بالعصر متنا من الضحك وبالليل الضحك كتلنا !!

قزاز ورذاذ
محمد الطيب الأمين
بالعصر متنا من الضحك وبالليل الضحك كتلنا !!

* أمبارح ونحن ماشين على جبل أولياء لمتابعة مباراة الهلال كنا بنسمع في أغنية : (لمتين يلازمك في هواك مر الشجن).
* عثمان حسين هو أفضل رفقة في المشاوير البعيدة.
* لما نكون ماشين مشوار بعيد بنشيل معانا (موية وتُرمس ومناديل وعثمان حسين).
* (يا قلبي لو كانت محبتو الثمن .. يكفيك هدرت عُمر وحرقت عليه شباب).
* الكوبليه ده صادفنا ونحن في الصالحة تحديداً.
* لما وصلنا الجموعية شغلنا أغنية (ما شفنا الأسد بلاعب الجاموس وما شفنا المِرق بدخلو عرق السوس).
* ونحن في لفة المطار الجديد حسينا اللحظة محتاجة صوت أحمد شاويش فكانت : (أنا ما جاييك وشايل أفراح تملأ الدنيا).
* شوق الحبان وعطر الريحان.
* لما وصلنا الخزان شغلنا الهادي الجبل ، سمعنا دقيقتين من (بفرح بيها) وتلات دقايق من (المدينة) وخمس دقايق من (عارف وين خطواتك ماشة واخري معاك ما معروف).
* وصلنا باب الإستاد وقبل ما ندخل جا بتاع ركشة مشغل عافية حسن بالصوت العالي وهي بتغني : (يا الشلت حلاة كل الحلوين وما سِبت وراك زول يتحب).
* لقينا جبل أولياء بذات الإشراق والجمال والحضور.
* جبل أولياء التي تحس فيها بالأمان وتقابل فيها وجوه هي مثل الصدقة الجارية.
* وجوه منطرحة وشفاه تكثر من الترحاب والحمد.
* المهم.
* دخلنا الملعب.
* وشفنا هلال بنريدو من غير عِلة.
* شفنا عريس تم زفافه بعد موسم مليان مصاعب ومظالم.
* فكانت (عصرية) توفرت فيها عناصر الجمال الثلاثة : (الماء والهلال وجبل أولياء).
* حققنا الكأس و(الوصيف) راخي اضأنو.
* اللذيذة شلنا الكأس وقلنا نأكل سمك في الجبل قبل نرجع.
* ونحن في محل السمك في واحد فاتح الإذاعة.
* سمعت لي صوت تعليق ومباراة.
* قلت ليهم : دي مباراة منتخبنا الشاب في السعودية ولا شنو؟
* قالوا لي لا.
* ده المريخ.
* والمريخ اللاعب ليها شنو ونحن شلنا السمك واكلنا الكأس.
* غايتو جنس غايتو.
* قلنا ليهم الما بأكل من يدو ما بشبع.
* قالوا : لا.
* وقلنا ليهم المنتظر توتي تديهو البطولة أفضل يشرب من الترعة.
* قالوا : لا.
* في الثواني الأولى كان الغربال الشهير ب(لو رجعت السودان ما بلعب إلا للمريخ).
* ثم الشعلة وعثمان ميسي.
* ثلاثية قفل بها الهلال موسم الشوق الحلو.
* ثلاثية جعلت مباراة كوبر والمريخ (ودية شديد).
* حاصل قابلتك مباراة (ودية شديد)؟
* حصل قابلك فريق تتم إدارته من رئيسه المغترب عن طريق (الإيمو)؟
* قال ليك من شروط العمل بمجلس المريخ يكون عندك (إيمو).
* والله صحي.
* لو ما عندك إيمو لازم يكون عندك ماسنجر.
* واتساب ما ينفع.
* إيمو بس.
* حازم يدير المريخ بالإيمو.
* وصراحة ما عارف تنشيط خدمة نت أعضاء المجلس على حساب حازم ولا كل عضو بنشط بطريقتو؟
* نصيحتي ليكم اعملوا (5 قيقا).
* عارفين طريقتها ولا نكتبها ليكم؟
* فريق شال بطولة الدوري العصر وفريق لاعب بالليل بعد ما الدوري اتشال العصر.
* مباراة زي (السليقة الباردة).
* خجل ساي المفروض ما تلعبوا.
* المهم.
* اقيف لحدي هنا وأكمل باقي الفرحة من خلال قناة (دقايق) في حلقة ستبث عند الساعة الواحدة من ظهر اليوم.
* ونركب صافنات ونجيبها (هلالابية) واصلو الزول بيموت والذكرى تفضل حية.
* وتبكوا بس .. عين قطرة وعين مس.
* و.. و..
* ويا زول زظ.