الما ثبت مع موتا ..مسمار ما بثبتو والغربال لا!!!

العمود الحر
عبدالعزيز المازري
الما ثبت مع موتا ..مسمار ما بثبتو والغربال لا!!!

*الهلال بدأ يرجع شوية شوية ..وشكلو كده موتا مع (قوة ) القلب العليهو..بقي عارف خفايا دورينا وعقلية اللاعب السوداني
*اهو ماشين كويس واكبر العقبات اتخطاها.اهلي شندي ومعاهو الوادي ..الباقي ساهل بما فيهم الوصيف الخفيف ..
*غايتو في كل مرة موتا يفاجئ الهلالاب بتشكيلة جديدة! والجمهور زاتو بقي ما عارف الأساسي من التايواني
*أي لاعب اخد فرصة ومدرب يخلي الغربال (بره) وياسر مزمل واوتارا وارنق ورؤوفا ! معناها عندو كلام تاني
*انا زاتي احترت حسين النور من اخر مباراة كان النجم الأول فيها …تاني ما شوفناهو ..يعني البكون قمر وبدر تاني ما بظهر
*موتا شغال تدوير !!
*غايتو ودا من حظ اللاعبين الحاليين في الهلال..كدي واحد يقول مافي زول فيهم اخد فرصة ..الجونا (كرت) كرتونة بالتسجيلات التكميلية الإسعافية شاركوا تباعا
*في بعض الفنيين من أبناء الهلال وجدوا هذا المنحي والاتجاه الذي يقدمه موتا مع الهلال فيه اخلال وعدم تجانس بين افراد الفريق وبالتالي ستكون نتائج الهلال غير مستقرة طالما ان هنالك عدم ثبات للتشكيلة
*قلق الغائب وبوغبا كانوا حضورا امام حي الوادي مع عثمان ميسي ضمن التشكيلة الأساسية لموتا! هذا ان دل انما يدل ان الهلال يملك كتيبة من اللاعبين تحتاج لمن يوظفها ويخلق التجانس بينها
*شكل الهلال في ارتفاع ملحوظ رغم عدم ثبات التشكيلة الأساسية لكن الطريقة العامة والتمرير المحسن أصبح ظاهرة مع الاستحواذ والصناعة ومازالت ندرة الأهداف تصيب المقدمة الهلالية رغم وجود الغربال والشعلة و(مزمل) لا!
*انتصر الهلال وحقق الثلاثة نقاط في سبيل استعادة صدارة الدوري بعد قرار لجنة الاستئنافات التي قضت بإعادة مباراة الفريق مع الأهلي الخرطومي التي انتهت بالتعادل
*الأمور الفنية في الهلال والحكم علي الفريق في المرحلة الحالية يجب ان يقاس وفق اراء فنية ترصد وتحلل لا اهواء جماهير حتي يعلم الجميع هل المشروع يبشر بالنجاح ام الفشل
*وعلينا أيضا ان نحلل الأداء الفني للطاقم البرتغالي من قبل لجنة فنية لأننا عندما نملك مدرب نثق في قدراته فإن الفريق يمكن ان يحقق أحلام الجماهير الهلالية
*الشماعة التي كنا نتحدث عنها في الماضي بعدم اتاحة الفرصة للاعبين وذهابهم كما حدث في حالات كثيرة ..اصبح الان سراب ويبقي ان أي لاعب يملك الفرصة لتقديم نفسه طالما ان موتا مستمر مع الهلال
*كلمة حرة أخيرة…لا تفريط في الدوري
كلمات حرة
*محمد عبد الرحمن الغربال دون شك نجم الشباك الأول ونجم السودان، اسم صنع وتربي أولا في هلال الملايين ونهل منه ثم في رحلة احترافية داخلية مع الوصيف المريخ ثم خارجية في الجزائر ليسطع اسمه ويكون الحلقة الأقوى في فريقه
*عاد الغربال للهلال بصفقة مادية كبيرة تنافست فيها القمة واختار العشق الأزرق عنوان له! الغربال نجم النجوم الذي يمكن ان يراهن عليه الجميع ويكسبوا الرهان
*لكل جواد كبوة وضياع ركلة جزاء امام حي الوادي نيالا لا ينبغي ان تكون عنوان للنيل من الغربال. وعلي جماهير الهلال دعم لاعبي الفريق فكما عاد الشعلة وعاد ابوعشرين وارنق والشغيل بعد ان تعرضوا لحملات مقصودة بالدعم والقوة نتمنى ان يفطن الجمهور الهلالي لما يتعرض له نجوم الفريق
*تابعت اراء سلبية كثيرة تجتاح الوسائط وحديث عن الغربال بصورة وصلت حد المطالبة بالمحاكمة ووضعه قيد الحبس في دكة بدلاء الهلال
*هذه حملات ستؤدي لفقدان الثقة ان لم يتم التعامل معها من اللاعب أولا ومن الاعلام ثانيا بصورة إيجابية
*لا أحد فوق النقد، والغربال مثله مثل غيره من اللاعبين، لكن هنالك خوط ما بين نقد الهدم ونقد البناء.
*ما يتعرض له اللاعب الهلالي فاق التوقعات يا اخي ما ممكن شوفوا جيرانكم صنعوا من فسيخ صلاح نمر عسل قاده ليكون قائد المنتخب الأول بعد امرخة المنتخب!! بدعم مريخي كامل الدسم
*فوقوا يا هلالاب !! ليكون الدعم للاعبين عنوان نجاح المشروع القادم
*اخر كلمة حرة ..هاشتاق …نجوم الهلال لا!
حكاية
حملت الوسائط تعرض الجاكومي للإعتداء والضرب بعد ان لبي إفطار الدعم السريع!! الف سلامة ما تشوف شر..لكن هل تم الاعتداء علي الجاكومي من قبل جماهير مريخية غاضبة كما راج في الوسائط ..ام جاء الاعتداء بسبب انتماء الجاكومي لجماعة الموز والقصر كواحد من قادتهم !!لا اعتقد ن الجماهير المريخية يمكن ان تقوم بمثل هذا الفعل الغير رياضي….يجب محاسبة من (دق ) الجاكومي !