(الفار) ظهر في القضارف!!

صابنها
محمد عبد الماجد
(الفار) ظهر في القضارف!!

· انتوا حكامنا بتاعين الدوري الممتاز ديل شافوا (كأس العالم) عجبهم موضوع (الفار) ولّا مالهم؟ – الحاصل عليهم شنو ؟ بقوا يطبقوا (الفار) من رأسهم.
· الشغل دا شغل (فار).
· فار .. وكمان (حاقد).
· شغل (كديس).
· فار واقف عليه عادل ابوجريشة.
· قولوا لحاكمنا ديل الدوري الممتاز حقنا دا ما فيه (فار) – ما تقعدوا تشرعوا لينا وتتفلسفوا فينا في الفاضي.
· حكم مباراة الهلال والشرطة (ما عاوز اجيب اسمو) كان كل مرة بطلع برة الميدان وبجي راجع.
· بمشي على (الحكم الرابع).
· فار (متحرك).
· اول مرة اشوف لي (فار) في الموبايل.
· قالوا ليكم (حكام تقنية الفيديو) – ما قالوا ليكم (حكام تقنية الموبايل).
· هسع لو سألنا حكم مباراة الهلال والشرطة (ما عاوز اجيب اسمو) امس عن اهداف الهلال التى تم نقضها وعدم احتسابها ح يقول شنو؟
· ح يقول رجعنا للفار.
· ام ح يقول لينا (الاهداف) راحت في استحقاق اتفاقية سلام جوبا؟
· الموضوع دا ما عندو علاقة بالسلطة.
· مدنية او عسكرية .. عشان حق الهلال يروح بهذا الشكل.
· في شنو؟
· وليه؟
· والله لو ما صلاة المغرب .. المباراة كانت تكون شغالة لوقتنا هذا.
· الحكم احتسب اكثر من (10) دقائق كزمن بدل ضائع.
· دا يقولوا عليه شنو؟
· المباراة انتهت بعد الدقيقة (100)… علما ان المباراة ما فيها اشواط اضافية.
· الظاهر كدا (الفار) ظهر في القضارف.
· فار صوامع السمسم.
· هدف مانو مالو؟
· عيبوه ليّ!!
· اذا قلنا الاول الحكم لم يحتسبه عشان (الشمس) والمباراة في بدايتها .. الهدف الثاني لم يحتسبه الحكم ليه؟
· جون مانو يعمل ليكم اكتر من كدا.
· ليليبو طردوه ليه؟
· نحن ما شفنا حاجة.
· يكون الحكم رجع للفار.
· ما عندها حل غير كدا.
· فار مترصد الهلال فقط… والدليل على ذلك ما شفنا لينا (علبة بمبان) واحدة في المباراة كما حدث في مباراة الشرطة والمريخ.
· ضربة الجزاء التى احتسبها الحكم للهلال .. ضربة جزاء (مركبة)… مدافع الشرطة في الاول ضرب جون مانو في قدمو .. ثم امسك به… الحكم كان مجبور يحسب (ضربة الجزاء) ما عندو أي طريقة.
· خجل.
· والله الزول دا لو ما اتجبر ما كان احتسب (ضربة الجزاء).
· مدافع الشرطة القضارف ما فضل ليه إلّا يثبت جون مانو بي (سيف) او بـ (9) طويلة ويقول ليه طالعني الخلا.
· المعنى طالعني برة خط 18.
· والله يا جماعة نحن بنقول الكورة نصر وهزيمة.
· وبنعمل فيها روحنا رياضية.
· وبنقول الناس تكون عادية .. وتتقبل أي نتيجة.
· وبنقول ما في فريق في الدنيا ما بتهزم.
· وبنقول ان الارقام في كورة القدم توضع من اجل ان تكسر.
· ما في رقم او متواليات بتستمر.
· ما في فريق بفوز طوالي .. حتى لو كان افضل فريق في العالم.
· فريق الهلال وصل للمباراة الثامنة تواليا في هذا الموسم في الدوري الممتاز بدون هزيمة وبدون تعادل.
· ما شاءالله.
· وصل لهذه المتواليات مع انه لعب في عطبرة مرتين ولعب امام الاهلي شندي في بربر ولعب امام الشرطة في القضارف.
· اصعب مباريات الولايات لعبها الهلال وتجاوزها بفضل الله بنجاح كامل.
· بالعلامة الكاملة.
· مبروك.
· والله فرحانين جنس فرح .. تقول جبنا كأس العالم.
· ما في احلى من انتصارات الهلال.
· كنت بقول ليكم في شنو؟
· بقول ليكم لمن الشوط الاول انتهى بهزيمة الهلال .. جهزت نفسي عشان اقول ليكم .. يجب ان لا توقفنا الهزيمة … مثل هذه الامور تحدث بشكل طبيعي في مباريات كورة القدم.
· يعني شنو لو خسرنا؟
· او اتعادلنا.
· لازم …نروض انفسنا .. ونعلمها على القدرة مع التعامل مع كل النتائج.
· النتائج ما كلها (انتصارات).
· لو كانت كلها (انتصارات) .. ما كان سوف يكون هنالك تنافس او متعة او اثارة او فرح.
