النظرة الشرعية

في السلك
النظرة الشرعية

*ما عارف تلفزيون الخرطوم سقطت منه سهوا أم قصدا
*فلقد كانت تزين شاشته عبارة
*قناة الثورة
*من أكتوبر الفات ما شفناها
*فهل هو سقوط أم سقوط؟؟؟
*يا ناس تلفزيون الخرطوم
*لو لقيتوا عبارة قناة الثورة (ساقطة) جوه مبانيكم ارفعوها مجددا بالله عليكم
*فقد تكون هي السبب في مداعبة الأنامل للريموت نحو قناتكم التي سقط منها ذلك الشعار
*ولو لقيتوها واقعه بره مبانيكم
*نبقى عرفنا منو الأسقطها
*ستحدثنا عرباتهم التي تغلق بواباتكم
*المهم سقطت عبارة ولم تسقط ثورة ولكن سقطت أسماء وأسماء
*سامعني يا بسام؟؟؟؟.؟
*أيها الناس
*من بداية الثورة دي بنسمع بإذابة الدعم السريع في القوات المسلحة
*وما حصل
*ولا قرب يحصل
*قد يكون الأمر صعبا
*وقد يكون مرهقا
*وقد يصل لدرجة المستحيل
*ولكنه ضروري لضمان جيش واحد بالدولة
*فإن كان صعبا أو مستحيلا
*شوفوا الساهل وذوبوا ديل في ديك ونفضها سيرة
*المهم يكون في جيش واحد في البلد
*المهم
*شفت لي فيديو لتاتشر بدهس في ثوار بكبري المك نمر
*لكن يتخيل لي التاتشر ملاكي
*مدجج لكنه ملاكي
*ففي ظل ستين نوع كاكي
*عادي ممكن يلاقيك تاتشر مدجج ملاكي
*وصاروخ ملاكي
*ودبابة لوحاتها ملاكي
*عادي جدا
*المهم
*كورونا الله لا جاب عقابها
*جهجهت العالم كلو
*الناس بالكمامات ما بتعرفوا
*ياخ الكمامة حرمتنا حتى النظرة الشرعية
*والغريبة الناس البلبسوا الكمامات السوداء
*تلقاهم مجموعة
*من بعيد تشوفهم واقفين مع بعض قداديمهن سود
*كلاب بس
*الله يجازي الكورونا
*ونحن بالذات زادت علينا الدغوتات شديد
*إجازات
*يا كورونا
*يا موكب
*يا إسرائيل
*يا عذرائيل
*والتاتشر ملاكي
*أيها الناس
*تجاوز الشارع وعيا كل الأحزاب وجميع السياسيين وجل العسكر
*وفاتهم مسافة
*نسأل الله أن يرتقي بوعي أحزابنا وسياسيينا وعساكرنا لمصاف وعي الشارع
*والثورة مستمرة والسادن يطلع بره
*المهم
*وصلتني دعوة كريمة من الحبيب مرتضي بتري تتعلق بخارطة طريق الجماهير الحمراء
*الموضوع هام
*ومن قدم الدعوة من أحب أهل المريخ إلى نفسي
*فقط أجبرني على الغياب نهارية التوقيت
*فنحن بالنهار زي الشية في قندهار
*ما بتبرد
*بالتوفيق الأخ بتري
*ولا تنسي إني اطلقت عليك مهدي الفكي الجديد منذ سنوات
*ولسه عند كلمتي
*أيها الناس
*بمناسبة مهدي الفكي
*في هذه الأيام أقوم بالكتابة عن أبو العائلة وعبد الحميد حجوج
*توثيقا للرجلين
*وبالذات هناك الكثير المثير عن الرجلين
*وأنا شاهد على العصر من داخل الإستاد منذ الصبي
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا المكلف علينا
*عندي تاتشر ملاكي بي دوشكا
*بترخص خرطوم ولا ولا ولايات يا والينا؟؟؟

سلك كهربا

ننساك كيف والكلب قال لو خفتوا الله ما تخافوا من النت
وإلى لقاء