المنافسة وشوربة ام مرسي
صابنها
محمد عبد الماجد عدالة
المنافسة وشوربة ام مرسي
• ما ح اتكلم ليكم عن (شوربة ام مرسي) .. بس بقول ليكم هي جاءت عرضا على لسان الممثلة ليلي فهمي في فيلم عادل امام وميرفت امين (واحدة بواحدة) الفيلم المعروف عند الجمهور بـ (الفنكوش).
• ما ح اجيب سيرة (شوربة ام مرسي) .. بس أي زول شاف هذا الفيلم في يوم من الايام يتذكر كلامي دا.
• وبعرف انا قاصد شنو؟
• بقع ليكم كلامي دا وقت تشوفوا الفيلم.
• ح اتكلم ليكم الليلة عن الجاكومي .. وعن عدالة المنافسة.
• وقت يكون ما عندنا موضوع بنتكلم عن الجاكومي.
• نتونس بيه.
• خلونا نضحك على الجماعة شوية.
• عدالة المنافسة الجاكومي بعرف عنها شنو؟
• اخر زول ممكن يتكلم عن (عدالة المنافسة) هو الجاكومي.
• عدالة المنافسة دي كانت وين يا الجاكومي وقت تأمرت على الثورة في انقلاب 25 اكتوبر.
• انت اخر زول يتحدث في الحتة دي.
• ولا كلمة.
• هل (عدالة المنافسة) هي كما قلنا سابقا في الاتفاق الذي تم بين المريخ والأهلي المصري والتواطؤ الشهير الذي تحدث عنه الجاكومي بنفسه.
• لو الجاكومي بعرف حاجة عن (عدالة المنافسة) ليه ما كان عندو موقف من ذلك (التواطؤ) المثبت عن طريق (الرئيس المناوب) شخصيا.
• انا اول مرة اشوف لي رئيس مناوب لا عندو كلمة ولا عندو قرار.
• تقول مناوب ليه في كشك بسط امن.
• ما اكتر من كدا.
• انا اول مرة اشوف لي (رئيس مناوب) لا بدفع ولا بساهم .
• رئيس مناوب في التصريحات؟
• والفارغة.
• الجاكومي عاوز يثبت للمريخاب انو بقدر على الهلال.
• الهلال دا (الانقاذ) كلها ما قدرت عليه .. عاوز تقدر عليه انت؟
• الجاكومي بذكرني بالزول البتكون عاوز منو قروش .. تقوم تلاقيه فجأة في مناسبة … يقوم الزول دا لا يختفي منك ولا يرجع ليك القروش … يقوم يقول ليك وقت تلاقيه عاوز منك قروش تاني.
• يا زول انت القروش الشلتها ما رجعتها!!
• في قوة عين اكتر من كدا؟
• الجاكومي نفس الشيء.
• نطلع فاصل ونرجع تاني.
• طلعوا (الكراسي) في الحوش.
• الجاكومي عاوز يحدد برنامج مباريات الهلال في الدوري!!
• دي ابوعرام ما بعملها!!
• الجاكومي عاوز يحدد للهلال الملعب الذي يجب ان يلعب فيه الهلال مبارياته في الدوري .. ان شاءالله الهلال يطلع (جبل اولياء).
• والجاكومي عاوز يبرمج مباراة الهلال والأهلي الخرطوم في بورتسودان.
• عاوز يبقى لجنة المسابقات واللجنة المنظمة واللجنة الامنية.
• يا جماعة دي (شبك) شنو دي؟
• الجاكومي عاوز الهلال يدفع ليه 500 الف دولار.
• والجاكومي عاوز بعد دا كل يلعب في استاد الهلال مباريات الدوري الممتاز.
• فالح لكن.
• نوع دا قابلكم في حتة؟
• الجاكومي دا متل الزول البكون ماشي (المنشية) يقوم يركب ليها مواصلات الثورة بالنص.
• يا الجاكومي (الثورة) ما بتجيبك بهذا الشارع.
• عليك الله بالمرة كدا تعال يا الجاكومي واستلم مفتاح نادي الهلال عليك الله بالمرة كدا.
• نحن نخلي ليك الهلال احسن.
• لا جمعية عمومية.
• ولا مجلس منتخب.
• ولا الحركة الوطنية.
• الزول دا نصيح؟
• انت الحاجات العاوز تعملها في الهلال يا الجاكومي في المريخ ما قادر تعملها عاوز تعملها في نادي الحركة الوطنية.
• والله هانت الزلابية.
• انت فاكر الهلال دا الجبهة الثورية؟
• قايلو كيان الشمال؟
• العب بعيد.
• ما تبعد اكتر من نيل الحصاحيصا.
• يا زول الهلال دا لو ما عارف عندو جمعية عمومية … بتقيف الف احمر في أي حاجة.
• مجلس الهلال ما بقدر يتخذ ليه قرار من غير ما يرجع للجمعية العمومية.
