النجم يغتال المريخ في الدقيقة الأخيرة

غرزة بااااع.

أها الجوعيرة وكبرة الحلاقيم الليلة كلها حاتتلاشي يامرخرخين، ونتوقع إنو عمك أبو وائل بتاع رفقاً بالنجم يختفي إسبوع، والفيلسوف أبونضارات حايجي بعد خمسة أيام عشان يقول ليكم يامرخرخين إنو غرزتة إستعجل في مشاركة اللاعبين الجدد ويزيد ليكم جرعة المخدر ويطالبكم بالصبر لحدي ما النقطة تبقي نقطتين بنهاية مباريات المجموعات !!
أما عمنا سمعة فالظاهر إنو تأكيده علي الفوز مرق فشوف، ويتخيل لي المشكلة كانت في الجني بتاع الفكي الما قدر يفرز بين النجم والنجيمة، والفكي حايقول ليهم ماوريتوني إسم الفريق التاني شنو؟؟؟ هههههههههههه
عمنا أبوشيبة حايطلع ليكم 6 ضربات جزاء و4 مخالفات لصالح المرخرخ تغاضي الحكم عن إحتسابها، وحايقول ليكم قوون النجم الأول من تسلل والتاني جاء من مخالفة مع الولد ود الجنسيات التلاتة وأصلاً الزمن الإضافي للمبارة إنتهي والحكم عشان مغربي كان مصر إنو أولاد عمه التوانسة يفوزوا !! وحايقعد يضرب ليهم ويحسب فيها ولو حصل كدة وكدة ولو المرخرخ سوي ولو ولو ول….،وهاك يا 6 نقاط من برة زائد نقاط الهلال وفيروفيارو في الحفرة وكدة المرخرخ يعمل 13 نقطة ويخش دور الثمانية، وبكدة المرخرخ مؤهل للفوز بالأبطال هذا العام، وماننسي حكاية التحصين من العمل العاملنه الهلالاب للاعبي المرخرخ، والمطلوب المرة دي يشيلوا كل فنايل اللاعبين حتي فنايل التمارين والجهاز الفني ويودوها للفكي أبو كلبشات عشان يبخرها ويعزم عليها من العين !!
الأستاذ المرشدي حايزيد جرعة المخدر ويقول للجماعة المرخرخ قادر علي العودة في تونس وموزمبيق…. الكترابة !! وإحتمال كبير كمان يقوم بتقديم شكوي نيابة عن المرخرخ في أحد محترفي النجم الساحلي بمعلومات من مرخرخاب تونس !!!!!!!!!
ود الجاك طبعاً ماعنده غير التحكيم المتحيز، وحايهاجم حكام صلاح…… هي أقصدحكام الكاف، وبعد ما اللطيمة حصلت حايقول ليكم الكاف ما كان يختار حكم مغربي، والكاف عاوز الفرق المامصنفة تطير (طيب وكت ما مصنفين الفصاحة ليكم شنو؟ والصداع السببتوهوا لينا لازمته شنو؟) ……بعد داك طبعاً حايقعد يعدد لينا في المخالفات وضربات الجزاء الماحسبها الحكم زي عمنا أبوشيبة هههههههههههه
عمنا أبو المستعار نتوقع منه الإحتجاب، علي الأقل غياب عمودين من أعمدة الدراب الأربعة لأنو الحمي والضغط والسكري قاموا عليهو بعد قوون الرصعة في الزمن الضائع…..بس ناس المرخرخ لو عرفوا النحس الجايبه أبو المستعار للمرخرخ حايسلخوا جلدة ويودوهوا التوج !! هههههههههههههه
لكمة أخيرة: ياحراااااااااااااااام !! يعني المرخرخ حايكون حايم بالنقطة دي طوال شهر رمضان؟ والله حالة عجيبة خلاص، بس ده كلو نتيجة لنواياكم السيئة وحقدكم علي الهلال وكيدكم لهم في السر والعلن، ويامرخرخين شكلو المرة دي نقاط المجموعات لو بالغتوا كدة ممكن تعملوا منها 3 نقاط !!
وناس موزمبيق بعد الشافوهوا أمبارح ده بكونوا طمعوا غنو يعوضوا فيكم خمسة تونس !!
يا أبو المستعار كدي الليلة لقط لينا عمود كدة بمناسبة ضربة النجم دي، وياريت يكون بعنوان رجم النجم زي ما إتوهمت ههههههههههااااااااااااي
قف: رفقاً بالمرخرخ !!