الهلال يرفع (الشارة السوداء) امام الافاعي بسبب الامام
صابنها
محمد عبد الماجد
الهلال يرفع (الشارة السوداء) امام الافاعي بسبب الامام
• القارئ ما عندو علاقة بحالتك الشخصية – ما تحاول تبرر ليه وتقول ليه – حاجاتك الخاصة ابعدها بعيد عندما تكتب.
• في فلسفة او مدرسة صحيفة بتقول كدا.
• قائمة على ابعاد الذات.
• لكن مرات الكتابة (الشخصية) بكون فيها صدق اكبر – وتكتب فيها عن (تجربة) ، والتجربة ام المعرفة.
• ما عارف (التجربة ام المعرفة) دي جبتها من وين؟ ..حكمة مخزنة عندي من زمان وإلّا حكمة جبتها براي.
• في الحالتين ما فارقة كتير.
• لكن لو جبتها براي بكون بقيت زول خطير.
• ما تسكوا الموضوع شديد.
• اول مرة لاقيت صلاح احمد ابراهيم كان في (ومددت ايدي بالسلام ..لكن كفك في الطريق ترددت وتعثرت ..وكأنما كفي حرام).
• لقيتوا شاخصا في هذا النص.
• حايم بي قميص (بيجي) وبنطال (بني) داكن.
• ما عارف مناسبة الحتة دي شنو؟
• يمكن لخبطت (الحزن).
• يمكن حيرته.
• يمكن عدم (الموضوع) – اصلكم انتوا منتظرين دي.
• تصوروا نحن لينا اكتر من 64 سنة بتناقش في عدم الموضوع.
• وما لاقي لي لغاية الآن فرقة امرق بيها من عدم الموضوع.
• متل المروحة الشغالة والكهربة قاطعة …شغالة (عدم موضوع).
• ومتل القطر بالحاول يتشبب بعمل فيها (بوكسي).
• القارئ ما بحب (النكد) – لكن مرات (الحزن) بكون شعور عام – حتى وسط الذين لا يعرفونه…او بطارشوا فيه العرفة.
• الحزن عندو قدرة على الحوامة اكتر من الفرح.
• الحزن عندو عشرة ووفاء اكتر من الفرح.
• الفرح بحصل (صدفة) او بيجي بالغلط.
• افتكر اننا التقينا كلنا كدا في الحزن على الصادق المهدي.
• الحزن العام.
• سمعت بالعيش التجاري.
• والبنزين الحر …يعني البنزين يبقى (حر) ونحن لا.
• سمعت بالثورة بالشنقيطي …رغم انها دخلت في الحتة دي بالغلط.
• لكن الحزن شعور عام سمعت بيه بعد رحيل الصادق المهدي.
• أي زول ما يحزن على الصادق المهدي يراجع الجوازات.
• يراجع (سودانيته).
• عاوز اكتب عن الامام ..رغم اني كتبت عنه في حتة تانية …وما لاقي لي مدخل.
• بفتش لي عن باب اسند فيه احزاني.
• بفكر كدا – وجدت ان مجلس الهلال اصدر بيان يعزي فيه الامة السودانية على رحيل الصادق المهدي.
• خطوة صادفت احزاننا.
• قعدت شوية – وجدت رئيس بعثة الهلال الفاضل التوم بتحدث مع عبدالمهيمن الامين لمخاطبة مراقب المباراة الكيني الذي وصل الى يوغندا امس عشان يقيقوا دقيقة حداد على الصادق المهدي اضافة لارتداء الهلال للشارة السوداء حزنا على رحيل الصادق المهدي.
• والصادق يقيفوا ليه ساعة ما دقيقة.
• بعثة الهلال ترتب لمعالجة الامر اذ اعترض مراقب المباراة من اجل الوقوف عند تلك الفاجعة حتى لو كان ذلك بصورة غير رسمية قبل بداية المباراة والدخول في المراسم الرسمية للمباراة.
• دا سبب كافي للكتابة عن الصادق المهدي – لا يمكن ان تتخطأ (حزن) بهذا الحجم.
• حزن يعتر ليك في الطريق.
• بدون ما تشعر تلقى نفسك نزلت على كراعك …هبشت اصبعك.
• اظن ان بحيرة (فكتوريا) اتهردت لهاها واحترقت حشاها واتقطعت مصارنها على رحيل الصادق المهدي.
• الصادق المهدي كان (هلاليا) – يحدثك عن الهلال كما يحدثك نصرالدين عباس جكسا.
• نحن مديونين للصادق بالكثير.
• نحن جيل قمنا ما لقينا قدامنا غير الصادق المهدي.
• لقيناها في التلفزيون.
• وفي الجرايد.
• في الحكومة.
• وفي المعارضة.
• زمان ونحن طلبة كنا بنشيل (كراسينا) في النادي ونطلعها عشان نسمع خطابات الصادق المهدي.
• وكنا ما فاهمين أي حاجة.
• مع ان الصادق المهدي يوم يكون عنده خطاب المسلسل كانت بتطير ..ولو في مباراة للهلال او المريخ التلفزيون ما بنقلها عشان ما يقطع خطاب الصادق المهدي.
