العيد مبارك عليكم وعلينا
لهيب النار
هاشم ود الطيب
العيد مبارك عليكم وعلينا
النعمة بت اللمين قامت فجر مع النجمة ،الحوش مقشوش من امس ونضيف وصحت بتها قومي يا اللقية يا بتي الشمش قربت تطلع خلينا نجهز حالنا الليلة العيد.. امرقي هدوم اخوانك الصغار وافرشي الملايات الجداد بعد ترشي البرندة واللوضة انا قايمة علي المطبخ اجهز الفطور الناس بجونا قومي الله يرضى عليك يا بتي..
اللقية قامت وابتسامتها فوق وشها مع الفجر زي الفجر مرقت هدوم اخوانها ورشت البيت وفرشتو وشالت المبخر مشت لامها في المطبخ لقتها مولعاهن كانونين واحد خاتة فوقو حلة الشعيرية بعد حمرتها وكبت فوقها الموية والتاني خاتة فوقو الطوة ترمي في اللقيمات.. دنقرت اتناولت ليها جميرات البخور وجات قعدت مع امها نزلت الشعيرية وختت الكفتيرة في الكانون ، وقبال الشمش تطلع سون شاهيهن وقبلن علي الفطور ملاح تقلية وملاح نعيمية.. حاج الطيب بعد اتحمم جاء للشاي واولادو التلاتة جمبو بعد شربو الشاي ولبسو هدومهم اداهم العيدية اللقية زاتها اداها معاهم.. بت اللمين من مطبخها ما مرقت جهزت فطورها تب وحاج الطيب ، مشى ليها لقاها ملت الصبارة شاي ملت ليها صحن لقيمات وصحن شعيرية ختتن قدامها وقعدت تبكي
_ما تبكي يا بت اللمين العيد فرحة والحزن فوقو ما صاح
_استغفر الله العظيم والحمد لله بس انا كل سنة زي الوكت دا بشيل صحنيني ديل وصبارتي وبمشي اصبح علي امي الله يرحمها واشرب معاها الشاي الليلة اشربو مع منو
_مافي زول عزيز علي الله وكلنا فايتين البكاء ما برجعلو زولا مات ، شيليهن وامشي بيهن ناس حليمة ما عندهم حاجة وهاك القروش ديل اديهن ليها خليهن يفرحوا مع الناس..النعمة فاتت لحليمة لقتها مبسوطة وهي زي ما قال حاج الطيب ما عندهم شي لكن الجيران كلهم ما قصروا معاها ، العيد رحمة وتراحم ..بعد شربت معاها الشاي ادتها القروش الاداهن ليها حاج الطيب حليمة زرزرت وديمعاتها جرن وقالت ليها الله يحفظكم يا النعمة والله جمايلكم مغرقانة ما عارفة اشكركن كيفن حاج الطيب امس جاب كسوة للاولاد وانتي جايبة لي لقيمات وشاي وقروش النعمة قالت ليها ما تقولي كدا نحن اهلك وجيرانك وشربت معاها الشاي وفاتت وصلت البيت ودايرة تطلع لحاج الطيب جلابيتو الجديدة لقتو لابس ليهو جلابية قديمة ومارق للصلاة
_مالك يا حاج لابس جلابيتك القديمة دي وجلابتك الجديدة مغسلة ومكوية من امس بالليل في الدولاب؟
_الجديدة ضيقة شوية وانا بريد الجلابية دي
_هي لكن الليلة العيد والزول ما بلبس من القدام
_خلاس لبستها تاني ما بمرقها والصلاة قربت جهزي الفطور وكتريهو الناس بجوا يفطروا معانا
_الفطور جاهز من قبيل بس عليك الله ألبس جلابيتك الجديدة
_ها مرة دي برضها جديدة
حاج الطيب مرق فات والنعمة دخلت فتشت لجلابيتو الجديدة كلو كلو ما لقتها
بعد الناس صلوا وبقوا لافين الحلة يباركوا في العيد حاج الطيب جاء ومعاهو قريب عشرين نفر جابهم للفطور
وشافت جلابيتو الجديدة لابسها علي ود العجب المسكين وفرحان بيها فرح شديد
بعد الناس ما فاتوا قالت ليهو الله يفرحك دنيا وآخرة يا حاج زي ما فرحت ود العجب ، وديتها ليهو متين؟
_ اسكتي ما يسمعك زول انا وديتها ليهو قبال صلاة الصبح دخلتها في كيس وجدعتها ليهو بالحيطة مافي زول شافني الناس للناس آمرة
(السعادة والفرحة في فرحة المحتاج)
كسوة العريان وإطعام الجيعان وإغاثة اللهفان لايعلم جزاهم الا الله تعالي .كونوا مفاتيح للخير مغاليق للشر نافعين للأمة وكتر من عـ مل الخير و هاك تلاقيها هـــناك ..
كل عام و انتم طيبين مع كامل الود و التراحم والموده كل عام ونحن جميعا بخيــر وفرحانين يارب.
زمن إضافي
- توصل المريخ الي اتفاق مع ثنائي الفريق اللاعب ” الجزولي نوح ” و “عمار طيفور ” للتجديد للفريق نرجو ان يكتمل الاتفاق ويتم التوقيع لتأمين اللاعبين.
- اخيراً أعلن تلفزيون السودان عن تلفزة المباريات المتبقية للمريخ والهلال في الدورة الأولى للدوري الممتاز.
- متبقي للمريخ ثلاثة مباريات مؤجلة من الدورة الاولى للممتاز امام حي العرب وكوبر ببوتسودان وامام الهلال بالابيض.
- مباراة الهلال وهلال الساحل شهدت ثلاثة بطاقات حمراء اثنان من نصيب الهلال وواحده لهلال الساحل واحد البطاقات نتيجة الاشتباك والضرب بالايدي ونتوقع قرار اضافي من لجنة الانضباط.
- كل عام وانتم بخير مجدداً وعيد سعيد..
