الغربال مريخي.. (ولون الكدارة احمر)..!!
كرات عكسية
محمد كامل سعيد
الغربال مريخي.. (ولون الكدارة احمر)..!!
*(نفتح قوس)..* * كل من يعتقد ان انتقال محمد عبد الرحمن (ميدو) الى كشوفات الهلال صحيح مائة بالمائة فهو واهم واهم، ولا يعرف اي شئ عن قوانين الاتحاد الدولي لكرة القدم (فيفا)، واللي انحنا هنا في السودان حافظنها صم، لدرجة اننا تفوقنا بها على البروف كمال شداد (شداد كمان شن عرفو باللغة الانجليزية)..؟!!
* المادة (واو، ها، ميم) – اقرأوا حروفها منفصلة وغير متصلة – الفقرة (تلقاها عند الغافل) بتقول “ركزوا معاي” طالما ان اي نجم صرح لمجموعة من الاصدارات الحمراء، واكد انه لا ولن يلعب في السودان الا للمريخ فان ذلك التصريح سيتم اعتماده دوليا..!!
* ومافي زول يقول لي: (الضلام) ده شنو، لاننا وطالما نحنا ماشيين بشارع الهواء، فحتما ولابد يكون في ظلام كثيف.. كمان عايزين تقولو لي مافيكم زول قبل كدة مشى امبدة بشارع الهواء.. والله عجائب تخلي الواحد يفكر يهاجر تاني، ويشوف مكان المكرمات وين..!!
* ولاني ما بكضب، ولا بعرف الكضب، ارجع ليكم لموضوع شبيه لقصة ميدو دي، ولاني واثق من ان ذاكرتكم (ما سمكية) فهل تتذكرون ما حدث للمريخ والايفواري باسكال..؟! مش الزول ده اتعهد، وصرح وقال للاصدارات الحمراء بانه ما بيلعب في السودان الا للمريخ..؟!!
* باسكال ده تاني شماها هنا في السودان..؟! طبعا لا، والسبب ان قوانين فيفا تمنعه، بل وتلزمه على الايفاء بالعهد الذي قطعه على ادارتنا بكامل قواه العقلية، وحال اخلاله بذلك الاتفاق فانه سيجد نفسه محاصرا من رجال المريخ، وفطاحلة القانون فيه، بقيادة شخصي الضعيف (وكل شئ بثوابه يا صفوة)..!!
* نقول ذلك، ونحن على علم تام بان الغربال ده ما ح يقدر يلعب للهلال، لان الدفع به اساسيا في اي مباراة، يعني وجود كمية من الشكاوى.. (زي المطر)..!!
* اقول هذا الحديث لاطمئن المريخاب على اننا لا ولن ندخر جهدا في سبيل رد الظلم، والحفاظ على مكتسبات نادينا، والتي هي مكتسباتنا وسندنا ومصدر شهرتنا ورزقنا الابرز..!! * خلاصة الموضوع استطيع القول ان النجم محمد عبد الرحمن (الغربال) سيظل مريخيا حتى النخاع، ولا ولن يبدل الشعار الاحمر مهما بلغت الاغراءات والاموال المعروضة عليه من الهلال.. بس انتظروني اشوف لي محامي سويسري (زي الساعة) عشان نرفع القضية بعد ما نقوم بترجمتها..
* بعدين حكاية (المترجم) دي ما تفهموني فيها غلط، لان الاستعانة به لا تعني باي حال من الاحوال اني متواضع او ضعيف في الانجليزي او لا سمح الله اتعلمتو وانا كبير.. لاني في كل مرة بكتب ليكم كم كلمة كدة بلغة الخواجات عشان ما تفهموني غلط..!!
* وبعد ما يكسب المريخ القضية تبع ميدو اظن انني ساكون جديرا بالحصول على لقب (ابو القوانين الصغير) لاني فاهمها تمام، وحافظها حفظ، وممكن عادي اقارع ليكم شداد العامل فيها حافظها ومقددها لكنه ما عارف في ناس زي العبد لله ح يجي اليوم ويتفوقو عليهو هو زاتو..!!
* وطبعا انا حريص على التبحر في محيط القوانين الدولية عشان مصلحة المريخ خاصة وان كل المجالس المتعاقبة منذ ايام الرئيس الطوالي لا تخطو اي خطوة الا بعد استئزاني، ومشاورتي، وبالتالي بقيت انا الكل في الكل، بس اوعى يجيني زول ويقول لي انت كل قضاياك خاسرة..!!
