القمر بوغبا عليك تقيل

في السلك

بابكر سلك
القمر بوغبا عليك تقيل

*ابتدر أبو الهل مشواره بالمجموعات متذيلا كالعادة
*فالموقف الآن صن داونز في الصدارة بثلاث نقاط وهدف ولعب مباراة واحدة
*في المركز التاني للمجموعة المريخ مشترك مع الأهلي القاهري ليس عليهما أي شي وليس لهما شي
*في المركز الأخير أبو الهل بدون نقاط من مباراة واحدة وله هدف منقوض وعليه هدف صحيح من تمريرة صانع اللعب الدولي بوغبا
*بوغبا مرر تمريرة لو مرر مثلها أربع تمريرات مع المنتخب بالكاميرون لضاعت البطولة على السنغال
*لكن العيب ما عيب بوغبا
*العيب عيب مجلس الهلال المستجد
*الذي لم يدرك أن الهلال بالزي الأبيض ضلو ما يغلبو
*على كل أبو الهل المناسب في المكان المناسب على ضنب المجموعة
*ولأول مرة يقدم الهلال خدمة للمريخ
*فلقد كشف لنا الهلال أن صن داونز يعيش على سمعته القديمة
*ويشبه لي المرة العجووووزة
*لما تجي ماشه الناس تقول زمان الحجة دي كانت موقفه الحركة
*ما تقدر تعاين ليها مرتين
*لذا وجب علينا الانتصار على هذا الفريق الضعيف
*سواء قابلناه في القاهرة أو أسوان أو حتى الفاتيكان
*وإلا تبقى قعدتنا في مصر أكتر من رمسيس ضاعت ساي
*فإقامتنا بمصر طيلة تلك المدة تؤهلنا لنيل الرقم الوطني المصري
*ناهيك عن تأهلنا للانتصار على صن داونز المتهالك الذي كشفه لنا الهلال
*المهم
*بالأمس انتصرنا على الخرطوم تلاتة بالتلاتة
*الجزولي ده قصتو طوووووويلة
*انتصار يمثل الخطوة التانية نحو البطولة
*وإذا الجزولي موجود
*سنخطوا نحو البطولة بهاتريكاتو
*إذا موجود
*قصتو طوييييلة
*إنه نجم يشبه المريخ
*المهم
*أخبار كاس كترت
*في اليوم سطاشر خبر
*نسأل الله أن يعين كاس على إصدار قرارها عشان نقفل الباب ده
*أيها الناس
*نتيجة الهلال أمس
*تجبرنا على الانتصار على الجنوب أفريقي
*حتى نرافق الأهلي لمرحلة جديدة
*وأي تهاون سيبعدنا عن مرافقة الأهلي
*ويؤهلنا لمرافقة الهلال
*ومرافقة الهلال ماحبابها
*لأنو الهلال بحب الحتانة موت
*مصر ولا الرفيق الفسل
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا المكلف بينا
*نعمل شنو بس ورينا
*كل المخدرات بقت ما بتشيل فينا

سلك كهربا

ننساك كيف والكلب قال كان عضينا يقولوا سعرنا وكان رقدنا يعفصوا فينا
وإلى لقاء