السكنات(بالساء)!

من الساخر نادر التوم

(سخرية الواقع و واقعية السخرية )

السكنات(بالساء)!

■ كذبة أبريل!
_ هل سيصرفون لنا (كل الأشواق)؟ أعني جميع الرواتب؟
_ يجيبو ليكم من وين؟؟؟
_ صرت مثلهم تجاوب بنفس (سؤالهم)!!
_ أعمل ليك شنو لكين؟
_ قل لي و لو كذبا!
_ لا هوي الكذب حرام!
_ يعني ماف؟
_ لا قالوا راتب (أبريل) بس#
_ أخشى أن يكون دا(الكذب ) ذاااتو.
■ أفحمني!
قلت له :
_ لماذا تدفع هذه الدول الشقيقة و الصديقة و (الجارة) بجنودها في بلدنا (بكاتلونا ليه في السودان يا إنسان؟)
أجاب:
_ و لماذا تقاتل أنت في بلاد الناس؟؟
صدقوا أفحمني!
(ما قدرت أزوغ حد ما قرييبت) ليو!
ناس مارك، أقترح تعملوا أيقونة في الفيس (أفحمني)!
■ شعارات!!
لا تفاوض!
لا شراكة!
لا مرتبات !
لا مواصلات!
لا شبكة!
لا أي حاجة.
■ سمك!!
ظل صاحبنا يجلس بجوار
(صينية السمك) في (قرية السمك) بعد أن قمنا و غسلنا جميعا!
_ بتسوي في شنو إنت أصلو؟
سأله صديقنا
أجاب:
_ قاعد أعمل (تمشيط )!
■ مدينة النور!!
ليعلم الجميع (الجوة و البره)
بأن (رفاعة) ستظل مدينة العلم و النور و لو قطعتم منها (النور)!
■ ال …. ثاني!!
يبدو أن آل دقلو لم يفهمو أن
المركب و السفينة، التي يقودها إثنان تغرق!
قائد أول
و.. قائد ثاني
و…..
زي الجامعات:
أولى أول
و أولى ثاني
و…… (برضو)
لذلك صارت مغلقة باستمرار، و إن فتحت فمشكلاتها في استمرار، و ليس فيها أي استقرار!
■ كلام!!
……يحدثونك عن ال(بشائر )،
تجي( الطرمبة) ، تلقى ما فيها لا بنزين لا غاز لا جاز لا أنبوبة.. فلس بس#
■ حيرة!!!
الحرية و التغيير
سبب الحرب و بقولوا( لا للحرب)
الكيزان سبب الدعم و يسعون لمحاربته!!
■ ليتهم!!
ليت شعار (جاهزية، سرعة، حسم) يطبق على المرتبات، و شعار
(ما دايرنك)، يطبق على من يصرف لنا المرتبات!!
■ إحتمالات!!
القط، و الفار، و الكلب، و الذئب و الغنم يمرحون معا.. إما أن العدل قد ساد البلاد، أو أنهم قد
(عقدوا هدنة)، و هذا المرجح فقد رأيت (العنزة) تناوش الذئب، مرات و مرات!
■ جينات!!!
صديقي في السعودية قال جايي راجع
قلت ليه : _ ليه؟
_ كدا !
لم أناقشه فقط تبين لي أنه
(فيو جينات….. قناة طيبة)!!
مع إنو ناس قناة طيبة ما فيهم زول (مفكر يجي)، اللهم إلا أردوغان يفعل بهم مثل ما فعل ببقية (الإخوان)!!
■ نجوم !!
انتشرت في أسواقنا المنتجات المستوردة، في المياه الغازية هناك المصري و الاثيوبي، مياه غازية و الناس بتحكي عن كم مليون سوف يموتون جوعا، كيف بس؟؟)
في مشروب إسمو (7 ستار) لست أدري هل على وزن (7Up) و ما يهمني من ناحية (قرامر)، ستار أم ستارز؟ (بالزا، أقصد بال إس)؟
المشروبات الغازية المستوردة
بي ألف جنيه، بتعادل بالسوداني (عشرين عيشة)!
الغريب في سجائر (يمني) !
تقول لي حرب؟؟؟
■ سبحان الله !!
الناس الكانوا بقولوا (العسكر للثكنات،) هم ذاتهم بقوا كايسين للثكنات!
و الناس الكانوا بقولوا(الجنجويد ينحل)، فيهم كتار طلعوا جنجويد، تصدق؟
و الناس الكانوا بقولوا (زايلي) طلع عندهم (بنوك)!!!
■ تلميحة!!
من بعد ما فات الأوان الليلة جايي تعتذر و ترجع أيامنا الزمان من وين أجيب ليك العذر؟
أيامنا الزمان وين تاني يا مولانا؟
■ إيجابية!!
لو فاتت حاجة في حاجات تاني
و لو اتلاشى حلم بتتحقق أماني!!
.■ تغريده ؛
(بحلم بالرجوع أنا ما فضل لي بااال) !!
جديييد عشرييييين تلااااتة و عشريييين
حصريااا على منتدياااات ناااادر ود التووووم..
مهداااااة لي أي زول بحلم (نفس الحلم)!
■ ختاما
_ هذا الوقت سيمضي
_ فالترق كل الدماء
( بقتح التاء و ضم الراء )
روقوا !
_ بمشي الخريف و عكار البحر بصبح نضيف
_ الخرطوم تعمر تصل القمر ،إن شاءالله !
_ (سيجعل الله بعد عسر يسرا)
_ أللهم صل وسلم وبارك على سيدنا محمد النبي الامي الحبيب العالي القدر و العظيم الجاه و على آله و صحبه و سلم!
ودعناكم الله