• وكنا من باب (القشرة) كدا بنشترى الجرايد عشان نشوف صور الصادق المهدي وتصريحاته.
• وفي النهاية نطلع من الجريدة بي حل الكلمات المتقاطعة.
• الصادق المهدي هو الشخصية الوحيدة في العالم الذي احتفظ بمكانته وتأثيره على الحياة في السودان حاكما ومعارضا.
• كتبت في الحتة دي كتير.
• والليلة بقف فيها مخصوص.
• الصادق المهدي …اذا غاب حاضر.
• هو في البلد.
• او برة البلد واحد.
• وجوده.
• مكانته.
• تأثيره.
• نفس الشيء.
• دي حاجة اسألوني منها أنا.
• تشهد بها (فكتوريا).
• في كمبالا – الحزن (اسمر).
• وسمرة الحزن (صعبة).
• طلعت الشارع …لقيت ليك في (موتر) عاكس الشارع.
• وعاكس الشارع دي بتعادل عندنا في السودان السير في المسار الصحيح.
• الحركة يمين.
• قلت معقولة.
• الحزن وصل حتى لتلك (المواتر).
• ما تغضبوا ساي.
• ما تزعلوا.
• في يوغندا – الطلبمات فاضية …لكن كما علمت ان لتر البنزين الواحد بدولار.
• ما في دعم.
• عشان كدا ما في زول بقيف ليه في طلمبة 3 دقائق.
• في يوغندا – العملة فيها كمية من الاصفار ..لا اول ولا اخر لها.
• الاصفار الموجودة في العملة ..بي آلة حاسبة ما بتقدر نحسبها.
• تتصوروا نحن لغاية الآن ما قادرين نتعامل مع العملة اليوغندية.
• لمن نشترى لينا حاجة (ان شاءالله موية صحة) بنقول لاقرب زول دي يعني كم؟
• قروشنا الشايفنها ما عندها قيمة ..قدام العملة اليوغندية …تقدل في شارع القصر.
• الشلن هو العملة اليوغندية ومشتق منه الفلس.
• يعني (فلس) رسمي.
• فلس حتى في العملة.
• الحاجة التانية ..بكتب هذا العمود للمرة الثانية …كتبته في (التلفون) ..قفل ..رجعت اكتبه في اللاب توب ..عشان كدا …الليلة ما بتلقوا (فكتوريا) كتيرة في هذا العمود.
• وانا ذاتي ما عندي رغبة في بحيرة (فكتوريا).
• وكتابة العمود مع التغطية الخبرية بتعمل شوية حول – خاصة لمن يكون في (حزن) مجنب.
• ونحن وقت نمسك في (الحزن) كعبين.
• حزن كعب.
• خايف يظهر لي في نتيجة فحص الكورونا.
• سألوني مرة عن العلاقة بين الحزن والجبنة.
• قلت ما في علاقة.
• قدرت ما فكرت ما لقيت لي علاقة.
• قالوا لي طيب عدم العلاقة دي ذاتها ما علاقة.
• افسر ليكم الحتة دي.
• والله انتوا لو بتصبروا بقول ليكم.
• في ناس بتزوجوا بي علاقة.
• وفي ناس بتزوجوا بي علاقة.
• ومرات كثيرة الزواج البكون بدون علاقة بنجح اكتر من الزواج الناتج من علاقة.
• ومرات اكتر كمان العلاقة لا تؤدي الى الزواج.
• عشان كدا علاقة او ما علاقة واحد.
• النتيجة واحدة.
• ما تقعدوا تنظروا لينا.
• نحن كان عندنا حروبات قالوا لينا ميزانية الحرب كبيرة ..وهي سبب الفقر وتدهور الاقتصاد.
• عملوا لينا سلام ..قالوا لينا استحاقات السلام كبيرة.
• والناس لازم تصبر.
• ما عرفنا نمشي وين؟
• ………………
متاريس
• الليل اتأخر …وليل كمبالا من الساعة السادسة بدخل في حتة انصاص الليالي.
• تمارين الهلال احلي من مباريات برشلونة.
• والريال.
• عشان ما تفسروا الحكاية غلط.
• مقدم عيد …عامل شغل كبير.
• واضح ان المدرب عنده رأي كبير في عيد مقدم.
• عبدالمهمين صنع اجواء (اخوية) و( وودية) جميلة في الهلال.
• الهلال كله تشعر بيه اسرة واحدة.
• المدرب واضح انه سوف يعتمد على لاعبي المنتخب.
• الكورة …بكرة.
• …….
• ترس اخير : يا زول رسل العمود خلاص.
يا سلام عليك يا ود عبد الماجد، مبدع كما عهدناك دائما وتعطي كل ذي حق حقه !!
رحم الله الإمام الصادق المهدي وأنزل عليه شآبيب الرحمة وأبدله دارا خيرا من داره وأهلا خيرا من أهله، وإنا لله وإنا إليه راجعون !!
تعال يا ولدنا يا أبو المستعار المندلاوي ما تفوتك المحاضرة المجانية دي، نضف أحقادك في أواخر عمرك !!