بفتشوا (ريحة) السمك في الفول!!

• بعد مباراة اليوم والتى تجمع بين الهلال وهلال الابيض ، والتى يبدو ان حظوظ الهلال فيها لتحقيق الانتصار ان شاءالله اكبر من هلال الابيض ولو كان ذلك على الورق – خاصة بعد العودة القوية للهلال امام الامل عطبرة ، اتوقع ان يخرج علينا البعض مما اعتدنا منهم ذلك للحديث عن المباراة عشان يحتجوا ويعترضوا ويقولوا ليه؟

• محمد عبدالوهاب عنده اغنية احدثت ضجة كبيرة في الوطن العربي اسمها (من غير ليه؟).

• ونحن ما في حاجة بتودينا وراء غير (ليه) دي.

• اذا انتصر الهلال اليوم برباعية او خماسية نظيفة وقدم الهلال عرض (برازيلي) جميل باذن الله ايضا سوف يبحثون عن أي اشكالية او قضية جانبية للحديث عنها.

• في ناس قاعدين للشغلة دي.

• يشوفوا المطرة صابة وين؟ ويصبوا معاها.

• دعوني احدثكم عن احتمالية مباراة اليوم – على الاقل ما يمكن ان يكون على موقع التواصل الاجتماعي بعد المباراة.

• تعالوا ندخل على طقس (الاحتمالات).

• تعالوا نتعامل مع هذه (الفرضيات).

• من مشاكلنا اننا ما بنضع تصور لكل الاحتمالات.

• بننتظر الموضوع ينتهي ونتحرك على كدا.

• مع ان هناك مواضيع مكشوفة ومعروفة.

• في ردود افعال محفوظة والله حفظناها حفظ …وعارفنها نحن حتى قبل ان تحدث الافعال.

• ناقشنها.

• في ناس مجهزة (ردود الافعال) وقاعدة.

• الشاي والقهوة والفطور ذاتو ما بحلى ليهم إلّا بي ردود الافعال دي.

• عندهم (ردة الفعل) جاهزة.

• في ناس كدا – هم اصلا ردة فعل لغيرهم.

• قاعدين بس لردة الفعل (السلبية) حتى لو كان الفعل (ايجابي).

• نتحدث اليوم عن ردود الافعال (السلبية) تلك بغض النظر عن الانتصار الكبير الذي يمكن ان يحققه الهلال اليوم على هلال التبلدي.

• طبعا اذا حدث أي تعثر للهلال اليوم لا قدر الله – سيرة وفتحت.

• لقوا فرصتهم.

• ونحن ما قلنا.

• ونحن اتحدثنا.

• وسبق ان اشرنا.

• وتاني يرجعوا لي ما قلنا ليكم.

• لكن ما في زول بيسمع كلامنا.

• علما اننا نطالب ان تكون ردود الافعال (ايجابية) بغض النظر عن نتيجة المباراة.

• الهلال الشايفنو دا – ما في خوف عليه.

• وما عندنا أي مشكلة معاه.

• اصلو ما بنشفق عليه.

• هلال يهز ويرز وهو هكذا.

• في العلالي دائما ان شاءالله.

• حتى لو لا قدر الله حصلت عثرات.

• الكرة كدا.

• ونحن عارفين ان هذا الهلال قادر على ان يفعل في هذا الموسم ما لم يحدث في المواسم السابقة.

• الملامح ظاهرة.

• خلوني اسبق ليكم الاحداث واتكلم ليكم عن (فرضيات) سوف تحدث وتقع بعد مباراة اليوم.

• نحن عندنا علماء.

• نحن عندنا ناس اخطر من مورينهو وفيرجسون.

• اخطر من كلوب.

• اخطر من حمدوك ذاتو.

• جاهزين وقاعدين بي نظرياتهم.

• اذا شارك محمد عبدالرحمن من بداية المباراة – سوف يخرجون علينا ويقولوا كيف تتم المجازفة بمحمد عبدالرحمن ؟ على حساب اصابته السابقة في الصدر ويشارك اساسيا في مباراة اليوم مما يمكن ان يعرضه الى الرهق والاصابة.

• سوف يقولون ذلك حتى لو لم يحدث ذلك بعد المباراة…وان كان الغربال ان شاءالله في مباراة اليوم زي (الحصان).

• والله الغربال دا لمن يفتح.. 720 صلاح نمر ما يثبتوه.

• اذا لم يشارك محمد عبدالرحمن اساسيا في مباراة اليوم سوف يعترضون ويهاجمون الجهاز الفني ويقولوا كيف لا يشارك المهاجم الاول في البلاد اساسيا في مباراة اليوم؟

• نحن جبناه ليه؟

• والغربال جاء للهلال عشان شنو؟

• متى سوف يتم تجهيز الغربال بصورة تامة؟

• اذا لم يسجل محمد عبدالرحمن في مباراة اليوم لا قدر الله – ح يلقوا ليهم موضوع – اين الغربال ؟ وكيف لا يسجل؟

• وهل تأثر الغربال بالإصابة من جديد؟

• اذا سجل محمد عبدالرحمن في مباراة اليوم ثلاثة اهداف (هاتريك) سوف يهاجمونه ايضا ويقولون كيف لا يسجل محمد عبدالرحمن (سوبر هاتريك) في مباراة اليوم؟

• القون كان فاضي.

