الكاردينال يصطاد الأرباب بالكجامة ..
بالعربي الكسيح
محمد الطيب الأمين
الكاردينال يصطاد الأرباب بالكجامة ..
* القاعدة الثابتة في الحياة السودانية هي أن كل سوداني يخرج من بطن أمه وهو هلالابي ..
* السودانيون كلهم هلالاب بالفطرة ..
* ولكن في ناس بتغالط الفطرة ..
* ولذلك نحن نقول أن أي مريخابي هو في الحقيقة مجرد (هلالابي زعلان) ..
* هذه هي القاعدة : (أي مريخابي هو هلالابي زعلان) ..
* القاعدة هذه لم يشذ منها إلا صلاح إدريس ( الملحن) ..
* صلاح إدريس ربما هو الوحيد الذي يمكن أن نطلق عليه: (مريخابي زعلان) ..
* مريخابي زعلان وعمل فيها هلالابي..
* وهذه حالة شاذة لأن الأصل حسب الفطرة أن تكون هلالابي زعلان ولكن الأرباب مريخابي زعلان ..
* وصلاح إدريس الذي يتعرى كل يوم يفشل تماما الآن في إمتحان الذكاء ..
* عرف الارباب عند أنصاره بأنه شديد الذكاء والدهاء غير أنه يسقط الآن ويتواضع أمام ذكاء الكاردينال ومجموعته ..
* إذا قدم الهلال طلباً لأهلي شندي بخصوص بوغبا أو لم يقدم – إذا استلم طلب الهلال بخصوص بوغبا عامل المعدات أو لم يستلم – في كل الأحوال الهلال كسب المعركة وانفضح أمر الملحن ..
* وأنا أحسب أن طلب نادي الهلال بضم بوغبا فيه كثير من الذكاء ..
* الهلال طلب بوغبا وهو في الحقيقة عمل (شرك) و(كمين) لصلاح إدريس ..
* الكاردينال خت قطعة طماطم في(الكجامة) وجدعها لصلاح إدريس ..
* والكجامة للذين لا يعرفونها هي وسيلة (شرك) تشبه السنارة مع اختلاف المهام والتخصص والتصميم لكل واحد منهما ..
* عرف الكاردينال أن صلاح ادريس أصبح كرتاً محروقاً في مجتمع الهلال ومع ذلك قصد الكاردينال وبذكاء شديد أن يزيد الارباب حريقاً ..
* زادو حريق وقال ليهو دايرين بوغبا وخلاهو يجقلب ..
* الكاردينال يعلم أن صلاح مستحيل يفك لاعب للهلال ولكن الكاردينال يريد ان يعري صلاح أمام أنصاره وقد كان ..
* الكاردينال يعلم أن صلاح الذي خطف لاعباً في طريقه للهلال (لاعب المهدية) وسجله لأهلي شندي ثم اعاره للمهدية – الكاردينال يعلم أن صلاح هذا لن يفك لاعباً للهلال ..
*الكاردينال يعلم ان صلاح الذي أهدى اللاعب سيلا للمريخ (متكفي ومتكفل بكل نفقاته) – لن يفك لاعباً للهلال ..
* الأرباب الذي قبل فكرة إنتقال مالك وباسيرو للمريخ لن يفك بوغبا للهلال ..
* الأرباب الذي (يكره الكاردينال ولا يحب الخير للهلال في عهد الكاردينال) لن يفك بوغبا للهلال ..
* الأرباب الذي شتم الحكيم والكيماوي وشيخ العرب والحاج عطا المنان والكاردينال وسعد العمدة وعماد الطيب – لن يفك لاعباً للهلال ..
* الأرباب الذي أهدي المريخ طمبل عبر كبري اورلاندو ثم شطب لهم كلتشي وهو في قمة مجده – لن يفك لاعباً للهلال ..
* الأرباب الذي طالب بكل القروش الدفعها للهلال – لن يفك لاعباً للهلال ..
* بل نقول: الأرباب الذي صنع أهلي شندي بسبب (زعلة من الهلال) ..
* زعلة ساكت من الهلالاب مشى عمل أهلي شندي ..
* هرب من الهلال ولما جا راجع الهلالاب هربوا منو فقام زعل ومشى عمل أهلي شندي ..
* زول زي ده ما بفك لاعب للهلال ..
* والكاردينال عااااارف الحاجة دي ولكنه استخدم الذكاء وزاد الأرباب حريقاً..
* وأنا والله لو كنت محل الكاردينال كل فترة تسجيلات سأتقدم بخطاب أطلب فيه ثلاثة لاعبين من أهلي شندي ..
* كل تسجيلات أعمل ليك خطاب وهمي عشان تحرق الملحن ..
* القصة ما قصة بوغبا، القصة قصة إنو الفيك اتعرفت..
* حاليا أفضل ارتكاز في السودان إسمه أبوعاقلة وهو يلعب في الهلال ..
* وتاني أفضل ارتكاز في السودان يلعب في الهلال واسمه الشغيل (معار) .
* وأفضل لاعب وسط عصري في السودان إسمه نزار حامد وهو يلعب في الهلال ..
* يعني الهلال ما واقف علي بوغبا ولا واقف علي صلاح ادريس ..
