بس خلوا يوم الثلاثاء ده يجي …!!

سوبر هاتريك
طارق محمد عبد الله
بس خلوا يوم الثلاثاء ده يجي …!!

& الكيانات الكبيرة كما سيد البلد وزعيمها الأصلي والاوحد هلال الملايين تشبه ما تحب ولأنه حبيب الناس وجوهرة الماس في الكرة السودانية فان الاغلبية الغالبة الا نسبة قليلة جدا جدا يحبونه وهو يبادلهم حبا بحب وعطاؤه يشبه ما يحب ولأننا في ظروف حرب عبثية معقدة جدا والفينا مكفينا عليه أي حبيبنا الهلال أن يعطي الجمال عشية الثلاثاء وذلك عن طريق تحقيق نصر مؤزر يدخل البهجة والسرور إلى النفوس غصبا عن الحرب وتداعياتها وباذن الله الضرغام الأزرق في الموعد بالدقة والدقيقة بس خلو يوم الثلاثاء ده يجي ….!!
& وانتصار الهلال على الليتوال يوم الثلاثاء باذن الله بات فرض عين على لاعبي الازرق وكيف لا وسيد البلد حاليا وزمااااان وبعدين كمان باذن الله ظل وسيظل الدافع الإيجابي لجل السودانيين ومصدر الفرح والسعادة في ساعات الدبرسه والزنقات وكلما تضيق عليهم ظروف الحياة الخناق يمثل لهم( ابو الهل) الملاذ الآمن واريكة الاسترخاء من المتاعب والمصاعب والمحن وكيف لا يكون ذلك كذلك والهلال معروف راجل كلس واخو إخوان زي اي سوداني لأجل ذلك هو حبيب الملايين وينتمي إليه الأغلبية الغالبة من السودانيين.
& وعليه فان فلوران وكتيبة النضال ممثلة في الفرسان الاشاوس الصناديد يعرفون جيدا ان انتصارهم المرتقب والمنتظر باذن الله على الليتوال باذن الله يعتبر بسمة جميلة وسط اطنان الاحزان و طاقة ودافع ايجابي لكل سوداني وين وين ماكان والهلال القوي برجاله وابطاله الصناديد باذن الكريم لا ولن يخذلنا ويخذلهم وارفع صوتك كون إيجابي انت سيد بلد هلالابي ،والمفرح أن الأخبار الجايه من تنزانيا كلها مبشرة بالخير الحمد لله كلو في محلو وتاااااني بس خلوا يوم الثلاثاء ده يجي والنجم يعرف الطفا النور منو …؟؟؟
اهداف سريعة ..اهداف سريعة
& ومع أنه يقع في نص الاسبوع إلا أن يوم الثلاثاء التاسع عشر من ديسمبر اكتسب أهمية قصوى هذه الأيام بسبب مباراة النجم المرتقبه .
& والشاهد ان الاب عندما يسأل من قبل الأبناء يا بابا عملت لينا شنو في الموضوع الكلمناك بيهو داك …؟؟؟
& فيجيب اصبروا انتوا بس خلوا يوم الثلاثاء ده يجي ويعدي بي خير وكل طلباتكم مجابه يا اولاد .
& والملاحظ بأن ترتيبات تبادل الزيارات وجميع أشكال التعامل بين الناس بات يوم الثلاثاء هو ميقاتها شفتوا كيف …؟؟؟
& وكما هو معلوم فإن الهلال هو ميقات صيامنا للشهر الفضيل نصوم لرؤيته ونفطر لرؤيته ودائما أفراحنا مرتبطه بالهلال .
& وقطع شك اكتر ناس منتظرين يوم الثلاثاء يجي فرسان الازرق الأشاوس عشان يدونا فرحة جديدة واحساس بالأمل في غد مشرق باذن الكريم.
& دائما نتطلع لهلال قيافة فايت العرب والافارقة مسافة.
& ازرق وابيض لون الفل هلال القمة حبيب الكل .
& ويظل الهلال الرقم الصحيح بالكرة السودانية وغيره الكسور والبواقي .
& وأخيرا احمد الله كثيرا انني حي ازرق .