الهلال يترقب نتائج الكشف الطبي للبرازيلي والأنغولي

ياكردنة مالك علينا ياخ؟ ده شنو الجايبه لينا ده؟ الزول البرازيلي ده شكلو ظاهر عجوز ومستحيل طبعاً لو كان فيهو فايدة يخلي بلده وأوروبا والخليج أو أضعف الإيمان فرق شمال أفريقيا عشان يجي يحترف في السودان، إلا إذا كان بالجد عجوز وكمل العنده، وانا بالأمانة شاكي إنو الزول ده يكون أصغر من أبو المستعار ب 10سنين بس !!
أما الأخ أبو بنطلون مقطع كله ده، فماشايف ليهو حاجة غير ماشاء الله إنو عادي وعريض المنكبين ولو ناس الطش وود نمر دقوا معاهو توتش إلايودوهم المنطقة الصناعية، بس ده ما معناتها إنو حريف وخطير وإلا كان كمل باقي لعبه في البرتغال ولا أي دولة أوروبية تانية !!
غايتو نسأل الله إنو يخيبوا ظننا، ونحنا متأكدين إنهم مع الحمام المحلي زي ناس المرخرخ وباقي الجماعة ماعندهم عوجة، بس في دوري الأبطال نسأل الله يلطف ويسهلها علينا ويجيبوا لينا فائدة !!
قلنا ليك من أول يوم ياكردنة المدربين ديل بقوا سماسرة كلهم، وإنت شفت بي عينك أسي غرزتة عمل في المرخرخين شنو وكان زمان بيعمل فيهم شنو، كل مرة لاطشهم ومركبهم ماسورة وده عنده كبد وبائي وده عنده سل وده عنده أيدز وده قلبه واقف، وأسي عليك امان الله شال منهم أحسن لاعب السماني الصاوي وخلاهم راقدين قش بي تمن كيلو طماطم فرنسية، وتاني الله يعوضهم فيهو سيما وبكرة نسمع التمساح الكاردينالي لبد ليهو في الصحراء الليبية وخطفه كش ونيبدأ تاني شغل الفيفا حايعاقب الهلال والمادة ماعارف ديك بتقول شنو وعمك أبو المستعار يجقلب ويبطبط مع باقي المرخرخين هههههههههههههههههه
بالمناسبة، أبو المستعار ده أفقدوهوا مايكون غمران ليهو في خور من خيران العرضة جنوب ومافي زول جايب ليهو خبر ياناس كورة سودانية
لكمة أخيرة: الله يقطع سنين السماسرة وأيام السماسرة !!