الهلال لقيناهو والباقين مالقيناهم ..!!
سوبر هاتريك
طارق محمد عبدالله
الهلال لقيناهو والباقين مالقيناهم ..!!
& نعترف بان خسارة الهلال امام النجم الساحلي طعمها حنظل وماجعلنا نعض اصابع الندم حسرة انه كان في الامكان افضل مما كان مية مرة ،كنا الأفضل في جل أوقات المواجهة ولكنها كرة القدم أحيانا تعطي أولوية كسب ودها بالانتصار لمن لا يستحق هاردلك ياهلال لم يكن يومك مع الأسف الشديد وبصراحة إطار فني ولاعبين مافيكم زول قصر قاتلتوا وناضلتوا وسط الأمطار والوحل و(البرد) الشديد بإصرار وعزم اكيد والدليل انو التوانسة لي هسه مامصدقين انهم غلبوا الهلال .
& ونستدل هنا ببعض أقوال الامام الغزالي حيث قال (بعض المنعطفات قاسية .. لكنّها إجبارية لمواصلة الطريق )ونعتقد بأن قساوة ومرارة الخسارة التي تعرض لها الهلال ستكون باذن الله اكبر دافع للعودة لسكة الانتصارات من جديد وقطعا فانها تجعل اللاعبين والمدرب يفتحوا( اعينهم قدر الريال ) في قادم المواجهات ومن محاسن الصدف أن المواجهة القادمة مع النجم الساحلي ايضا وهي فرصة لتعويض مافات والثار من الليتوال بتحقيق فوز بالحجم العائلي يضاعف من حظوظنا في خطف إحدى بطاقتي التأهل ومازال الأمر بيدنا لان الفوز في جميع المباريات القادمة يؤهلنا مباشرة دون الدخول في (حسابات ولولوات )والفوز في اثنين والتعادل في واحدة ايضا قد يؤهلنا وربما نتاهل عن طريق الفوز في مباراتين كلو جائز وباب الاحتمالات فاتح قراش أربعة ضلف .
& ومن أقوال الامام الغزالي ايضا (سقطت شجرة فسمع الكل صوت سقوطها..بينما تنمو غابة كاملة ولا يسمع لها أي ضجيج..فالناس لا يلتفتون لتميزك بل لسقوطك ) واعتقد ان المذكور أعلاه ينطبق على المدرب المميز فلوران والذي يؤسس (لغابة وغاية) إبداعية كروية هلالية وقطع فيها شوطا بعيدا والملاحظ أن سقوط بعض أشجارهايستغله بعض أصحاب الأجندة الخاصة من أجل أحداث ضجيج يحاولون من خلاله إيهام الناس بفشل المدرب وبالتالي فشل المجلس الذي تعاقد معه شفتوا الناس الخبيثة دي بترمي لي قدام كيف …؟؟؟
اهداف سريعة ..اهداف سريعة
& في أوقات الحارة وزنقة الحرب والتي ساهمت في تشتيت شمل الأسر السودانية ما بين النزوح واللجوء .
& ولانه ابن الوطن البار الهلال (لقيناهو) وقت الحارة اول حاجة تاهل لدور مجموعات بطولة الكبار الاندية الابطال غصبا للظروف المحيطة بالبلد وغيروا( طاااااروا) من بدري.
& ولغاية هسه ابن السودان البار قابض على جمر القضية و ماقصر مرات يفوز يخفف علي السودانيين وطأة معاناة الحرب العبثية .
& ومرات يخسر ويشارك السودانيين المعاناة يعني في الحالتين هو متقاسم معاهم الهم وفي قلب الأحداث .
& وفي المقابل (التانين) ماليهم أي دور وقاعدين ساكت لابيجدعوا ولابيجيبوا الحجار والغريبة كمان شمتانين في خسارة الهلال من النجم عجبي …!
& انا غايتو بس نفسي اعرف الناس دي بتلقى حبوب منع الخجل بالمجان وين …؟؟؟
& وفعلا الضل دخل القش وماقال كش هسه في زول جاب سيرة المريخ هنا ….؟؟؟؟
& وحتى الكوتشينة شاركتنا هم الحرب وبقت برنامج ثابت للنازحين وكذلك الليدو .
& وبصراحة بصراحة وفي الظروف والتعقيدات والحرب العبثية دي المالقيناهو تاااااني دايرين بيهو شنو ….؟؟؟؟
& دائما نتطلع لهلال قيافة فايت العرب والافارقة مسافة .
& ويظل الهلال الواحد الصحيح في الكرة السودانية وغيره الكسور والبواقي .
& ازرق وابيض لون الفل هلال الروعة حبيب الكل .
& وأخيرا احمد الله كثيرا انني حي ازرق .
