني علي).
· انظروا الى سماحة هذه الكلمات والى تلك (الطيبة) التى تبدو واضحة في اغنيات السر دوليب.
· تشتهي (الجرح) عند السر دوليب.
· كلمات طالعة فعلا من بروفيسور في علم النفس.
· شاعر بهذا اللطف والإنسانية والعلم كان من الطبيعي ان يلتقي مع الفنان عثمان حسين ليقدم للاغنية السوداينة افضل المساحات الوجدانية التى شغلت بالتسامح والتصافي والنوايا الحسنة.
· غني له عثمان حسين (مسامحك يا حبيبي مهما قسيت علي قلبك عارفو ابيض وكلك حسن نية)…هذه الاغنية يمكن ان تعتبر (الصك) الحقيقي للتسامح والغفران في الاغنية السودانية.
· السر دوليب كان هو شاعر (النوايا الحسنة) ……هو بذلك (التسامح) الذي كان ظاهرا عليه …يصبغ على ملامحه بصورة واضحة…كان كله حسن نية.
· عوض احمد خليفة في (عشرة الايام) عندو عتاب جميلة في الحتة دي عندما يخاطب حبيبه (واتلاشت الاحلام وين حسن ظنك بي؟).
· ما اظن في اجمل من كدا.
· الواحد نفسو اتقطع من الكلام دا.
· تخيلوا ان العتاب واللوم عند السر دوليب لا يتجاوز هذه الحدود (كنت فاكر القي قربك الحنان تغمرني بيه)..لم يكن يعاتب او يلوم باكثر من هذه الكلمات…(مين فكرك يا حبيب مين الهداك الي ..جرحي قرب يطيب جددتو تاني علي)…هكذا كانت قسوته …وكانت شكوته لا تتجاوز تلك السقوف.
· عثمان حسين قدم له اغنيات تشبه عثمان حسين وتشبه السر دوليب.. (أنا وحدي طول الليل اشكي وابكي) بهذه الصورة كان يشكو ، وغني له (أنا مالي والهوي) و(ارويني ارويني) كلها رجاءت في منتهي اللطف والسماح. كذلك غني له عثمان (داوم علي حبي)، و(ريدتنا ومحبتنا)، و(مسامحك يا حبيبي) و(ما بصدقكم)، و(قبلي فاكرك).
· غني له محمد وردي اغنية (هدية)…وهي اغنية تشبه الافلام العربية القديمة لما فيها من رومانسية وصور وتجسيد لذلك.
· سيد خليفة غني له (زيدني من دلك شوية) رجاء في منتهي اللطف وغنى له أحمد المصطفى (احتار خيالي) و(يا حبيب هون عليك)…الحبيب عند السر دوليب كان بذلك الألق ..والامنيات والمثل الرفيعة.
· واغنيات اخرى كثيرة للسر دوليب عند سمير دنيا وبعض الفنانين الشباب.
· سوف اعود لاكتب تفصيلا او رقميا ان شاءالله عن السر دوليب ومحجوب سراج الذي لم نكتب عنه بعد ان مد الله في الاعمار.
· اللهم ارحمهم واغفر لهم جميعا واسكنهم فسيج جناتك.
· ولا حول ولا قوة إلّا بالله.
· …………
متاريس
· رحل كذلك في الايام الماضية ظريف ام درمان وفاكهتها الهادي نصر الدين.
· اللهم ارحم موتانا.
· واسكنهم فسيح جناتك.
· مجلس ادارة الله او لجنة التطبيع اتمني ان تكون قامت بواجب العزاء في لاعب الهلال السابق السر دوليب كما فعلت مع سمير صالح.
· ……….
· ترس اخير : جابت ليها (مطرة) …و(بحر) كمان!!.
