الهلال الجديد نأكل باسطة ولّا ندخل سينما
صابنها
محمد عبدالماجد
الهلال الجديد نأكل باسطة ولّا ندخل سينما
· لمن صلاح حاج سعيد كتب (ﻟﻘﻴﺘﻮ ﻭﺍﻗﻒ ﻣﻨﺘﻈﺮ ﺗﺸﺘﺎﻕ ﺍﻟﻌﻴﻮﻥ ﻟﻄﻠﻌﺘﻪ…ﻧﻔﺲ ﺍﻟﻤﻼﻣﺢ ﻭﺍﻟﺸﺒﻪ ﻭﺍﻟﻤﺸﻴﻪ ﺫﺍﺗﻬﺎ ﻭﻗﺪﻟﺘﻪ..ﺍﻟﻠﻔﺘﻪ ﻭﺍﻟﺘﻮﺏ ﻭﺍﻟﻘﻮﺍﻡ ﺍﻭﺻﺎﻑ..ﺣﺒﻴﺒﻲ ﻭﺭﻭﻋﺘﻪ..ﺗﺎﺭﻳﻬﻮ ﻳﺎ ﻗﻠﺒﻲ ﺍﻟﺤﻨﻴﻦ ﺭﺍﺟﻴﻨﺎ ﺑﻲ ﺷﻮﻕ ﺍﻟﺴﻨﻴﻦ…ﻳﺎ ﺭﺑﻲ ﻭﺍﻗﻒ ﻣﻦ ﻣﺘﻴﻦ ﻟﻜﻨﻪ ﺍﻩ ….ﻳﺨﻠﻖ ﻣﻦ ﺍﻟﺸﺒﻪ ﺍﺭﺑﻌﻴﻦ)، النقاد طلعوا وهاجموا صلاح حاج سعيد وقالوا (الحبيب) دائما بكون واحد وما في شبه ليه ..وصلاح حاج سعيد بقول عن (الحبيب) يخلق من الشبه اربعين.
· هو حبيب ولّا استمارة تطعيم.
· الوقت الذي هاجم فيه النقاد صلاح حاج سعيد في حكاية (يخلق من الشبه اربعين) نحن ما كنا بنكتب ..وإلّا كنا كتبنا لهم ان (المربط) هنا في (الشوق) وليس في (شخص الحبيب) – صلاح حاج سعيد كتب عن (اشواقه)…وعندما يحدث (الشوق) طبيعي ان تصل لهذه المرحلة والتى تشعر فيها بأن أي شخص واقف او ماشي بتتخيلوا هو (الحبيب) ذاتو.
· عليكم الله ما تفكوها فينا.
· المريخ امس حاول يقلد الهلال ويعمل حالة شبه منو، لقى الحكاية صعبة.
· المريخ لا فيه ابوعشرين.
· ولا عندو عيد مقدم.
· المهم هسع دا ما موضوعنا.
· والله (فكتوريا) فرقت معانا.
· الواحد في كمبالا يقوم الصباح يلقى المطر شغالة.
· ينوم المساء يخلي المطرة شغالة.
· المطرة في كمبالا متل (اذاعة ام درمان) هنا – شغالة اليوم كلو.
· الغريبة مع هذه المطرة الشغالة اليوم كلو …ما حصل قمت الصباح لقيت لي موية (مترعة).
· الموية بتمشي وين ما عارف؟
· بحصل شنو؟
· ما عارف.
· ما تسألوني.
· في عنتيبي وكمبالا ما شفت لي (واطة).
· يا بلك يا زراعة.
· الواطة اصلو ما شفتها.
· تقول ما عندهم تراب.
· كمبالا مدينة سبعة تمانية ….فيها مجموعة من الجبال جعلت تضاريسها مموجة.
· حلة فوق.
· وحلة تحت.
· لمن تكون ماشي حتة زي كأنك طالع او نازل بالسلم.
· كمبالا فيها (جو)..لو عندنا هنا في السودان – جماعتنا ديل كلهم كانوا بقوا شعراء.
