العاجبني في المريخ .. كل الفرق راضية عنو !!

قزاز ورذاذ

محمد الطيب الأمين

العاجبني في المريخ .. كل الفرق راضية عنو !!

* الضجة التي احدثتها (سفرية) ندى القلعة إلى نيجيريا قبل سنوات تعتبر هي الأكبر في تاريخ الفن السوداني.
* وجدت ندى نقد عنيف كاد أن يعصف بتجربته الغنائية.
* ندى ردت على (هيجان) الصحافة الفنية من خلال أغنية أطلقت عليها اسم (الشريف مبسوط مني).
* والأغنية أيضا هاجمها الناس بشراسة.
* ندى جات من نيجيريا مبسوطة من الشريف .. (دولارات وكده).
* والشريف مبسوط من ندى ..(أغنيات وكده).
* ونحن ما كنا عارفين الشريف مبسوط إلا بعد هي تبرعت وغنت (الشريف مبسوط مني).
* وبما أن ذلك كذلك فإن المريخ الشهير ب(الإصيفر) هو الآن مصدر سعادة لفرق المجموعة.
* كل الفرق مبسوطة من المريخ.
* ما في فريق في المجموعة دي زعلان من المريخ.
* والله صحي.
* وأنا والله أكتر حاجة عاجباني في المريخ إنو ما خلى فريق يزعل منو.
* رضاهم كلهم.
* الاهلي مبسوط منو.
* فيتا مبسوط منو.
* وسيمبا مبسوط منو.
* نسأل الله العلي العظيم أن يديم عليهم الانبساط و(الباسطة) .
* كما نسأل المولى عز وجل أن يجعل المريخ دوما سببا في سعادة الفرق.
* ثلاثية من الأهلي ورباعية من فيتا وثلاثية من سيمبا.
* زي التذكرة … (الخرطوم ، دبي الخرطوم).
* استهل المريخ اول مباراة في مرحلة الذهاب أمام الأهلي بثلاثية.
* وجا واستهل مرحلة الإياب أمام سيمبا بثلاثية أيضا.
* فريق ما بزعل زول نهائي.
* باقي ليكم مباراتين واحدة في أم درمان والتانية في الكنغو.
* والمباراتين ديل المريخ ح يخسر فيهم بتسعة أهداف.
* سبعة في الكنغو وهدفين في أم درمان.
* وبعد ده يجيك واحد يقول ليك الإعلام المصري ورضا وما عارف شنو.
* المحلل المصري رضا كلامو كان واضح.
* قال : دي فرقة عشوائية ازاي وصلت المجموعات؟
* وكلامو منطقي.
* الراجل ده والله ما غلط عليكم.
* قال كلمة حق.
* المهم .. ما حدث للمريخ من مرمطة فيهو جانب جيد.
* المريخ هو الفريق الواحد الآن مرتاح وامورو واضحة.
* عرف مصيرو.
* وابتعد من الضغوطات.
* راح واستراح.
* وأكبر ضربة تلقاها المريخ كانت في أبو عشرين.
* الهلال كتل المريخ كتل في (لون الدم).
* أبو عشرين الشهير ب(لون الدم) كتل المريخ ونفع الهلال.
* لا نفع التازي ولا شفع نوح.
* نقطة بس.
* وأمير كمال دخل الغابة.
* وسيف تيري (شاقي الظلط).
* وكورونا ضربت ٨ من المريخ نسأل لهم الشفاء العاجل.
* في مباراة سيمبا بأم درمان النابي رفض يشرك بكري المدينة بداوعي مرض كورونا.
* ولما الفحص أكد كلام النابي بتنزانيا الجماعة عملوا فيها زعلانين.
* وعشان ما تعملوا كورونا سبب في الخسارة تذكروا أن المريخ خسر برباعية أمام فيتا وبدون كورونا.
* حصل ولا ما حصل؟
* احمدوا الله على النقطة دي وانستروا لينا في الجايات.
* وغايتو جنس غايتو.
* ملحوظة .. اليوم الخميس حلقة الأسبوع من برنامجي على اليوتيوب عبر قناتي (دقايق).
* حلقة اليوم تحت عنوان (الشرطة زعلانة) نتمنى ونتشرف بمتابعتكم واشتراككم.
* ونركب صافنات ونجيبة (تنزانية) واصلو الزول بيموت والذكرى تفضل حية.
* و.. و…
* هسه ندى القلعة منو وشريف نيجيريا منو؟؟