* انا الكينج.. انا الشافوهو خلوه.. انا بتاع كلو.. تجي بي جاي تلقاني فاهم كورة.. تمشي بي غادي تلقاني مشارك في وضع القوانين.. تفتح الحنفية اجيك نازل منها لاني انا الصنعتها.. فاهم وعارف وضليع في كل شئ..!!
* يقوم يجي (واحد هلالابي) كده (انا بعرفو) يقول انا بسترزق من المريخ، وببيع الوهم مع المخدر للجماهير عشان قروشي تزيد.. وهنا اقول لذلك الازرق شن عرفك ما احتمال انا كوز كبير او تابع للمؤتمر الوطني..؟!
* التش ولدنا بقضي غرضنا، ااي بركة الجيت بركة الجيت.. ااي عسل انت وبسكويت.. حبة فوق وحبة تحت.. (ما تستغربوا يا جماعة انا في السطور اعلاه كنت بلعب وبهظر مع زولي وفردتي ود العمدة)..!!! * وعشان ما تفكروا كثير، وتسرحوا بعيد، احب اقول ليكم، ود العمدة ده سر اللعبة، ومكان الفرحة، وسبب السبب زاتو.. ود العمدة يا.. العرفتنا معاك حقيقة ان لون الدم (احمر حمار شديد)، وانو المنقة لما تتخلط بتبقى فائدتها اعلى، وتركيزها بيتضاعف.. اما الفراولة لا لا ما ح اتكلم عنها..!!
* حقيقة يا صفوة انا ما سمسار، ولا تاجر ولا بعرف يعني شنو الزول يكون ارزقي والا طبال، كل ما في الموضوع انا زول مصلحة.. (مصلحة المريخ طبعا) وما بجامل فيهو خالص، وكمان ما بحب اي زول يطلع من دائرة سيطرتي، وكيف (يطلع) وانا ود (ود العمدة)..؟! *(نقفل القوس)*
* لا تزال قصة (سيدنا يوسف) تحاصر عقلي وبالتحديد مشهد مجموعة الكهنة الذين يعرف كل واحد منهم درجة الوهم التي يتعامل بها (كبيرهم اليخماو)، ورغم ذلك يصرون على التسبيح بحمده ليل نهار، رغم علمهم بانه موهوم، وهم يفعلون ذلك من باب الحرص على مصالحهم، وما اكثر مثل تلك النوعية في زماننا الحالي..!!
*تخريمة اولى:* للمعلومية فان بطل الكنغو منافس المريخ انهى قبل ايام معسكر في جنوب افريقيا وفاز على اورلاندو واجاكس.. نقول ذلك وعباقرة الاحمر لازالو في محطة عجب وحمو ولون الدم والغربال..!!
*تخريمة ثانية:* ينسى المطبلاتية ان فرحتهم باللقب المحلي وبالصورة الهستيرية التي تايعناها ستقرب المريخ من الوداع للعام الرابع تواليا من تمهيدي ابطال..!!
*تخريمة ثالثة:* لقد اكدت مرارا هلالية ميدو وترحيبه بفكرة العودة لعشقه الاوحد فكان رد التجار، ومن شايعهم، على حديثي ذلك بانني هلالي حاقد حتى جاءهم الرد عمليا..!!
*حاجة اخيرة:* والله العملتها في الوسط الكروي يا (ود العمدة) نحنا ما عافينها ليك نهائي (روح يا شيخ منك لله).
*همسة:* ظهر الغربال بشعار الهلال في معسكر القاهرة لكنه اكد مريخيته وقال (لون الكدارة احمر)..!!
انت موش بتاع مرت الايام كالخيال احلام
يا محمد كامل سلم علي الاستاذ الدكتور مزمل
.. وكفي..
ههههههههااااايا، عمود الجمعة كااااارب والله يا أستاذ محمد كامل، وأنا بتوقع اليوم يكسر الرقم القياسي في المستعارات، بس خلي عمك يشرب الشاي وأسي بجيك طاير شايل حنيكاتو ويردمك بساقط القول 😆😆😆
أضرب الكاهن الأعظم أليخماو بيد من حديد وما تقلل من العيار، شوية كدة ويزول أثر المخدر بتاعه، لأنو الفيهو إتعرفت وورقه بقي مكشوف وراح ليهو الدرب ونفسياته بقت تعبانة شديد!!