· ناسنا ديل درجة الحرارة بتصل 47 درجة وهم قاعدين يكبتوا عن النسيم والنسائم والربيع.
· عليكم الله من الله خلقكم شفتوا ليكم (ربيع) في السودان.
· أنا غايتو غير (ربيع طه) ما شفت.
· في كمبالا شفت لي (طيرة)… بتساوي عندنا هنا (البقرة).
· قلت في نفسي بالله الحياة بقت صعبة للحد دا.
· أي حاجة اتغيرت في الدنيا دي ، والله زمان (البطل) في الفيلم الهندي يدق ليك الخيانة والشرطة والناس المعاه في الفيلم ، بما في ذلك مخرج الفيلم والمشاهدين القاعدين في الصف الاول في السينما.
· القريب منهم بتناوله.
· البطل زمان كان مقنع.
· هسع (البطل) يدقوا فيه من المشهد الاول لغاية اخر الفيلم.
· انا ما عارف (بطل) في شنو؟
· بطل بطلع من (التمهيدي).
· الحياة كانت حلوة.
· زمان السمك قدر ما تاكل فيه ما بتلاقيك (شوكة) – الناس نيتها كانت نضيفة.
· هسع (الشوك) يلاقيك في الفول.
· الحياة بقت صعبة.
· يا زول عليك الله خلينا في كمبالا.
· في فكتوريا.
· في مباراة الهلال وفايبير كنت قريب من دكة الهلال.
· الهلال غلب واحد صفر.
· المباراة كانت حلوة.
· وفكر المدرب ظاهر في المباراة.
· قلت الهلال السنة دي ح يكتمل بدرا.
· نحن المرة دي ناس بطولة عديل كدا.
· الوصول لمرحلة المجموعات ما طموح للهلال.
· المجموعات نحن بنصلها بالشباب بي مؤمن عصام ويونس الطيب ودراج.
· السنة دي عندنا كلام.
· في المباراة والهلال يلعب امام فايبيرز ..عاينت في الملعب لقيت ابوعشرين واوتارا وابوعاقلة وعيد مقدم وفيني.
· افتكرت الموضوع قفل على كدا.
· عاينت في (الكنبة).
· لقيت عبدالرؤوف هداف الدوري الممتاز وافضل لاعب وسط في الدوري.
· لقيت في الكنبة جيسي ..محترف الكورة عندو زي (اللبانة).
· ولسه انا بعاين في الكنبة لقيت جمال سالم.
· جمال سالم ذاتو احتياطي والمريخ بيلعب بـ (منجد النيل).
· ليه؟
· مالكم؟
· عندكم سماية؟
· في كنبة الهلال مجاهد فاروق وصلاح عادل.
· ديل في ليفربول بيلبعوا.
· في كنبة الهلال بوجبا ..وبشه.
· عليكم الله دي (كنبة) وإلّا (جامعة).
· رفعت رأسي شوية …ونظرت الى المدرج لقيت ليك الغربال محمد عبدالرحمن.
· رجعت الخرطوم قالوا الهلال ابعد وضاح وسليم برشاوي.
· ضربت القاهرة قالوا فيها ياسر مزمل.
· الهلال في المريخ عندو رمضان عجب ومحمد الرشيد.
· يا جماعة دا ما فريق.
· دا مشير عديل كدا.
· في أي حتة عندو كوكبة.
· الهلال بقى شارع الدكاترة.
· شيء اختصاصي جراحة.
· وشيء اختصاصي باطنية.
· وشيء اختصاصي اعصاب.
· وشيء اختصاصي عيون.
· وشيء اسنان.
· الهلال دا لو عاوز يقفلها ويدافع يلعب 3 محاور ومعاهم صانع العاب واحد في الوسط.
· يعني مثلا يلعب الشغيل وابوعاقلة وصلاح عادل ونزار حامد او جيسي او عبدالرؤوف.
· ومجاهد فاروق بيلعب ليك في أي خانة.
· الهلال لو عاوز يعملها طرب ويلعبها هجومية يلعب بثلاثة صنّاع لعب ومعاهم ارتكاز واحد.
