(انجغم) فعل ماضي مبني على النية الكعبة!!
صَابِنّها
محمد عبد الماجد
(انجغم) فعل ماضي مبني على النية الكعبة!!
في صيف 1984م، جلس رجلٌ سبعينيٌّ بعيونٍ، ذهب الذهول بإنسانها، يحدث الناس عن صناعة (البطيخ) من (ريش النعام)، وقتها قالوا عن ذلك الشيخ السبعيني إنّه مجنون، لم يبالوا به واعتبروه يخرِّف.
البطيخ ذنبو شنو في البرد دا؟
لم يدروا أنّه وحيث كنا ومن هذا المنطلق أنّه بعد أربعين سنة من ذلك التاريخ سوف يظهر (الذكاء الاصطناعي) وسوف يصبح ذلك ممكناً ومتاحاً للجميع.
الذكاء الاصطناعي عيشتو تطير!!
الزول بقي يقول ليك: عندي أخ شقيق وأخ غير شقيق، وأخ بالرضاعة، وأخ لم تلده أمي، وأخ (ذكاء اصطناعي).
يمكنني الآن بواسطة (الذكاء الاصطناعي) أن أعد طبق (فسيخ) من (حروف العلة). ومن (همزة الوصل) يمكن أن أعد ليكم (شوربة فراخ).
شوربة الفراخ ذنبها شنو؟
وسَلَطة الأسود ينتابني شعورٌ قويٌّ نحوها إنها تُصنع من (التاء المربوطة).. ما عارف ليه؟
يقول الروائي الأوروغوياني كارلوس ليساكنو في روايته (عربة المجانين): (للسجناء البائسين شغف باستثمار الوقت، لا بد من القيام بشئ إيجابي، شئ يهب الحياة، لئلا يتحجّر المرء ويستسلم لمشيئة الجلاد).
المعنى في كل الأحوال، وكل الظروف حاول أن تستفيد من وقتك، حتى لو كنت في السجن.
لا تمنح الجلاد شرف أن يشعر بالسعادة لأنّه نجح في أن يجعلك تعيساً.
الظروف لا تصنع التعاسة، لأنّنا نحن من نصنع ظروفنا.
لا تجعلك ظروفك سبباً في تعاستك.
الجلاد في بلدي يتحدّث في السياسة ويتحدّث عن الوطنية والحرية.. يتحدّث عن كل شئ ويقتل كل شيء، وعندما يظهر في التلفزيون يقول: عاش السودان حراً ومستقلاً.
ويقول وهو لا يبالي: أيُّها المواطنون الشرفاء إنّ أفضل طريقة لترشيد الكهرباء هي زراعة الفجل واللوبيا العفن.
الفجل عيشتو تطير!!
(ترشيد) دي ما بتلقوها في حِتّة تانية، ولا في زول بجيبها ليكم مع (اللوبيا العفن)!!
مرة التقينا صدفةً، شرّيت (دهشتي) في حبل الغسيل.
حبل الغسيل كان بعضاً من تخيُّلي، أما الدهشة فقد كانت حقيقة تمثل أمامي.
أشواقه كانت مثل اللبن عندما يفور، قدر ما تجري عليه عشان تنزلو من النار، بتلقاه فار وادفق.
لمن تضع حلة اللبن في النار، تركز وتنتبه اللبن ما يفور.. تسرح من الحلة، اللبن يفور ويدفق.
تفتكروا بحصل كدا ليه؟
زي تيه واتاكا.
أو يا مداعب الغصن الرطيب.
هسع علاقة الغصن الرطيب بالكلام دا شنو؟
تنفخ أصبعك وترجع وانت حسير من حلة اللبن.
ما تسرح.
الحسرة جُزءٌ من تركيبتنا.
بنقعد نتحسّر كدا لمن ننحسر.
في حواره مع معاوية جمال الدين قال الروائي العالمي، عبقري الرواية العربية، الطيب صالح:
(إنّ المعاناة في الحياة يمكن أن تخرج عنها أدب، لكن يجب ألّا تتعدى حدّاً تصبح فيه غير محتملة. الإنسان، المواطن، يكتسب طمأنينة إذا كانت بلده بخير، أنا كسوداني أشعر بهذه الطمأنينة إذا كان السودان بخير وأهلي بخير، هذا يعطيك نوعاً من الثقة، عندما يكون الأهل في مِحْنَة تصبح المِحْنَة غير صالحة لأن تنتج إبداعاً).
