اول ظهور للجامايكي (الفيس).. الليلة (الفيس) بيشتعل

صابنها

محمد عبد الماجد

اول ظهور للجامايكي (الفيس).. الليلة (الفيس) بيشتعل

• من المتوقع باذن الله وتوفيقه ان تمثل مباراة الهلال اليوم امام الشرطة القضارف ضمن مباريات الاسبوع الثامن للدوري الممتاز (الظهور الاول) لمحترف الهلال الجديد المدافع الجامايكي (ألفاس إلفيس باول) الذى وقع عقد انتقال إلى نادي الهلال السوداني من نادي إنتر ميامي، الذي يلعب في الدوري الأمريكي لكرة القدم.
• اول ظهور لـ (الفيس) – الليلة (الفيس) ح يشتعل.
• الليلة (الفيس) ح يفهم شيء.
• اجدع (لايك).
• اعمل (تاق).
• اكتب (كمونت).
• جدد الاشتراك.
• حدّث الصفحة.
• محترف الهلال الجامايكي ألفاس إلفيس باول يمكن بنسبة كبيرة ان يشارك في مباراة اليوم او على الاقل يشارك في الجزء الاخير من المباراة.
• الغربال الليلة (الكورة) بتصلك زي (علبة الحلاوة).
• اتفرغ للتسجيل.
• ما تصنع.
• ما تحاور.
• ما تتعب.
• سجل بس.
• ناس ألفاس إلفيس باول بجيبوها ليك لغاية الباب.
• بتصلك.
• لغاية الشبكة.
• الكلام دا للغربال والشعلة والضي وعيد مقدم.
• الموضوع كمان يمكن يكون فيه ابراهيما انداي.
• الشيء يمكن ان تجيب ليها (برد).
• سقط عديل كدا.
• صلاح نمر الليلة قلبو بقيف.
• اتوقع الليلة في مباراة الهلال والشرطة صلاح نمر يأخد ليه (كرت احمر).
• صلاح نمر ما عندو صبر.
• صلاح نمر ما بصبر ليكم لغاية الاسبوع الـ 11..والذي يواجه فيه الهلال فريق المريخ في قمة الممتاز.
• صلاح نمر من هسع بنطرد ليكم.
• الليلة صلاح نمر ما عندو علاقة بالمباراة.
• لا من قريب.
• ولا من بعيد.
• ولكن مع ذلك ما بثبت ليكم.
• ما بركز.
• صلاح نمر من الليلة بقعد يرجف ليكم.
• ويقول ليكم (ركبتي).
• وعيني الشمال.
• وعندي ظروف.
• والمواصلات صعبة.
• والكبري مقفول.
• وأنا ما بقدر اجري بعد العمر دا.
• الليلة يمكن تجيب ليها (مطرة).
• تجيب ليها (بكاء) عديل.
• ووجع رأس.
• خليكم شاهدين.
• خليكم حافظين الكلام دا.
• ناس المريخ قالوا شنو عن ألفاس إلفيس باول؟
• قالوا الزول دا بعيد من اللعب.
• وقالوا هو ذاتو مصاب.
• وما بنفع الهلال في شيء.
• في مباراة اليوم بحصل الرد من ألفاس إلفيس باول.
• الفيس بولع.
• ح تفهموا حاجة.
• وزي ما بقول المعلق المصري مدحت شلبي ..لفتاتو ، ونفخاتو ..ونظراتو وهو يتحدث عن عبدالله السعيد عندما يريد ان ينفذ مخالفة امام المرمى ، نحن كمان بنقول عن ألفاس إلفيس باول ، لفتاتو …عكسياتو …تحركاتو …تمريراتو.
• وزي ما قلنا.
• وبنقول.
• العندو (مصران) من اخوانا المريخاب – احسن يبعد لينا من المنطقة.
• يبعد من التلفزيون (نهائي).
• العندو الضغط.
• السكري.
• ما في زول منكم يقرب لمباريات الهلال – بتروحوا فيها ساكت.
• نزار حامد براهو الايامات دي بعمل ليه في حاجات (خرافية).
• حاجات عجيبة.
• نزار حامد بقى هداف الدوري.
• هداف الممتاز.
• ان شاءالله الليلة يمارس هوايته في الانفراد بلقب الهداف.
• ان شاءالله نزار حامد يواصل في ثنائياته.
• نزار حامد بجيب اقوانو – اتنين …اتنين.
• الشرطة في خدمة الشعب.
• والشعب الليلة عاوز الهلال ينتصر انتصارا كبيرا.
• هدفا واحدا لا يكفي.
• اهداف المريخ كلها مسجلها الفاضل ابوشنب.
• ضربات الجزاء التى منحها الفاضل ابوشنب للمريخ ، لو حولناها بطولات ممكن تجيب (كاس العالم).
• لكن في المريخ كل هذه الاشياء ما نافعة.
• وما جايبة حاجة.
• يغيب ابوشنب ….والمريخ يتعادل يا يخسر ، او يفوز في احسن الفروض بهدف وحيد.