* انت يا صلاح ادريس قبل كده سجلت هيثم مصطفى في الأهلي.. عملت شنو يعني ؟
* شاركت في الأبطال يعني ؟
* عموماً نحن نبارك لناس شندي كأس السودان البطولة غير المحببة للهلال ..
* نبارك لهم هذا الكأس الذي تحقق لأن المريخ الشهير بالمدفور سمح لهم بذلك ..
* لولا انتكاسة مدفور البلد وارهاق سيد البلد لما حقق الأهلي هذا الكأس ..
* نبارك للهلال هذا الكأس لأن الهلال هو الذي بسببه أصبح أهلي شندي شيئا مذكوراً ..
* بل ان بسبب الهلال أصبح صلاح ادريس شيئاً مذكورا.
* وشكراً للكاردينال الذي جعلنا ننظر لصلاح إدريس وهو بهذا التواضع في الفكر والمضمون ..
* صلاح إدريس قال لن يطلق صراح أي لاعب من التشكيلة الأساسية ..
* طيب وكت سجلت سيلا للمريخ كان قاعد في الكنبة وألا شنو ؟
* لما فكيت مالك وباسيرو كانوا خارج قائمة الـ(18) وألا شنو ؟؟
* صلاح ادريس بتلذذ لما يرفض طلباً للهلال ومسكين ما عارف الكاردينال بتلذذ لما صلاح يتعرى ويسقط من نظر الهلالاب ..
* لو كان صلاح ادريس ذكياً لقام بتسجيل أي لاعب يطلبه الهلال حتى يحافظ على شعرة معاوية التي انقطعت أصلاً.
* كان ممكن يفوت الفرصة للكاردينال ويستجيب للطلب لكن وعلى ما يبدو أن فوز الهلال على المريخ وتحقيق اللقب قد أغضب الملحن ..
* هو عليك لو ما ساي إرادة في زول ببقي ملحن بعد عمرو يتجاوز الخمسين ؟
* الحاجة الخطيرة التي لا يعلمها الأرباب هي هل كل لاعبي الأهلي شندي وأسرهم مبسوطين وقنوعين بلعب لأهلي شندي مدى الحياة ؟؟
* زي ما كان الهلال بالنسبة لصلاح ادريس حلم وأمنية فهو الآن حلم وأمنية بالنسبة لكل لاعبي أهلي شندي بما فيهم بوغبا ..
* صلاح ادريس بيدي اللاعب كلام حلو بدون قروش ومع ذلك يتجمل ويخدع اللاعبين ..
* لا نود ان نتحدث عن قصص حمودة بشير مع صلاح إدريس عقب تسجيله لهيثم مصطفى في كشوفات الاهلي شندي ..
* وكثير من القصص والحكاوي..
* صلاح حتى بالنسبة للاعبين بقى كتاب مفتوح ..
* الشعب السوداني يا أرباب ما بقتنع بلاعب ما لعب للهلال او المريخ ..
* ما تغش نفسك ..
* لاعب ما وصل القمة ما في زول بقتنع بيهو، والحاجة دي كل لاعبي أهلي شندي عارفنها ..
* ما تتعب نفسك ساكت لأنو أهلي شندي سيظل أهلي شندي ويظل الهلال هلالا ..
* نسيت حاجة ..
* صلاح إدريس لما يقرأ العمود ممكن يخلي أي حاجة في العمود ويقول ليك محمد كتب (هلالابي زعلان) والصحيح هلالي وليس هلالابي ..
* وغايتو جنس غايتو .
* ونركب صافنات ونجيبة (هلالابية) واصلو الزول بيموت والذكرى تفضل حية ..
* و…و..
* واعذريني الدمعة ديا بقت ….(سليقة باردة) ..
مساك الله بالخير يا ود الطيب، مقال موفق بكل المقاييس، أصاب كبد الحقيقة وفقأ عين الثور….. إلى الأمام أيها الفارس الهلالي والله يحفظك ويسدد خطاك.
الاستاذ محمد الطيب المحترم – لقد ضم مقالك بين دفتيه نصف ما جال بخاطري يوم أن سمغت صلاح ادريس يحكي عبر التلفون بعد انتهاء مباراة كأس السودان بخيرها وشرها. تمنيت في تلك اللجظة لو اتيحت لي الفرصة للمداخلة والرد على صلاح ادريس وحديثه الذي ينضح سما زعافا وحقدا وأذى وتهكما تجاه الهلال الهلال والهلال ثم جهور الهلال الذي أتى بالكاردنال رئيسا ثم بالكاردنال . أقول له ماذا فعل بك الهلال حتى تحمل له كل هذا يا سيد/ صلاج إدريس؟ أنت تعلم أن الهلال هو 50% من شعب السودان (هذا طبعا احتراما لأخوتنا في المريخ) فلماذا تحارب نصف شعب السودان لماذا تبغض نصف شعب السودان بمحاربتك وبغضك للكاردنال لانه هو رئيس نصف شعب السودان إن لم يكن أكثر من ذلك بكثير؟ ابقى مع أهلي شندي واعلم انه مهما حقق من كؤوس فلن يبلغ شأو الهلال بل ولن يبلغ حتى شأو المريخ. وأتمنى أن اجد فرصة افضل للرد على كل ما جاء في حديث السيد/ صلاح إدريس .