المريخ بقى زي (الجالية البرازيلية)..!!
صابنها
محمد عبد الماجد
المريخ بقى زي (الجالية البرازيلية)..!!
· وصف رئيس نادي المريخ ايمن ابوجيبين نائبه اسامة عبدالجليل بأنه (رجل خارق)!!
· يا ربي (الساعات) غيروها؟
· هسع علاقة (الساعات) بالموضوع دا شنو؟
· زي علاقة (رجل خارق) بأسامة عبدالجليل.
· الزول دا لو صدق … كبرى المك نمر تاني ما بفتحوه.
· رجل خارق !! .. طيب لو كان عندكم (العليقي) كان قلتوا عليه شنو؟
· زول مسجل ليه (سنغالي) من بطولة الشأن في الجزائر ومسجل ليه (كنغولي) في تنزانيا وغاني من منتخب المحليين ومالي من حي العرب.
· ديل لو عندهم العليقي كان لعبوا مباريات مرحلة المجموعات في ميدان عقرب.
· الاتحاد الافريقي كان اجاز ليهم ملعب عقرب.
· لا اضاءة .. لا كراسي .. ما شرط.
· ولا سور.
· الموضوع ما محتاج.
· نحن لغاية الآن ما في زول قال مننا على ان العليقي (رجل خارق).
· المريخ سوف يلعب مبارياته خارج ملعبه .. مرة يقولوا ليبيا ومرة تنزانيا ومرة يوغندا .. وابوجيبين بتكلم عن (رجل خارق) في المريخ.
· وين الكلام دا؟
· ناس ابوجريشة راحوا فيها.
· ابوجيبين قال ح نلعب في استاد المريخ … ما لعب.
· كلام!!
· ابوجيبين قال ح نلعب في استاد المدينة الرياضية .. ما لعب.
· كلام!!
· ابوجيبين قال ح نلعب في استاد الهلال .. ما لعب.
· كلام.
· ابوجيبين بتلكم ساكت.
· هي (الصور) بقروش.
· الله يستر على ملعب الشهداء في ليبيا.
· الغريبة ناس مزمل ابوالقاسم فرحانين بالكلام دا.
· لو كان على الكلام ..سوداكال ممكن يلعب المريخ في (الكامب نو).
· رجل خارق سجل ليه (4) برازيليين اصغر واحد فيهم تعدى الثلاثين ..وبعد البرازيليين ديل (عمر سنة واحدة في المريخ) منتظرين (مشاطيب) الهلال.
· اذا كنتم انتوا في نفسكم ما عندكم ثقة فيهم وسجلتوهم لعام واحد .. نحن نجيب ليهم ثقة من وين؟
· برضو للعمر احكام.
· ركزوا في مشاطيب الهلال احسن ليكم من البرازيليين ديل.
· اربعة برازيليين لعبوا امام (اختبارات) انبي ما عملوا أي شيء.
· منتخب البرازيل لاعب ضد (اختبارات) انبي .. والمباراة انتهت تعادل.
· فضيحة السواد.
· الهلال لعب اول مبارياته في دار السلام امام فريق محترم وفي حضور جماهيري كبير وبدون المحترفين عدا ايمورو واجاجون وجيرالد الذي شارك في اخر (5) دقائق .. وتعادل الهلال بهدف ياسر جوباك.
· انتوا (جوباك) ما عندكم … جوباك طلع افضل واحسن من برازيلي المريخ وجوباك عمره (19) سنة ويشارك لأول مرة مع الهلال.
· تتخيلوا جوباك شارك لمدة (7) دقائق وسجل للهلال.
· انتوا يا ناس المريخ البرازيليين بتاعينكم ديل (سمع)؟
· ريحة ؟
· حلكم بس في (مشاطيب) الهلال.
· مشاطيب الهلال بقوا يتشطبوا مرتين في السنة.
· مرة في الهلال.
· ومرة في المريخ.
· الموضوع دا زي الطالب البيسقط في اللغة العربية والرياضيات وبيشكي من التاريخ!!
· والي ولاية الخرطوم احمد عثمان حمزة تأسف على حال المريخ .. والمريخ عندو (رجل خارق).
· حالة تحنن!!
· رجل خارق نزّل (الامير) للاولي ورجّع المريخ في (انصاص الليالي) من مروي.
· بدون عشاء.
· اللاعبون باتوا القوا في اليوم داك.
· رجل خارق كيف يعني؟
· عاوزين نفهم.
· البلد دي لا فيها كهربة.
· ولا ملاعب.
· والشوارع مترسة.
· والكباري مقفلة.
· وناس المريخ بتكلموا عن (رجل خارق).
· رجل المستحيل.
· والشياطين الـ 13 ذاتهم.
· ناس (الدعم السريع) القاعدين يدفعوا للمريخ حقهم راح ساكت .. واسامة عبدالجليل طلع (رجل خارق).
· اكيد ابوجيبين قاصد بهذه الكلمة (فهم) تاني.
· يمكن اسامة عبدالجليل بجر الخمسين قبل ما تقع الواطة .. عشان كدا قال عليه (رجل خارق).
· يا زول اضبط تصريحاتك .. البلد دي ما فيها (رجل خارق).
· يقوم حميدتي يسمعك يزعل.
· نحن ايام الطيب عبدالله وصلاح ادريس والكوارتي والسماني في الهلال وشاخور وابوالعائلة وفيصل عبدالله وعزالدين الربيع كنا ما بنسمع بـ (رجل خارق) دي .. نجي نسمع بيها هسع في زمن اسامة عبدالجليل.
