الهلال يستعين برائحة (الكلونيا) لهزيمة المريخ!!

قزاز ورذاذ

محمد الطيب الأمين

الهلال يستعين برائحة (الكلونيا) لهزيمة المريخ!!

* زمان كنت في يوم مباراة القمة (بقفل تلفوني) وبمشي (الحلاق) .
* حتى لو (حالق) تاني برضو بمشي احلق.
* بمشي الحلاق عشان بعد المباراة تنتهي بنستقبل التهاني من الأحباب.
* اصلو فوز الهلال (عيد).
* زمن المتواليات الخمسة ديك.
* قبل كل (متوالية) كنت (بحلق).
* أول ما المباراة تنتهي عندي جلابية معينة بلبسها وبمرق استقبل الهلالاب.
* بنكون شغالين (تهاني ومباركة) لحدي الساعة تلاتة صباحاً.
* تهاني تقيلة.
* عشان كده الواحد بحب يكون (حالق).
* ما صاح تقابل الهلالاب وانت ما حالق.
* من باب الذوق.
* والاتكيت.
* لو الهلال والمريخ اتقابلو مرتين في اليوم الواحد لازم نحلق مرتين.
* هكذا كنت استقبل مباريات القمة.
* وأي زول طبعاً حر في (إستقبالو).
* امبارح سألت من الحلاقة قالوا ب(٤٠٠).
* قلت اسأل عشان الليلة امشي احلق وبعد المباراة ألبس جلابيتي المعينة ديك واطلع على التهاني.
* لكن لما قال لي الحلاقة بي ٤٠٠ قفل نفسي.
* قال لي ٤٠٠ رأس، و١٥٠ دقن.
* قلت ليهو أنا أصلاً شعري ما للدرجة دي.
* قال : لا.
* حلاقة يعني حلاقة.
* المهم.
* صرفت نظر.
* قلت ما في داعي ادفع لي ٤٠٠ والدنيا آخر شهر.
* صعبة شوية.
* عشان كده قررت اقابل الهلالاب بعد المباراة بدون حلاقة.
* أول (عيد هلالي) غايتو ما نحلق ليهو.
* الله يجازي الظروف الإقتصادية ياخ.
* لكن نحن على ثقة بأن نجوم الهلال (سيحلقُون) للمريخ.
* احلقوا ليهم بدون (قطعية).
* وبدون كلونيا.
* حلاقة ناشفة.
* المريخ في آخر مباريات القمة كان هو الطرف الأفضل من حيث النتائج .
* وقد حقق الممتاز ٣ مرات في غفلة من الهلال.
* ٣ مرات والتلاتة مرات ما محسوبة لانو فيها مرة الكاردينال اداهم ليهو (تسليم مفتاح).
* وفي مرة شالوا بالتحكيم.
* والمرة التالتة شالوا بسبب (حاجات تانية حامياني).
* المريخ اليوم يدخل اللقاء بحسابات أنه الطرف الأفضل من واقع نتائج القمة الأخيرة.
* بينما الهلال ربما يحس بهاجس الخسارة.
* أو بعض الهلالاب يحسون بذلك.
* ولكن مؤكد المعطيات داخل الملعب مختلفة.
* هنالك وجوه جديدة في الهلال تمثل مصدر قوة وخطورة كبيرة لأي خصم.
* وعلى رأس هذه الوجه نجم السودان الأول محمد عبد الرحمن إلى جانب أبو عشرين وعيد مقدم وبوغبا وغيرهم من العناصر.
* هذا الي جانب العناصر القديمة والتي لا تقل قيمة عن العناصر الجديدة.
* المريخ سيخصص أكثر من لاعب لمراقبة الغربال.
* الضغط على محمد ح يكون كبير ولذلك لابد أن يعتمد الهلال على حلول خلاف الغربال.
* المريخ بيركز مع الغربال ولهذا يجب أن يكون كل نجوم الهلال (غربال).
* مشاركة نزار حامد واردة.
* وإذا شارك نزار عليه أن يكون قدر الرهان.
* كثير من المباريات المهمة لم يكن نزار في الموعد.
* أيضا ظهور روفا وارد جدا.
* ننتظر منه مستوى أفضل وخدمة أكبر لصالح الفريق.
* داير تغلب المريخ (تهاجمو من اول دقيقة).
* وما ترجع نهائي.
* المريخ عندو ٧ دقايق بيتحرك فيها.
* ما تخليهو يتحرك.
* تضغطوا وتعصر عليهو.
* ما تديهو فرصة.
* أي لاعب هلالي عليه أن يجتهد.
* لما المدرب يكون باني عليك آمال وتجي تخذلوا في مباراة زي دي من الصعب تلقى فرصة بالساهلة في المباريات القادمة.
* كل لاعب مطالب بأن على قدر رهان المدرب.
* اجتهد وركز وألعب بثقة.
* ولازم تعرف المريخ خفيف شديد.
* والهلال مليان نجوم.
* نحن منتظرين حتى لو ما حالقين.
* اللهم أنصر الهلال لأن في نصره فرحة ل٨٥٪ من أبناء هذا الشعب.
* اللهم أسعد قلوب الأغلبية يا الله.
* ونركب صافنات ونجيبة (هلالابية) واصلو الزول بيموت والذكرى تفضل حية.
* و.. و..
* ونعيماً مقدماً.