· يلعب بي جيسي وعبدالرؤوف وبوجبا واي واحد من لاعبين الارتكاز الشغيل او ابوعاقلة او صلاح عادل.
· وبرضو الحرية كاملة لمجاهد فاروق.
· الهلال لو عاوز يلعب بتوزان يلعب باتنين ارتكاز واتنين صنّاع لعب.
· الشغيل وابوعاقلة مع جيسي ونزار حامد.
· او صلاح عادل ومجاهد فاروق مع بوجبا وعبدالرؤوف.
· التشكيلات دي في ريال مدريد ما في.
· يا زول بقى عندنا فريق ممكن ننافس بيه في مهرجانات الثقافة والفنون والادب.
· والله انتوا ما مطالبني حليفة – لكن الهلال الشفتو دا … ما في فريق بقيف قدامو.
· لا الاهلي المصري.
· ولا الترجي التونسي.
· ان شاء الله لمن نصل مرحلة المجموعات يقع معانا في مجموعة واحدة الاهلي المصري والترجي التونسي ومازيمبي الكنغولي.
· عشان يفهموا حاجة.
· ويعرفوا الطلع النخلة منو؟
· العاوز يقطع قلبو من الاندية الاخرى يعاين لتشكيلة الهلال ابوعشرين والطيب عبدالرازق واوتارا وفارس والسمؤال ونزار وابوعاقلة والشغيل عيد مقدم وفيني والشعلة.
· والعاوز يقطع قلبو اكتر يعاين للكنبة جمال سالم وموفق وبويا وبشه وجيسي وابوجا وصلاح عادل ومجاهد فاروق.
· والعاوز يقطع قلبو وقلب الزول المعاه يشوف برة التشكيلة وبرة الكنبة في منو؟
· الغربال ووضاح وياسر مزمل وسليم برشاوي ومحمد احمد ارنق وابوجا.
· أي زول ما هلالابي السنة دي ننصحوا ما يتابع المباريات وما يقرأ الجرايد وما يدخل الفيس وما يشغل الواتس.
· أي زول ما هلالابي احسن يشوف ليه بلد.
· قفلوا التلفونات.
· قفلوا الابواب.
· وما تتكلموا مع زول.
· ناس ابوجا وجيسي ديل لو لعبوا في تشكيلة واحدة بوقفوا الحركة.
· السكر بنزل.
· والرغيف برقد.
· وناكل باسطة ولّا ندخل سينما.
متاريس
· بات الاشانتي الاقرب لمواجهة الهلال القريب للتأهل لدور الـ 32 ان شاء الله.
· نواذيبو – موريتانيا 1 : 1 أشانتي كوتوكو – غانا.
· متابعة مباريات الاشانتي وتحليل اداء هذا الفريق سوف يكون اسهل لبشه.
· الاشانتي فريق معروف.
· والهلال واجه الاشانتي كثيرا.
· الخوف من الاشانتي يتمثل في ان الاشانتي عنده تار مع الهلال وهو يعرف الهلال جيد.
· دوافع الاشانتي سوف تكون كبيرة.
· هذا طبعا اذا تأهل الاشانتي وتأهل كذلك الهلال.
· نتحدث عن الاقرب من خلال نتائج جولات الذهاب.
· رحيمو – بوركينا فاسو 0 : 1 إنييمبا – نيجيريا.
· انيمبا على طريقة الهلال حقق الانتصار خارج بلاده.
· وهو الاقرب للدور القادم.
· وبحساب نتيجة المريخ خارج ملعبه فان المريخ سوف يواجه في دور الـ 32 فريق انيمبا.
· وهو فريق صعب.
· والاشانتي كذلك.
· عبدالمهيمن اعلن عن تجارب ودية للهلال مع اندية افريقية في حال التأهل لدور الـ 32 ان شاءالله.
· الهلال في حاجة ان يلعب عدد كبير من المباريات.
· المشكلة في الكورونا.
· والاغلاق الذي يمكن ان يحدث مرة اخرى.
· الموجة الثانية قد تجعل الاغلاق في معظم دول العالم ان لم يكن فيها كلها.
