*انتهي هاجس غارزيتو بعد طلع زيتنا
*وصلنا مرحلة غرزة بقي لينا فيها زي ود ام بعلو
*كان جات سيرتو اعصابنا تبوظ
*نحمدك يا الله
*لكن اتزرينا زرة كلب في جزارة والناس مضربة عن اللحمة
*لكن المحيرني
*موقف المجلس
*حتي الخمسين الف دولار الوعد بسدادها ابونا آدم
*قالوا قام فوق ورفض يقابل الفريق فاروق
*بالغت يا آدم
*ماتقول لي كمان مابتعرف مقامات الرجال وقامات المريخ
*الفريق فاروق لو جا لي زول ميت
*المرحوم بمرق من قبرو اجلالا لسعادة الفريق فاروق
*غايتو عملتها ظاااهرة ياسوداكال
*سوداكال خليهو
*المجلس ولا كان هاميهو
*قاعدين وضاربين طناش من الموضوع ومقيلين تحت لافتة كتبوا عليها
*اندفعت ما اندفعت صابنها
*ده كلام ياناس؟
*الصبة الشنو اقول ليكم!
*تعاملكم مع الموضوع فسر كتير من علامات الاستفهام التي كانت مرسومة علي اذهان الناس
*وبانت حقائق قلما توصف انها ادانة واضحة لجنابكم تجعل من اجتنابكم القرب من المجالس مستقبلا فرض عين
*ويحلنا الحل بله
*ويبلنا البل حله
*ويفكنا الفكة للسودان الحبيب
*المهم
*ذهب عهد الفساد واكل الاموال بالحرام
*ونستشرف عهدا جديدا نود فيه ان نجد للحلال موطئ قدم في بلدنا ليبارك الله لنا وفينا
*وبمناسبة الحرام دي
*في نقاش اسري جمع العائلة بالصدفة حول مائدة الحوار
*احد المتعاطفين مع العهد البائد كان يحاول ان يجمل الصورة القبيحة لمنسوبي ذلك العهد لتبرير تلك العفانات التي استولوا بها علي البلاد ورزق العباد الحي منهم والمات
*وبتبرير فطير قال في تصرفات الزول بكون ماعارفه حرام
*الزول ده حبوبتو كنداكة
*عاينت ليهو بقعر عينها وقالت
*الحيوان بعرف الحلال من الحرام
*صاحبنا طوالي لقي ليهو مدخل وقال
*الحلال والحرام ربنا خص بيهم الانسان الذي كرمة وفضله علي الحيوان
*والحلال بين والحرام بين وبينهما امور متشابهات
*(وصلح قعدتو)لقي ليهو مدخل عاد وقال
*هذه الامور المتشابهات هي التي تجعل من للمؤمن مخرجا اذا حسنت نيته ورب العباد هو الوحيد الذي يعلم النوايا
*لذا لايصح ان نطلق علي انسان حرامي ولايجوز شرعا ان نصف عهد بانه عهد الحرامية
*حببوبتو تعاين ليهو سااااي
*وواصل
*لذا الحيوان مابعرف الحلال والحرام ياحاجة
*الحاجة قالت ليهو بعرف
*قال ليها دليلك
*قالت ليهو دايلي كديستي دي
*قال ليها كيف يعني؟
*قالت ليهو انا بقطع في اللحمة وكديستي حايمة تحتي
*البديها ليها بتاكلها في محلها تحت كرعيني
*والبتختفها بتجري بيها
*دحين الكديسة ماعارفة الحلال من الحرام؟
*ياسلام عليك ياكنداكة يا خبيرة
*فعلا الحيوان بعرف الحلال والحرام
*المهم
*زي ماكان محمد الامين ووردي هما ايقونات النشيد في اكتوبر
*كان دسيس هو ايقونة ثورتنا دي
*كلمات بسيطة ولكنها عميقة اقتلعت الدولة القالوا عميقة
*الحان جميلة تمكن ود ابرق من الغناء مع البلابل بدون نشاذ
*وكورال متفرد
*كورال كفر بالجهوية فكانت كل اجزاء البلد له وطن
*كفر بالقبلية وكان اهلي بكل سحناتهم حضورا
*آمن بالتعايش الديني فكانت كل الاديان مقدسة تعزف سمفونية السلام
*لله درك يا دسيس
*المهم
*نعود لمباراة المنتخب
*المنتخب كان بايخ وليست له استراتيجية
*المكاسب اتنين
*التأهل وعودة الجماهير لمدرجات المنتخب بتلك العددية واعلام السودان حضورا مشرفا
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*قدر ما اديناك شمار ما اشتغلت بينا
*نقلبها شمارات حمدوك يا اخينا؟
سلك كهربا
ننساك كيف والكلب قال بعد قصة الكديسة عاد كيفن الحيوان مابعرف الحلال من الحرام
والي لقاء
سلك