• انتوا تعالوا هنا اخبار محترفين المريخ شنو؟
• قلوا عندهم محترف دخل البلاد بي (كيس).
• يعني دا اثبت من البداية كدا انو (كيسو) فاضى.
• احرجتنا مع ناس المطار.
• المحترف الجامايكي دا – واضح انه ما عاوز يعمر في المريخ.
• المحترف دا شكلو ما ح يقعد كتير.
• الشنطة مستكثرها.
• جاء شايل ليه (كيس).
• يعني نظام ما بقعد في البلد دي اكتر من 4 ايام.
• الشيء العجيب (السيستم) قالوا رفض محترفين المريخ.
• وناس المريخ بقولوا قبل ثلاثة.
• المهم المدافع النيجيري الذي يبلغ من الطول 193 سنتمتر ..قالوا السيستم رفضه.
• السيستم ما قبلو.
• يقبلو ليكم كيف مع (الطول) دا.
• الزول دا ما في سيستم في الارض بقبلو ليكم.
• دا ميدان عقرب ما بقبلو.
• ودوه (السلة).
• طائرة.
• قدم ما بنفع.
• انتوا جايبنو بالطول دا تولعوا بيه (الكشافات).
• نحن زمان معانا في الداخلية طالب (طويل).
• الزول دا ما كنا مستفيدين منه حاجة.
• الزول دا كنا وقت لمبة النايلون ما تولع ..بنقول ليه قوم شوفها.
• ولا بطلع.
• بقوم بس.
• تاني اصلو ما شفنا لينا منه فائدة.
• محترفين الهلال بظهروا الليلة.
• انداي.
• والفيس.
• وحتى جيسي الليلة ح يكون عندو كلام تاني.
• ح تتمتعوا مع جيسي.
• دار الرياضة ام درمان الليلة بتجيب اخرها.
• اليوم (عصرية) خاصة لمحترفي الهلال.
• ليلة ابداع المحترفين.
• مرات بنقول ليلة ابداعية خاصة عن عثمان حسين.
• او حسن عطية.
• او الطيب عبدالله.
• الليلة ح نشوف ابداع في مجال تاني.
• الفيس.
• وجيسي.
• وفيني كومبي.
• وانداي.
• وهناك طبعا الغربال.
• الغربال نحن عندنا ثابت.
• وفي عيد مقدم.
• ونزار حامد.
• وبوجبا.
• ان شاءالله بوجبا يكون مشارك.
• عشان بوجبا زي (المنظم).
• بوجبا بنظم اللعب.
• ان شاءالله مجاهد فاروق يلعب.
• وصلاح عادل.
• عاوزين نشوف كل اللاعبين.
• اي لاعب في الهلال عنده حاجة عاوز يقدمها.
• اي لاعب عنده امكانيات خاصة.
• واسلوب مختلف.
• وابداع جديد.
• عشان كدا نحن دائما في حالة ترقب.
• واي لاعب يشارك ..الناس بتنتظر مشاركته بترقب ولهفة.
• وما بتكتفي بذلك…بتمشي تسأل عن اللاعب الما شارك.
• يشارك بوجبا يسألوا من مجاهد فاروق.
• يشارك مجاهد فاروق يسألوا من صلاح عادل.
• يشاركوا ديل كلهم الناس تسأل عن الشغيل وابوعاقلة ونزار حامد الذين لا غنى عنهم في وسط الهلال.
• وبعد دا كله الناس عاوزة جيسي.
• وبشه الصغير.
• وسليم.
• وموفق صديق.
• المدرب يعمل ليكم شنو؟
• لجنة التطبيع الهلالية كل مرة بتدخل المدرب الصربي في ورطة جديدة.
• لجنة التطبيع جابت للصربي الفيس وانداي والدالي.
• هو المدرب ناقص.
• المدرب في ظل هذه الاسماء يتصرف ليكم كيف؟
• يعمل ليكم شنو؟
• والله نحن في لاعبين في الهلال لو قاموا يسخنوا ساكت بنتكيف منهم.
• زمان مهند الطاهر لمن يقوم يسخن – المدرجات كلها بتقوم.
• في جمهور زمان ما كان بيدخل الكورة.
• بقعد برة الاستاد.
• ينتظر مهند الطاهر يقوم يسخن ..عشان يدخلوا الاستاد.
• لو مهند ما دخل في المباراة وشارك هم ما بدخلوا الاستاد.
• ولا عندهم قضية بالكورة.
• او المباراة.
• …………
متاريس
• مباراة المريخ والاهلي شندي …تعرض الاهلي شندي لظلم من الحكم صفوت ميرغني.
• ضربة جزاء صرفها الحكم كانت مستحقة للاهلي شندي.
• انتوا بتجيبوا محترفين ليه؟
• عاوزين بيهم شنو مع الحكام ديل.
• ديل بقوموا بالواجب واكتر.
• محترف (طويل) اخر وصل للمريخ.
• يا ربي برضو شايل ليه (كيس).
• ………..
• ترس اخير : الليلة مباراة غير للهلال.