ميدو سبب العذاب ياااا 😝😝😝
محمد يسلم قلمك وان شاء الله المطبلاتية في الهلال والمريخ يفهموا حاجة دايرين صحافة رشيدة تهتم بالأشياء التي ترفع من مستوى الكرة في السودان قوة الهلال من المريخ وقوة المريخ من الهلال لاكن شيخنا اليخاوي عامل فيها حاوي ولابتاع الهلال الذي يمجد في الرؤساء لمصلحته نحنا المريخ أو الهلال دايرين نحارب زي ديل حتى نكون فاهمين كرة الميديا والتلفزيون والمشاهد المباشرة أسهل من تقبل كلال هولاء الجهلة تسلم ياود كامل
صفر من عشرة
كل عام ترزلون
والله لو مزمل مات تأتي ما عارف عمودو ده اقول فيهو شنو والله مزمل عمل ليهو نفسيات قرب اجن والغريب انو مزمل ما شغال بيهو شغله
مزمل ابا القاسم ما بشتغل بالتفاهات البتخرج من ده ده مشكلتو مع مزمل انو رفض اتوسط ليهو عند جمال الوالي اشتري ليهو أمجاد هو كان راجل اتكلم صراحة عن مزمل وبي اسمو لكن البعمل فيهو النكره ده كلام حريم لابودي لابجيب
ما جاوبتني مزمل طردك من الجنه وللا من الصدى 😂 مرت الايام كالخيال أحلام مالك خليته مزمل بلعك ليها 😂😂😂😂😂😂😂
محمد ناقص تعيس زنطور يلبس ثياب الزعيم
الدكتور مزمل اكبر من كتابات الحريم ديل صحيح المثل الجمل ماشي والكلاب تنبح وخيل مع اهل الصفر احسن
عمودك … هترشة وهضربة وكلام فارغ غير مفهوم ولا مهضوم ولا بسوى ولا يستحق القراءة
ههههههه محمد عبدالرحمن ميدووو بتاعك العاجبك دااا ما ح يدقها مش فى الهلال … ابدا ما حيدقها فى اول ديربى عارف لييييه!!! اوريك لييييه … لانه عندنا اسود بلعبوا فى الخط الخلفى امبر الحسن احسن مدافع انا بعتبروا فى افريقيا وبعشق جدا التحدياااات الخاصه مباراة داخل مباراه … وصلاح نمر هو فى الحقيقه اشرس من عشره اسود جائعه مفترسه وزوووولك ميدو دااا بعرفهم تمام التمام … بس اليوم ماتقولوا شلاليييت وهلم جراااا … هى فى النهايه لعبة رجاااال … والحاااجه التانيه دكتور مزمل دااا احسن تبعد عنه انا شايف كده والله لانه مذمة الرجاااال بالهمز واللمز ماشغلة بتاع رجاااال ويااااخ لو عندك معاهووووا حاجه شخصيه ماتدخل الناس فيها … خليك راااتجل وامشى واجهوووا وانا متاكد ود شندى بتكفل بيك تماما ومتاكد جدا ما ح تقدر تواجهه وانت عارف لييييه … حاجه اخيره البتعمل فيهوووا دا سقطت بيهووووا والله العظيم فى نظر جماهير المريخ كلها والا كمااان تكووون مابتحس ولا عندك شعور بالمره … سبحاااان الله العلى العظيم نفس مدرسة محمد عبدالماجد والرشيد على عمر ورمضان احمد السيد ومحمد الامين الطيب وكبوتش هترشه وكلام فاااارغ لابودى ولابجيب وكقارئ مابستفيد منه آى حااااجه ( الطيور على اشكاااالها بردلووووب ) والاخيره دى استعاره من كتاباتكم طيبى الذكر المذكورين اعلاه … اقعدوا مع قسم خالد ولا نزار عجيب ولا ياسين شويييييه بس بالله عليكم … ولا اخدوووا الاذن من جماهير الهلال تعاااالوا استفيدوا من دكتور مزمل ابوالقاسم او المرعب زى ماانا بسميهوووا … واسمحوا لى فى كلمه وهميه برضو من درابكم البتردمووونا بيهو كل صباح دااا (فكووووووووووووونا ياااااخ )
اولا محمد عبدالرحمن الاسره بشجع المريخ ده شئ مفروق منو .صديقتي الزمن مادي بحت شوف علاءالدين يوسف واحكم. بعدين شنو الغربال لون الكداره أحمر.. ي خي المريخ لعب فيهو كمال عبدالوهاب حموري.عمارخالد سامي عزالدين والقائمة تطول …التيش التش