الهلال مع الأبطال والوصيف مكشوف الحال ..!
هلال وظلال
عبد المنعم هلال
الهلال مع الأبطال والوصيف مكشوف الحال ..!
ـ البشوف فرحة إعلام وجماهير المريخ عقب قرعة الهلال والأهلي يحس أن الهلال داخل على معركة نهايتها أنه سوف يقبض عليه مكبلاً ويودع محكمة لاهاي ..! الجماعة التمهيداب قاموا سخروا وضحكوا واستهزأوا وشالوا الفاتحة على الهلال مقدماً وبقوا يوزعوا (التعازي) قبل المباراة ..! لكن سبحان الله فقد نسوا الترحم على الجثة الحمراء المحنطة في موريتانيا ..!
ـ أول حاجة نرفع القبعات للإدارة العبقرية في المريخ القامت وسجلت اسم النادي في (السياحة الرياضية) ..! تخيلوا يا جماعة بدل ما النادي يسافر يجيب نقاط ويعمل إنجاز المريخ بقى زي الفرق التطوعية الماشية تقدم خدمات في المناطق النائية أو فريق كشافة ..! ما عارفين البعثة دي كانت رايحة تلعب كورة ولا تعمل مسح جغرافي لأراضي موريتانيا ..؟!
وكما كان الحال في معسكر مصر زمان حالكشري مقابل النقاط الآن في موريتانيا الوجبات مقابل اللعب في نواكشوط
ـ الجماعة التمهيداب البتريقوا على من وصل ربع نهائي المجموعات طاروا من القرن الفات و جروا سابقين الريح نحو الدوري الموريتاني وما إن وصلوا هناك إلا والنتائج جات باردة زي شتاء الصحراء الكبرى ..! واحد صفر .. اثنين صفر .. تعادل محبط وتدور الدائرة يمشي المدرب الإيطالي يجي ميشو برضو الفرق الموريتانية تنيشو ..! وكأن الدوري الموريتاني أنديتو مبرمجة على جلد الضيف الأحمر المحتاج ..!
ـ ياخ بدلاً عن السخرية من الهلال والتهديد والوعيد بالأهلى أعملوا نفرة باسم (القومة ليك يا مريخ القاعد في قاع ترتيب دوري الشناقيط) ..!
ـ أهل موريتانيا – وهم شعب طيب بطبعهم – كانوا قاعدين يتفرجوا باستغراب (يا جماعة الخير دا فريق جاي من دوري ممتاز ولا دوري مدارس ..؟!) والأدهى والأمر أن بعض مشجعي المريخ نفسهم قالوا (يا جماعة نحنا غلطنا.. المفروض ما نجي موريتانيا أصلاً ..!)
ـ يعني أهلي شندي المسكين دا عمل شنو عشان يهبط وذنبو شنو ..؟! لو كان الجماعة الملطشين في الدوري الموريتاني ديل بيلعبوا في نفس مجموعتهم في الممتاز كان أهلي شندي ما نزل ..!
ـ الهلال يلعب في الأبطال رغم الظروف الصعبة وسوف يلاعب الأهلي القاهري ويصارع على التأهل ويقارع كبار القارة بينما المريخ يبحث عن شرف التعادل في موريتانيا ..! الفرق شنو بينكم وبين مسلسلات اسبيستون والفات الفات والجبة وقعت في البير..؟! يعني بدل ما تسخروا من الهلال أول حاجة أمشوا اقفلوا ملف موريتانيا الكل يوم بينقط دا وبعدها تعالوا اتكلموا عن دوري الأبطال ..!
ـ الوصيفاب التمهيداب الأحبة نحبكم ونقدركم لكن يا جماعة التفتوا لحالكم المايل وشوفوا البدايل واوقفوا فقدان النقاط السايل ..!
ـ الهلال يواجه الكبار ويلعب باسم الوطن لكن انتو ما عندكم حاجة وكل سنة قاعدين فراجة ..!