· شاخور عندو طابق في استاد المريخ عديل ، ما سمعنا يوم واحد قال عنه (رجل خارق).
· المريخ في زمن اسامة عبدالجليل بيلعب برة ملعبه .. وبقولوا ليك بعد دا كلو اسامة عبدالجليل (رجل خارق).
· الزول الرجّع المريخ من مروي (في انصاص الليالي) ورفض تلبية دعوة مريخ كريمة وشال مدرب الامير البحراوي (بين الشوطين) فعلا (رجل خارق).
· دي ما بعملها إلّا (رجل خارق).
· منير نبيل رئيس بعثة المريخ في القاهرة قال تسجيلات المريخ كلفت (2) مليون دولار.
· انتوا الدولار في مصر وصل المستوى دا؟
· معقولة عمولات السمسرة اكتر من مليون و860 الف دولار.
· 2 مليون دولار في شنو؟
· في (4) برازيليين نحن في الهلال (مشجعين) ما بنقبلهم.
· يا ناس (الدعم السريع) اوعكم يغشوكم.
· انتوا غاشين البلد كلها.
· ما يقولوا ليكم التسجيلات المريخ دفع فيها (2) مليون دولار.
· هو المريه دفع حاجة.
· بس عشان الامور تبقى واضحة.
· يا ريت البرازيليين الاربعة تعملوا ليهم مع الكشف الطبي (كشف للعيون).
· وتشوفوا (السمع).
· انا عارف الكلام دا في الكشف الطبي للمحترفين ما في .. لكن للعمر احكام.
· اعملوا ليهم كشف للعيون والسمع.
· قالوا ليك ريكاردو امس والمريخ يلعب امام انبي كان المباراة كلها بكورك للبرازيليين ما في زول مشى عليه غير كرشوم.
· كرشوم برازيلي؟
· اكشوفا ليهم النظر زي كأنكم عاوزين تطلعوا ليهم رخصة قيادة.
· انا اول مرة اسمع لي بي (رباط الصليبي) في العيون.
· المريخ مع ايمن ابوجيبين لن اقول انه سوف يفقد حازم مصطفى او سوداكال .. اقول ليكم المريخ مع ابوجيبين سوف يفقد الجاكومي.
· الجاكومي ذاتو ح تبكوا عليه.
· معقولة بس.
· فريق المريخ بقى زي الجالية البرازيلية.
· عشان تبقوا عارفين.
· وعشان ما تقعدوا تتغالطوا لي كتير.
· من الليلة انا ح اقول للمريخ (الجالية البرازيلية).
· الجماعة ديل ما عندهم أي علاقة بالكورة .. ديل مجرد (جالية برازيلية).
· انتوا ما بترضوا زول يقول ليكم الحقيقة.
· فريق المريخ بقى فريق (الجالية البرازيلية).
· كان ترضوا وكان تزعلوا.
· ……………..
متاريس
· الهلال لو تسجيلاته زي تسجيلات المريخ كان انتهى منها في اول (10) دقائق في التسجيلات.
· نتمنى اليوم ان تكلل كل الخطوات بالنجاح والتوفيق.
· نقول ان شاءالله.
· ملف الشطب والاعارات اختبار اخر لمجلس الادارة.
امال هلال غرب أفريقيا وشمال الكنغو
عالم ما بتشوف عوجة الرقبة
١١ لاعب من غرب أفريقيا
نسيت هلال نيجيريا يا رول
مشكلتك انك بتكره المريخ اكثر مما تحب الهلال
كاتب عمود ماعندو اي معني
براحه على الجماعة يا عبدالماجد احسن ما يجدوا حاجة يغطوا بيها حفرتهم حتى الجاكومي اللي كسر الطلبة ما قدر يجيب لهم قلاب الرملة ما ادري قالوا قلاب الرملة اتحركت من تركيا اظنه ماص في البحر في الطريق ههههه جوالات سكر رمل عمك اب جيب وين ما قادر يردم الملعب بتراب الواطه وحول الحفرة الا دار للعجزة والمسنين دار العجزة ولمسنين للجالية البرازيلية هههه
كشف النظر الا يكشفوا ليهم بقعر الكبابي عشان يمروا في الكشف والسمع الا يركبوا ليهم طبل جديدة احسن الجاكومي يكسرها ليهم
لا تقول طبله اصلا احسن الجاكومي يطلع لك من الحفرة
ما تزعل يا محمد يمكن “رجل خارق” دي مقصود بيها “أخرق” لأنه هو أصلاً أخرق وارعن كمان بس عجبتني حكاية السمسرة الوصلت اكتر من مليون و860 الف دولار أإنت عاوز “اليخماو” بيطبل لي أبجيبين و”الرجل الأخرق” سايي هههههه
والجالية الافريقية الجوة بيتكم دي كيف المريخ خليهو في حالو شوفو حالكم الما بسر ده بيننا مسابقة الابطال والحشاش يملا شبكتو ٠٠٠٠ لكن بعدين ما تزووقوووو زي كل مره كل ما ينهزم ابو الهل خليكم رجااااال وعلي قدر اهل الكرم المريخي تجي المكارم والعزايم وعلي قدر اهل الهلال تجي المصايب وشدووو حيلكم وقولووو الحقيقة وما تزووووقوووو بعدين ولنا لقاء
زول منتدب من صحيفة مع الهلال عشان يكتب عن معسكر الهلال برضو شغال … اخر الزمان وداير يخفف دمو على الصحافة لو دة حالكم
ما تنسى هلال الكنغو من الرأس إلى القدم حتى طاقم التدريب كنغو هههه الككو الكنغولي كككو