المريخ يصعد للصدارة مجدداً بفوز صعب على حي العرب

صدارة مقعد حلاق و24 ساعة إن شاء الله تركبوا الجو وتعودوا لوصافتكم إعتبارأ من المباراة الجاية بإعتبار إنو دي آخر صدارة ليكم في الممتاز الموسم ده…..وكالعادة كان التحكيم هو الحامي الأمين للمرخرخ، وماخلي حاجة ماقدمها أمبارح عشان يقفل نفس لاعبي حي العرب المبدعين، شلاليت وشوت بالكورة وإعتداءات وحشية من الجزارين عاطف خالد وعمو باسكال ونمر الورق وعمو التاج العجوز والماسورة محمد آدم ، حتي السماني الصواي لمن نزل ناول ليهو فرارين تلاتة للاعبي حي العرب المساكين العجز الحكم عن حمايتهم، ولو كان هنالك تحكيم أجنبي أو أستديو تحليلي محايد ومافيهو شغل مجاملات وموازنات وصحوبية كان أقر بوجوب طرد مالايقل عن 3 أو أربعة لاعبين من متفلتي المرخرخ، خصوصاً عاطف خالد اللقي الشغلانة حلوة من مباراة الشرطة القضارف ومشي علي النغمة بتاعة التصفية الجسدية ومعاهو العجوز التاج إبراهيم في عمليته القبيحة قبل نهاية المبارة وشوته للكورة في وش اللاعب الساقط علي الأرض بوحشية وامام ناظري حكم الراية والكوتش صلاح احمد آدم والحكم أب زنقلة …………….ربنا بيسألكم يامرخرخين وماتفتكروا إنو الشغلانة كورة ساي زي مابيغشوكم علماء الغفلة، الخلق الناس البيلعبوا الكورة ماخلقهم عشان يظلموا …..وكلو بتلقوهوا قريييييييييييييب إن شاء الله، ولو إنتوا بتفهموا كان عرفتوا سبب الفشل لمدة 15 سنة شنو مع إنو كابين في الحفرة قروش الشعب السوداني كلها !!
جمهور المرخرخ المتفلت كعادته مارس الإرهاب علي طاقم التحكيم وخلي الحكم يصهين علي شغل الجزارة ضد لاعبي حي العرب المساكين !!
لكمة أخيرة: أحلي لقطة في المباراة هي عملية الطرف اليمين لحي العرب في عمو باسكال الواو وموية الضهر العملها ليهو هو ومحمد آدم لمن خلي الجماهير المتفلتة تفلق وتطقع هههههههههه