• انت عاوز بي جلابية وعمة تحكم الهلال.
• والله هانت الزلابية.
• زول في مجلسو ما معترف بيه … لا الفيفا لا كاس لا الاتحاد السوداني معترف بي مجلس حازم .. ولا مجلس حازم ذاتو معترف بالجاكومي.
• وعاوز بعد دا كلو تلعب على الهلال.
• وتلعب في الهلال.
• كدا ثبت نفسك في مجلس حازم اولا ..باعتبارك (الرئيس المناوب) وبعدين تعال اتكلم عن الحاجات الكبيرة دي.
• نطلع فاصل احسن.
• بخصوص نية الاتحاد العام ان يلعب الهلال مبارياته في الدوري الممتاز خارج ملعبه من اجل (عدالة المنافسة) لأن الهلال رفض ان يلعب المريخ مباريات الدوري في ملعبه نسألكم سؤال.
• او خلونا نقول نسعلكم (سعال).
• عشان انتوا السؤال العادي ما بنفع معاكم.
• السؤال ذاتو كتير عليكم.
• عاوزين تشتهروا على حساب الهلال.
• الهلال وقت رفض ان يلعب المريخ مبارياته الافريقية في استاد الهلال .. هل قام الاتحاد الافريقي بتحويل مباريات الهلال ليلعبها خارج ملعبه من اجل عدالة المنافسة؟
• نحن مالنا.
• تلعبوا في مصر.
• او جنوب افريقيا.
• نحن عندنا ملعبنا جاهز ومجاز من الاتحاد الدولي .. ليه نلعب في جبل اولياء؟
• اقول ليكم حاجة .. عشان نحن نستفيد من الموضوع دا .. وندخل المريخ في (ورطة) ونقطع لسانهم … ارفعوا رسوم اللعب في استاد الهلال الى 100 الف دولار.
• أي فريق عاوز يلعب في استاد الهلال ما عندنا مانع يلعب في الجوهرة ، بس يدفع 100 الف دولار على أي مباراة تلعب في الجوهرة.
• والمنتخب الوطني .. عشان الهلال نادي الحركة الوطنية .. ممكن نعفيه من هذه الرسوم .. رغم ان هذا الاتحاد ما بيستاهل.
• لكن المنتخب ما حق زول.
• عاوزين تلعبوا في استاد الهلال تدفعوا 100 الف دولار.
• عشان نسوف لجنة المسابقات بتعمل شنو في الحتة دي؟
• برضو ح يقولوا عدالة المنافسة.
• وشوربة ام مرسي.
• تاني جبت ليكم سيرة (شوربة ام مرسي) من غير ما اقصد.
• اعفوا لي.
• نوع ديل ما بنفع الكلام العادي معاهم.
• احسن تجيهم من الشارع التاني.
• …………..
متاريس
• طبعا في ناس بعتبروا ان اجازة النظام الاساسي بهذه الصورة مشكلة .. والحقيقة ان في عدم اجازة النظام الاساسي الهلال بكون عندو مشكلة.
• عاوزين تفكوا الهلال لكيزان ومريخاب المفوضية والاتحاد.
• الديمقراطية فيها مشاكل .. وفيها عقبات .. لكن مشاكلها وعقباتها افضل من مشاكل وعقبات غيرها.
• العندو حاجة يقولها في صناديق الاقتراع.
• الهلال انتظر كثيرا.
• عملتوا شنو يعني؟
• التنظير الكتير مرات بيوهم اصحابه.
• ما تنظروا على حساب الهلال.
• العندو نظرية خاصة يعملها لي روحه.
• اعداد الهلال يجب ان يبدأ بصورة سريعة وعلمية.
• سوف تكون هناك فروقات في المستويات البدنية بين اللاعبين.
• هناك عناصر في الراحة وعناصر بتلعب مع المنتخبات.
• وممكن هذا الامر يعمل خلل في الدوري.
• الدوري يا هلال.
• اول حاجة نرفع الفرق بين الهلال والوصيف 6 نقاط ..وبعدين نتكلم عن الحاجات التانية.
• المريخ بطلب من المدرب تخلص من الجيش الجرار الذي كان في القطاع الرياضي.
• المريخ كان في كشفه برضو (جيش) …41 لاعبا في كشف المريخ.
• والمريخ في ملعبه الآن (جيش) الدعم السريع… في الصيانة.
• وفي مجلسه برضو (الدعم السريع).
• كله جيش في جيش.
• انتوا كفاح قال شنو بعد السبعة؟
• مباراة الهلال امام الاهلي الخرطوم مباراة مهمة ومصيرية .. وهي التى سوف ترفع الفارق ان شاءالله بين الهلال والوصيف الى 6 نقاط.
• والاهلي الخرطوم فريق ما ساهل.
• عشان كدا يجب الترتيب والتجهيز لهذه المباراة بصورة خاصة وقوية.
• ….
• ترس اخير : كفاح ما عندو رأي في النظام الاساسي بتاع الهلال؟