والوطن الآن ليس بخير.
ولا بصحة جيدة.
الوطن في مِحْنَة.
يا حليل زمان أي جواب بصلك من البلد بقول ليك نحن بخير وصحة جيدة، حتى لو كان في زول بيحتضر.
الناس كانت مليانة يقين.
الناس كانت شبعانة طمأنينة.
وصلني خطاب يقول راسله فيه: التوم ود العجلة (انجغم) بي عجلتو، عمك انكشح وجاري البحث عن (جنزير العجلة)، وعمك ود الشريحة (انجغم) بي شريحتو، وخالاتك السبع (انجغمن)، والرفيد ود حسن سيد الدكان (انجغم) بي دكانو، والزول الكان بتحوِّل منو رصيد في بداية السوق (انجغم) بي رصيدو، وحنينة بت سعد، كانت تعمل في شاي المغرب (انجغمت) بي شايها، وحسان الترزي والطيب ود العشم والفاتح ود الربيكا، وبتاع الحطب ومصطفى أستاذ اللغة العربية اللي درّسنا في سنة رابعة ديل كلهم (انجغموا).
والدكتور القلع ليك ضرسك (انجغم)، والحلاق البيشتغل يوم الجمعة فقط.. وشافعة عمك التاج الكانت بتغني في الدورة المدرسية (يا وطني يا وطن أجدادي) (انجغمت).
الله يرحمهم جميعاً ويحسن إليهم.
ومصفاة الجيلي وخزان جبل أولياء وكوبري شمبات، ومشروع الجزيرة وسكر سنار، البلد كلها (انجغمت).
وعثمان أبو راس بضرب ليه لي أسبوع، في جرس وما في رد، خايف يكون (انجغم).
باختصار شديد، الحلة كلها (انجغمت)، ما فضل فيها غير الصهريج الفوق و(غنامية) التايه بنت حرجل و(جدادة) السارة بنت خسران.
وعشان (الصورة) تبقى ليك واضحة أنا ذاتي (انجغمت) الجواب دا بكتب ليك فيه قبل حصول (الانجغام) أو باعتبار ما يكون أو ما تسموه في العلم الحديث (الذكاء الاصطناعي).
والله العظيم وانتو ما طالبني حليفة، ناس محمد بشير عتيق ديل لو كان لقوا (الذكاء الاصطناعي) دا كان عملوا عمايل.
الناس ديل بدون (ذكاء اصطناعي) وصلوا القمر (لي نية في قمر السما) ومن غير واتساب أَو لايف قالوا (في الطيف أو في الصحيان زورني).. الكلام دا عليكم الله ما سبق التقنية والإنترنت.
جاني طيفو طائف في ثوب من اللطائف دا شغل (فيديو).
دا ما شغل طيف.
ناس الهلال قالوا عاوزين ليهم (رأس حربة)، قلت ليهم رأس حربة تعملوا بيها شنو مع الحرب دي؟ انتو عاوزين ليكم (دبابة) عديل.
زمان جابوا لينا مدرب أجنبي في الحلة، المدرب واقف يحاضر فينا ساعة ونصف، ونحن ما فاهمين حاجة.
بعد ستة شهور فهمنا إنو كان بقول لينا ألعبوا من لمسة واحدة واطلعوا مع الهجمة واضغطوا من قدام.
كابتنا قال ليه نحن لو بنقدر نعمل الحاجات دي كنا مشينا لعبنا في برشلونة، نلعب من لمسة واحدة كيف ونحن الكورة لو ما عفصناها وجرينا بيها ربع ساعة وعكسناها في الكشّافات ما بنضوق ليها طعم.
نحن لو كُنّا بنلعب من لمسة واحدة، كان بقينا دكاترة، الجابرنا على (اللبع) دا شنو؟
الشوط الأول طلعنا مغلوبين خمسة.
بين الشوطين، رئيس النادي نزل من المقصورة ودخل علينا في غرفة الملابس، شال المدرب الأجنبي وقال لينا ألعبوا كورتكم البتعرفوها.
نزلنا الشوط التاني أول ما مهاجم الفريق المنافس ينفرد بالكورة بنسمع لينا زول يكورك من على الخط يا عباس (اجغم) المهاجم.
عباس ما بكضب بجغمو ليكم في لمحة.
جغمنا الحكم.
