في الصمت كلام
محمد عثمان بلل
الوصيف عالم مخيف ..!!
• أفادنا مراسلنا الحربي من العرضة جنوب .. ان سكان المنطقة يعيشون في أوضاع مأساوية جراء القتال العنيف الدائر هناك بين أنصار (………………..) كدي دقيقة يا عمك .. أنصار منو ومع منو؟
• أكضب عليك انا زاتي ما عارف القتال دا شغال عشان شنو وبدافعو عشان منو .. المهم في قتال مدور وخلاص .. كيف مدور وخلاص .. في العالم كله في قتال بتفجر ساي إلا يكون في اسباب.
• كان جيت للحق .. أحيانا في ناس ما عندهم موضوع يمكن يعملوا حرب ساي كدا .. عشان الزهج .. طيب أنا أقول ليك حاجة تانية .. قول يا عمك اصلك الايام دي بقيت تقول كلام كتير .. في ناس برضو بعملوا حرب عشان الناس يقولو (نحن هنا).
• طيب ناس الوصيف ديل مالهم .. شفت النقطة التانية دي .. بتاعة ناس (نحن هنا) اي بس ياها زاتها .. طيب ليه بعملوا كدا .. الناس ديل يا فردة مفلسين جدا .. وفريقهم طار بدري من البطولة الافريقية .. وقطعوا 90 % من الخروج من البطولة العربية .. يعني الموسم بالنسبة ليهم انتهى.
• عشان كدا البحصل دا عشان يشغلوا الجماهير المسكينة شوية من التردي الحاصل في فريق الكرة بموضوع اقالة الديسكو والتعاقد مع مدرب جديد.
• طيب خلاص كفاية .. ممكن تسيب المراسل الحربي يواصل نقل الاخبار .. ماف مشكلة هو زاتو وينو المراسل دا .. شكلو نام .. يا مراسل واصل شغلك.
• المراسل: وقد تسبب القتال في دخول سكان هذه المنطقة في اضراب شامل بسبب عدم (القبض) .. وكان قائد المنطقة الميدانية الضحية .. بعد ان تم ابعاده خارج اسوار المنطقة بالرغم من طموحاته التي كان يسعى لتحقيقها مع الوصيف .. إلا ان قرار العزل كان اسرع .. ولم يصمت هذا القائد الميداني واكد استرداد حقوقه على طريقة العجوز الفرنسي (غارزيتو).
• يا الديسكو شوف غيرها (جيمي) قاعد وبدفع طوالي .. قروشك دي كمان ما بتعمل ليهو اي حاجة.
• وأفادنا مراسلنا ايضا ان الاوضاع تنذر بالمزيد من الانفجار عقب استئناف الدوري .. انتظرونا بالجديد والمثير وكونوا معنا.
• من جانبنا نحذر المواطنين من المرور بالقرب من تلك المنطقة حتي لا يتعرضوا للأذى من طلقة دوشكا طائشة .. أقصد بسبب مدرب تم اقالته او لاعب تم شطبه وتم رميه من فوق الأسوار.
• بكرة تعالوا بدري عشان في جديد.
