الهلال ما بس فريق كورة.. الهلال ضمير أمة
هلال وظلال
عبد المنعم هلال
الهلال ما بس فريق كورة.. الهلال ضمير أمة
ـ في زمن الحرب والخراب زمن الأمراض والجوع والتشريد زمن النزوح والجرح المفتوح بنلقى إنو الأمل الوحيد اللسه واقف على حيلو وما انكسر رغم كل العواصف هو الهلال ..!
ـ الهلال ده وجدان شعب.. كيان حقيقي في قلوب الناس أكبر من أي حزب وأوسع انتشار من أي تنظيم مافي شارع في السودان إلا ومرق منو صوت بيهتف باسم الهلال.. ده المارد الأزرق البيوحد الناس في بلد اتفرقت طوائفه وقبائله وجهاته.
ـ الهلال أكبر من كل السياسيين وفي الوقت اللسه الأحزاب والكيانات بتجري نحو المناصب والكراسي الهلال بيجمع الناس في الاستاد وفي الشارع وفي القهاوي وفي القلوب.. حزب بلا منبر لكنو منبر للناس الغلابة ومنبر للفرح في بلد طغت فيه الأحزان.
ـ طيب فريق بالشكل ده.. مفروض يكون وين لما الشعب يتألم ..؟ لما الأطفال يتشردوا ..؟ لما الأسر تتفرتق..؟ مفروض يكون في قلب الحدث.. في قلب الأزمة.
ـ نرجع شوية لورا نتذكر رئيس الهلال الأسبق صلاح أحمد إدريس وقت ما كانت الحرب شغالة في دارفور مشى بنفسو مع فريق الهلال وزار معسكرات النازحين. تفقد الكبار وحضن الأطفال وقف مع الناس ورسّخ لفكرة إنو الهلال نادي مختلف عندو دور إنساني واجتماعي ما بس كورة.
ـ ما كانت زيارة للكاميرا كانت رسالة لكل أهل السودان (الهلال معاكم، ما ناسيكم) والموقف ده ليوم الليلة محفور في قلوب الناس هناك.
ـ طيب هسع الهلال وين من المأساة الكبيرة دي ..؟
ـ البلد متشظية.. والناس مشردة. الملايين نازحين من ديارهم وناس كتار قاعدين في مخيمات النازحين لا أكل.. لا دواء.. لا مدارس.. لا مستقبل.
ـ هل من المعقول الهلال وهو الفريق البفرح قلوب الناس ما يكون عندو دور في الحتة دي..؟
ـ ليه ما نشوف الهلال بيزور معسكرات النازحين وبيعمل مبادرات خيرية وبيطلع قافلات طبية أو حتى بيزورهم زيارة معنوية بس.. ويقول ليهم (إنتو ما براكم.. الهلال معاكم ..!)
ـ فزنا بدوري النخبة.. لكن لازم نفوز بالناس كمان ..!
ـ الهلال فاز بدوري النخبة ودي حاجة كبيرة لكن الأهم من الفوز دا هو استخدامو كمنصة عشان ننشر الفرح في قلب المعاناة.
ليه ما نحتفل بالدوري بطريقة مختلفة ..؟
ليه ما نعمل مباريات خيرية يعود دخلها للنازحين ..؟
ليه ما نبيع تيشيرتات الهلال ونجمع عائدها كمساهمة للمحتاجين والنازحين والمشردين ..؟
ليه ما نخلق شراكة بين النادي ومنظمات المجتمع المدني في مبادرات مستمرة ..؟
ـ الكورة بقت رسالة عالمية وزمان كانت الكورة بس لعبة.. هسي بقت منصة إنسانية في إنجلترا مثلاً راشفورد لاعب مانشستر يونايتد أجبر الحكومة توفر وجبات مدرسية للأطفال.
ـ في مصر الأهلي والزمالك عملوا مبادرات لإنشاء مستشفى أطفال السرطان وللتبرع بالدم وزيارة المرضى.
في المغرب الوداد والرجاء بينظموا قوافل للقرى المهمشة.
ـ نحن في السودان عندنا أزمة محتاجة لناس عندهم جماهيرية وتأثير والهلال هو أول خط في التغيير.
ـ الهلال ممكن يدي أمل والهلال لو تحرك باقي الفرق راح تمشي وراهو.
ـ أخرجوا من صمتكم وخلو الهلال يلعب في ساحة دوره المجتمعي بعد أن لعب في الملاعب.. الناس منتظراكم.. الجماهير دايراكم تكونوا في الصورة ما بس وقت الاحتفالات والميداليات عايزين الهلال يكون موجود في كل خيمة نازح وفي كل دار أيتام في كل مدرسة مهدمة وفي كل بيت شهيد وفي كل مدينة فقدت أبناءها بسبب الحرب.
ـ الهلال لمن يمد إيدو بيجيب وراه جيش من المحبة..
الناس بتحب الهلال بصدق.. وبتثق فيهو.. وبتسمع منو.
ـ الهلال (سيد البلد).. لكن لازم يكون (ضمير البلد).
ـ الكاسات بتتنسي والمباريات بتنتهي لكن المواقف المشرفة ما بتنمحي من الذاكرة.
ـ الهلال لو داير يكون (سيد البلد) لازم يكون قريب من (وجع البلد).
ـ ما عايزين الهلال فريق بينتصر في الاستاد وبس.. عايزنو فريق بينتصر في الميدان الاجتماعي.. عايزنو الهلال السند.. الهلال الوفي.. الهلال الواقف جنب الناس..
عايزين الهلال يكون (ضمير البلد)… زي ما هو قلبها النابض.
- الهلال ما فريق كورة وبس.. الهلال كيان قادر يعمل فرق في حياة الناس.
خلونا نثبت إنو (سيد البلد) فعلاً بيشيل هم البلد.
خلونا نخلي الهلال شمعة بتنور في عتمة الحرب.
خلونا نبدأ… بالهلال السند.
ـ الكورة في ملعب السوباط والعليقي ومجلس إدارة الهلال قوموا إلى دوركم المجتمعي يرحمكم الله.