· لمن قالوا لي تمبش جاب القون …افتكرت تمبش احترف في أوثو دويو.
· تمبش دا ما شاف ناس الطيب عبدالرازق بعملوا في شنو؟
· …………
· ترس اخير : الافاعي على المريخ …وامام الهلال جراد.
غايتو مع الشئ الشايفنه ده يا ود عبد الماجد الراجل العجوز ولدنا أبو المستعار المندلاوي ذاتو إحتمال يرجع البلد ويهجر المرخرخ، بس أثر المخدر بتاع الكاهن الأعظم أليخماو ما ظنيت يروح منه، أصلو في سن ذي ده صعب يتفك من سطوة المخدر 😝😝😝
بالله يا ود عبد الماجد كتر لينا من حلاوة ميدو، عاوزين نرفع الضغط للجماعة ونخلي فشفاشهم يتهرد، عشان كدة أديهم وما ترفع منهم أبدا 😃😃😃
هههه لعب على الصحف هو انت فاكر فريقك حايوصل مرحلة الاهلي والترجي ومازومبا كمان الباسطة وغربالكم حاتعرفوا حاجة قريبا ما تفرح بالحمام الميت افاعي يوغندا الذي ابعد المريخ بمجرد الصدفة واصلو يا فرفور دا حالك من سويتلك غريال تكثر من اللعب على الورق ونحن ما بتقدروا علينا بكل الباسطة البتتغزل فيها والسينما حاتتفرج فيها قريبا هههه وكمان ما مجموعات بطولة عدييل كدا؟ سبحان الله ان شاء الله اول لقاء تشوف مرمطة مكررة. المشكلة الديناصور المخرف لا داير يفوت ولا ينزل من صدر المريخ وبقت بايخة جدا في كل خطوة حقد ومماطلة نشكوه لله المنتقم وهو يحارب المريخ في شخص مزمل ابوالقاسم الذي اذاقه هزيمة قاسية لدرجة جماعة الرتينة بقت ينفثون سموم غراب الاعلام الهلالي العدو الصارخ لمل ما هو مريخي اتقوا الله .
ههههههه هههههاااااا وشر البلية مايضحك. ياعبد الملك او ابو المستعار كما يسميك ابو صلاح. الافاعي الذي دحرجكم من التمهيدي الي الرصيف بقي حمام ميت متين؟؟؟. لعلمك الفريق صار اقوي مما كان عليه ويشرف عليه ملياردير اغني من السوباط لاجننكم ولكنها الاحقاد من اتباع ومافيا اليخماو الذين لا يرون في الهلال شيئا جميلا واحفادكم دي هي التي جعلتكم تتسمرون في التمهيدي سنين عددا والمراحل التي تتكلم عنها وصلناها مرات ومرات وتخطيناها ورفعنا تصنيف السودان ليلعب باربعة فرق مع كبار افريقيا رغم انف التمهيداب الحاقدين فموتوا بغيظكم فالهلال هو سيد البلد وكبيرها وممثل السودان في ادغال افريقيا. اما الحمام الميت فهو فريق اوتوهو المجهول الذي لم نسمع به من قبل وبالنسبة لاستعداداته وهزيمته لمازيمبي واورلاندو كانت شتل كلها غالبا من اليخماو وعصابته لتبرير الخروج المتوقع من التمهيدي بطريقة استباقية. الفريق قالوا لعب مباراة واحدة فقط مع الاولمبي الكنغولي والمباريات الباقية عبارة عن شتل وتاليف لتضخيم فريق الحمام الميت
أخي عبدالملك الناس الشقالين بي عمود الصحفي المفلس عبدالماجد .. ياخي خليك من النازحين إلي العاصمه جو مع المجاعه اومشتهين البيتزاء . ..ود عبدالماجد خريج جميل ومستحيله.. المجال للنقاش في نطاق كرة القدم..لو عايز تتكلم.عن التعليم مابتقدر علئ.انا في بلد. التعليم. أنا خريج .دراسات فوق الجامعة.. الكلام ده موجه لي ..خجام الحمام . أو صلاح…النقاش في حدود الكوره فقط.انا عمري مابتكلم.في تعليمي كل زياراتي السودان بتكلم باا لعربي فقط. بركب مع الناس في المواصلات.عندي المقدره عندي عدد من العربان والله .ولكن بركب المواصلات لى حين موعد السفر. أنا إنسان متواضع ولكن ما بحب الحقاره.اووووووكفى بدرالدين
ياابوالمستعار الامريكي او مرمطون البيتزا. دراساتك العليا واضحة من ركاكة لغتك وهيافة مواضيعك واخطاءك الاملائية الكارثية في العربي والانجليزي. احسن تنطم ولاتفضح جهلك. ههههههه هاااااااا. قال دراسات فوق الجامعية!!!! هانت الزلابيا!!!