· برشلونة وريال مدريد ومانشستر سيتي ما بحققوا في دورياتهم المحلية انتصارات متوالية دائما .. وان حققوها بجوا يوم ويخسروا.
· لازم نرتب ونجهز انفسنا لمثل هذه المواقف.
· لازم نعرف كيف نتعامل مع الخسارة.
· المهم ما نتكسر .. ولا نهد المعبد على رؤوسنا.
· رغم ان المسافة بعيدة في الدوري الاسباني بين برشلونة وريال مدريد والاندية الاخرى التى تلعب معهم في (الليغا) لكنهم مع ذلك بخسروا .. خلينا نقول ريال مدريد تحديدا في هذه الفترة بخسر في الدوري وبتعادل رغم انه الاقوى .. وما بنتصر طوالي.
· قبل انطلاق مباريات كأس العالم .. خسر ريال مدريد على ملعبه.
· عادي.
· وكذلك مانشستر سيتي في الدوري الانجليزي.
· الخسارة واردة في مباريات كورة القدم.
· خسرت الارجنتين.
· وخسرت المانيا.
· خسروا امام منتخبات اقل منهم.
· وانا بكتب في هذا العمود فرنسا خسرانة من تونس .. قبل ربع ساعة من نهاية المباراة.
· اما التعادل في مباريات الدوري فهو امر اكثر من طبيعي .. خاصة اذا كنت تلعب الساعة الثالثة والربع عصر وفي ملعب ارضيته (صعبة) زلط إلّا شوية .. وبتحكيم سيء .. وأمام خصم قوي مثل فريق الشرطة المحترم ومدرب كبير وقدير مثل المحترم شرف الدين احمد موسي وبتلعب مع كل هذه المعطيات امام فريق يلعب على ارضه.
· لا نقول يلعب امام جماهيره .. لأن جماهير الهلال كانت حاضرة في القضارف ودعمت الهلال ولم تقصر.
· مع هذه الظروف التى ذكرتها اعلاه طبيعي تخسر او تتعادل.
· التعادل في مثل هذه الظروف وبهذا التحكيم يعتبر (مكسب).
· الخسارة ما فيها شيء.
· مع ذلك .. نعترف ليكم .. ونقول ليكم رغم ايماننا بكل هذه المبررات .. إلّا اننا لا نقبل ان يتعادل الهلال.
· والله وقت الهلال يتعادل الدنيا تمسخ لينا.
· والكون يضلم في وشنا.
· والواحد فينا يشعر بي لفة وطمام بطن.
· والنوم يطير من عينا.
· واي شيء تمرق من نفسنا.
· ونشاكل ضلنا.
· والله لا تقول لي كأس العالم .. لا تقول لي هاردلك.
· ما بنقبل أي شيء في الهلال.
· نحن ما بنقبل التعادل .. الخسارة دي ما في حساباتنا .. مع تأكيدنا على انها شيء طبيعي في كورة القدم.
· كلموا فلوران.
· كلموا لاعبي الهلال.
· يا عبدالمهيمن .. يا خالد بخيت … جمهور الهلال دا لا يقبل الخسارة ولا التعادل.
· الانتصار ذاتو اذا تحقق من غير اداء .. جمهور الهلال بكون زعلان.
· عشان كدا اعملوا حسابكم.
· وخليكم عارفين .. كلموا فلوران .. ان الهلال عندما يلعب في الولايات يلعب في ظروف صعبة .. وامام اندية قوتها بتزيد وتتضاعف.
· الهلال بيلعب في وجود تحكيم ممكن يطلعك مهزوم من المباراة حتى لو سجلت سبع اهداف.
· هدف مانو مالو؟
· عاوز افهم.
· الفار قال شنو؟
· والله الناس ديل لو جابوا (الفار) .. تاني سلام الله ما يدوك ليه.
· في الواطة تاني ما يمشوا.
· ديل بدون (فار) بعملوا فينا كدا.
· الفار طبعا (اتخصخص).
· يحسبوا على كيفهم .. ويقولوا ليك رجعنا للفار.
· نفسي اعرف في القضارف رجعتوا لي منو؟
· والله لو رجعتوا لي مزمل ابوالقاسم .. ما كان بتعملوا في الهلال كدا.
متاريس
· والله يا جماعة بكتب في ظروف صعبة زي ظروف الهلال التى لعب تحتها في القضارف.
· مباراة تونس وفرنسا شغالة.
· وخائف الكهرباء تقطع.
· والفرحة غالباني.
· الحمدلله ان الانتصار تحقق بعد هذه (المعاناة).. عشان نفرح كدا.
· الحمدلله.
· جون مانو قدم مباراة كبيرة.
· ابوعشرين .. بقى 120.
· ما شاءالله.
· تونس لسه غالبة .. قبل ( دقائق من النهاية.
· ربنا ينصر تونس.
· الانتصار حلو.
· والهلال ان شاءالله دائما منصور.
· احسن ارسل .. قبل ما تقطع.
· الكهربة ما مضمونة.
· لكن عندي كلام كتير عاوز اقولو.
· بكرة برجع ليكم.
· ونكمل فرحتنا.
· ودامت الافراح.
· وكل مباراة والهلال ان شاءالله منتصر.
· ……..
· ترس اخير : يا رب ما تقطع.