المهم وقت الشوط التاني انتهى لقينا نفسنا غالبين سبعة.
جغم ساي.
من اليوم داك عرفنا ليك إنو قدراتنا وإمكانياتنا متوافقة مع (الجغم) وليس مع (اللمسة الواحدة).
اللمسة الواحدة هي شية جمر؟
هسع علاقة شية الجمر بالموضوع دا شنو؟!
أهو كلو (جغم).
أحد شعراء أمريكا قال: (… لأن الحروب تبدأ في عقول البشر، فلا بُدّ من إقامة صروح السلام في عقول البشر).
علينا أن نفعل ذلك أولاً.
علينا أن نقيم صروح السلام في عقول البشر.
نحتاج إلى ذلك فعلياً.
…..
متاريس
المريخاب زعلانين من معتصم جعفر وأسامة عطا المنان ليه؟!
فريق لا عندو رئيس ولا عندو مدرب ولا مشارك في منافسة، يعسكر على شنو؟
إنتو مفروض تمشوا (الاستنفار).
المعسكرات خلوها للأندية التي تمثل البلاد خارجياً.
للأندية التي تلعب في هذه الظروف في مرحلة المجموعات.
أحسن شيء شوفوا ليكم (استنفار) وانضموا ليه.
لو عاوزين تخدموا الوطن.
ما عندكم خيار غير ذلك.
إذا كان المريخ بيعير ويحوِّل في لعيبته لأندية أخرى، المعسكرات لزومها شنو؟!
محمد المصطفى تمت إعارته لنادي عزام التنزاني (تحويل رصيد).
ومحمد الرشيد (جار الإرسال).
كرشوم أحسن يلحق مستقبله.
كرشوم قال شوفوا ليه نادي محلي.. ما عاوز يتغرب.
الهلال في حاجة إلى أن يلعب مباريات تجريبية كثيرة في ملعب شهداء بنينا قبل مباراة بترو أتلتيكو حتى يتعوّد على الملعب.
لا سيّما وأنّ ملعب شهداء بنينا نجيل صناعي.
والهلال بعاني في الملاعب التي تكون أرضيتها نجيل صناعي.
يجب الانتباه لذلك.
ملعب دار السلام الهلال تعوّد عليه وهو ذو أرضية رائعة.
إيجابية ملعب شهداء بنينا تتمثل في الدعم الجماهيري الذي سوف يجده الهلال عندما يُواجه بترو أتلتيكو.
كما أنّ الأجواء سوف تكون غريبة ومُخيفة على بترو أتلتيكو، عكس أجواء دار السلام التي لا تختلف كثيراً عن أجواء لواندا.
ولكن علينا أن نتذكّر أن بترو أتلتيكو في تونس حقق نتائج إيجابية.
انتصر بترو أتلتيكو في تونس على النجم وتعادل أمام الترجي.
لذلك المباراة لن تكون سهلة.
لكن مربوحة إن شاء الله.
أهم مِيزة في لعب الهلال بليبيا أمام بترو أتلتيكو في اعتقادي تتجسّد في أن الهلال سوف ينتقل بعد المباراة إلى تونس في رحلة غير شاقّة لمواجهة الترجي في رادس.
الفرق بين مباراة الهلال أمام بترو أتلتيكو، ومباراته أمام الترجي أقل من أسبوع.
السفر من دار السلام إلى تونس كان سوف يُواجه الهلال فيه مشقة كبيرة.
نتمنى أن يستفيد الهلال من هذه المزايا.
لا بُدّ أن يتأهّل الهلال حتى لا يدخل في إجازة مفتوحة مثل المريخ.
المريخ خارج نطاق الخدمة.
ناس الجزولي ورمضان عجب لمن يرجعوا للكورة بكونوا نسوها.
الجماعة ديل ليهم سنة من الكورة.
المريخ لا رئيس ولا مدرب ولا ملعب ولا كورة.
قاعدين ساي.
في هذه الأيام رحل عنا المصحح اللغوي والهلالابي المعروف الحاج عبد الوهاب وهو رحيلٌ سوف نعود إليه، وعزيز سوف نكتب عنه إن شاء الله.
نسأل الله تعالى الرحمة والمغفرة للحاج عبد الوهاب مصحح “الرأي العام والانتباهة” والعديد من الصحف.
سنعود لذلك لاحقاً.
….
ترس أخير: سوف تُفرج إن شاء الله.