اخي بدر الدين لك التحية والتقدير ..انا لا اقدح في ثقافة صاحب الصبة فهو رجل متعلم ومثقف فقط أحب مناكفته في حدود اللياقة والاحترام داخل المستطيل الافتراضي لأنه يجيد اللعب على السطور مع امنياتي له بالصحة والعافية. كل ما في الأمر صلاح وهجام يكررون تخريمات محمد كامل سعيد التي لا يستفيد منها غير اصحاب الغرض ومغبشي عامة مشجعي الهلال. هؤلاء فاقدين بوصلة وفاكرين ما يكتبونه يثبت حقيقة ويستميتون في الإساءة لكل من يكتب تعليق مضاد بأنه مخدر وتابع لجهة محددة ويصادرون قناعات البشر بكل فجاجة ومفردات موغلة في البداوة وطبعا كل اناء بما فيه ينضح وانا هنا اقصد اساءة لأهل البادية فالعاصمة والقرية كلها من تراب السودان لكن الرشاشات زودوها وطغوا وبغوا في وجود شداد الذي يفيض حقدا لتدمير المريخ والا ما هو تفسير كل المماطلة في حل كل مشاكل المريخ. على كل لكل شيء نهاية وحتما ستسطع شمس الحقيقة والله غالب . ايضا ارجو ان لا تتعب روحك فمثل هؤلاء يكتبون المضحك والمثير للشفقة ويعتقدون بأن العمر والأمراض عيب رغم انك تكون من احفاد بعضهم وسليم معافى برحمة ربك ويقولوا ليك الضغط والسكر ههههه لا تتعب روحك في التعليق على ضحالة المحتوى. دمتم .
تعليقك ينتظر الموافقة عليه.
اخي بدر الدين لك التحية والتقدير ..انا لا اقدح في ثقافة صاحب الصبة فهو رجل متعلم ومثقف فقط أحب مناكفته في حدود اللياقة والاحترام داخل المستطيل الافتراضي لأنه يجيد اللعب على السطور مع امنياتي له بالصحة والعافية. كل ما في الأمر صلاح وهجام يكررون تخريمات محمد كامل سعيد التي لا يستفيد منها غير اصحاب الغرض ومغبشي عامة مشجعي الهلال. هؤلاء فاقدين بوصلة وفاكرين ما يكتبونه يثبت حقيقة ويستميتون في الإساءة لكل من يكتب تعليق مضاد بأنه مخدر وتابع لجهة محددة ويصادرون قناعات البشر بكل فجاجة ومفردات موغلة في البداوة وطبعا كل اناء بما فيه ينضح وانا هنا لا ولن اقصد اساءة لأهل البادية فالعاصمة والقرية كلها من تراب السودان لكن الرشاشات زودوها وطغوا وبغوا في وجود شداد الذي يفيض حقدا لتدمير المريخ والا ما هو تفسير كل المماطلة في حل كل مشاكل المريخ. على كل لكل شيء نهاية وحتما ستسطع شمس الحقيقة والله غالب . ايضا ارجو ان لا تتعب روحك فمثل هؤلاء يكتبون المضحك والمثير للشفقة ويعتقدون بأن العمر والأمراض عيب رغم انك تكون من احفاد بعضهم وسليم معافى برحمة ربك ويقولوا ليك الضغط والسكر ههههه لا تتعب روحك في التعليق على ضحالة المحتوى. دمتم .