بالعربي الكسيح
محمد الطيب الأمين
الصدر بارز والبطن مشدودة !!
* يعلم أهل الجيش والبوليس أن أقسى وأقصى ما في التدريب العسكري (الإدارة الداخلية) إلي جانب (تمام ٦ صباحا وتمام ٩ مساء) .
* والأسوأ طبعا (الإدارة الداخلية) .
* الإدارة الداخلية لغير الناطقين بها هي (الوقفة العسكرية) ذات المواصفات المعينة (النظر عمودي ، الصدر بارز ، البطن مشدودة) .
* هذه بعض من شروط الإدارة الداخلية .
* (الصدر بارز ، البطن مشدودة والنظر عمودي) ممكن تكون واقف بهذه الطريقة ست ساعات.
* شخصيا لا انفى إنني كنت أتضايق جدا من الإدارة الداخلية بل كنا ومجموعة من الاخوان نهرب من الإدارة الداخلية في الغالب .
* منظر (المجندين وهم يتساقطون مثل ورق الخريف أثناء الإدارة الداخلية منظر قاسي جدا) .
* الزول وهو واقف بيغمر وبيقع على وجهه وفي ذلك خطورة كبيرة .
* بيجيك هبوط ولفة رأس وبتقع منهار بذات الوضعية الكنت واقف بيها.
* يعني بتقع و(النظر عمودي والصدر بارز والبطن مشدودة) .
* هذا المشهد المؤلم كان حصريا داخل معسكرات التدريب (جيش وبوليس) .
* اما الآن فإن (الإدارة الداخلية) أصبحت عندف (الملكية) أو (المواطنين) .
* إدارة داخلية لكل السودان .
* البلد كلها (النظر عمودي والصدر بارز والبطن مشدودة) .
* وهذا كله بسبب (صف الرغيف) .
* ساعات طويلة أنت واقف في صف الرغيف .
* واقف و(النظر عمودي والصدر بارز والبطن مشدودة) .
* ممكن تغمر .
* أكيد بتغمر .
* وح تقع .
* تقع وقروشك في يدك وكذلك الكيس .
* بتقع والنظر عمودي والصدر يغلي والبطن مرخية.
* لما تدوخ وتقع في صف الرغيف (البطن ما ح تكون مشدودة ولا الصدر ح يكون بارز ولا النظر عمودي) .
* بتقع والبطن يابسة و(الصرة) أقرب للسلسة الفقرية.
* الوقفة بالساعات عذاب .
* واقف عشان تشيل رغيف عشان تأكل) .
* يعني واقف صف بي حقك وعشان تشيل حقك .
* (الوقفة) هنا عشان الأكل .
* عشان الجوع .
* وعشان (بطون اطفالنا ما تضوق الهزيمة) .
* وعشان نأكل وما نموت .
* زمان بناكل عشان نعيش ونحقق أحلامنا وهسه بنعيش عشان نأكل لانو أحلامنا ماتت أصلا.
* لما تنفق أربع ساعات في صف رغيف وثلاث ساعات في زحمة مواصلات أكيد ما بكون عندك طموح في الدنيا بخلاف (مقعد نص في حافلة وكيس رغيف من شباك الفرن) .
* أزمة الرغيف فاتت كل الحدود .
* وتجاوزت كل الممكن.
* ولابد من حل عاجل .
* الناس بتقع في الصفوف من فرط التعب والإرهاق والجوع .
* الناس لا عارفة تشتغل ولا عارفة تقيف في الصف .
* بنقول الكلام ده وعلى بالقسم ما ندمانين على الثورة .
* ولا ندمانين على التغيير الحصل .
* واصلا أهل السودان يختلفون على كل شئ ولكنهم يتفقون على عدم عودة (الكيزان) .
* عدم عودة (الكيزان) متفق عليها ، حتى لو كان مصيرنا (الجوع) .
* هذا الإتفاق لا يعني أن الوضع الحالي مثالي .
* على العكس .
* الوضع الآن أقل من قبول .
* والوضع يمضي نحو الأسوأ، والحلول المطروحة عرجاء .
* ولكن لا لعودة الكيزان .
* نسأل الله أن يفرج الكرب ويسهل الحياة .
* و..و..
* والله في .