• وكدا غلط.

• متى سوف يسجل الغربال اربعة اهداف – خاصة انه اضاع هدف اسهل من الاهداف التى سجلها.

• دا بالنسبة للغربال.

• عيد مقدم ذاتو الليلة ما ح يسلم.

• اذا سجل مفروض كان يمرر.

• واذا مرر – ح يقولوا ليك عيد مقدم القون قدامو فاضى ..ما في داعي يمرر الكورة.

• هدف اكيد.

• نزار حامد يسجل في كل مباراتين هدفين – ما في زول يجيب سيرتو.

• يتقطع.

• ولا كلمة.

• يضيع ليه فرصة واحدة – البلد كلها تقوم فيها.

• ناس الحرية والتغيير ذاتهم يعترضوا.

• وتجمع المهنيين يعلن عن وقفة احتجاجية.

• عشان شنو؟

• عشان نزار حامد اضاع ليه فرصة مضمونة.

• معقولة بس.

• وليه؟

• وعشان شنو؟

• وكيف الكلام دا؟

• كمان نحن عندنا محللين في قناة الملاعب – لو جابوا ليهم بيبسي بقولوا عاوزين الشاي.

• لو جابوا ليهم الشاي …يقولوا عاوزين بيبيسي.

• لو جابوا ليهم القهوة يقولوا ما بنشرب حاجة.

• لو ما جابوا ليهم حاجة – يقولوا ليك نزار حامد.

• يقعدوا يهاجموا في نزار حامد.

• بس قاعدين لي الحاجات دي.

• الحاجة البتحصل …بتحركوا عكسها.

• الكلام دا كلو طبعا مقصود بيه زوران.

• اقول ليكم حاجة – انا من شفت الهلال دا ما حصل شفت لي مدرب مجتهد ومخلص وشغال زي زوران دا.

• شطارته سوف تتحدد بعد ذلك.

• في نهاية الموسم.

• في كتيرين – كانوا ما بنوموا الليل.

• لكن زي زوران دا ما شفت.

• الزول دا يومه كله (كورة).

• سافرت مع الهلال الى يوغندا وشفت ذلك بنفسي.

• زوران مشغول بس بالهلال.

• قاعد يذاكر.

• ويحاضر.

• ويدرب.

• يلعب الليلة ..بعد المباراة طوالي يمرن اللاعبين الذين لم يشاركوا في المباراة او شاركوا في وقت قصير من عمر المباراة.

• النهار شغال محاضرات.

• الصباح بيجمّع في المعلومات.

• زوران ما عندو (ثانية) بعيدة عن الهلال.

• وقته كله للهلال.

• وجهاز فني شغال على افضل نسق.

• عدنان ..اختصاصي تفاصيل صغيرة.

• مهدي مرزوق …تدريباته سوف تجعل قوة الهلال البدنية في حتة تانية.

• السباعي …بعجن في حراس المرمى عجن.

• د. احمد العابد هو الكنز الحقيقي في الهلال.

• بشه (عالم) في مجاله.

• اصلو ما في حاجة ناقصة.

• مع ذلك في ناس لا يروا كل هذه الاشياء ..وبنقادوا وراء انطباعات وهلاويس فنية.

• انتوا فاكرين الجوانب الفنية ما فيها (هلاويس).

• والله في ناس هلسوا بينا.

• الليلة ح يدوروا في نفس الشريط.

• وين بوجبا.

• ولماذا لم يشارك؟

• اذا شارك بوجبا اليوم ..ح يقولوا المدرب مفروض يثبت التشكيلة وين الشغيل؟

• شاركت كل هذه الاسماء ح يسألوا من صلاح عادل.

• شارك صلاح عادل وين مجاهد فاروق؟

• يشارك مجاهد فاروق ح يقعدوا يسألوا من ابوعاقلة.

• عاوزين شنو انا ما عارف؟

• وفي اسطوانة كدا بقت مشروخة.

• لماذا لا يشارك جيسي؟

• وكيف يبعد عبدالرؤوف من التشكيلة الاساسية.

• عبدالرؤوف يضيّع ليه فرصة مضمونة – البلد كلها تقوم فيه.

• وين منير ود نوباوي؟

• اذا شارك اليوم ح ينسوا الموضوع دا وح يسألوا من محمد موسى.

• يا جماعة الهلال فيه 30 لاعبا.

• في الـ 30 لاعبا ديل في اتنين بشاركوا اجباري بقوانين الدكتور كمال شداد.

• زوران يعمل ليكم شنو؟

• بالمناسبة انا ما بدافع عن زوران.

• لكن ما عاوز الحاجات تفسد بهذه الطريقة.

• أي مدرب زوران او غيره خلوه يطبق فكرو ويلعب بالاسلوب والطريقة المريحة لها.

• ما في مدرب (محترم) بيلعب بفكر زول تاني.

• الزول دا خلوه يعمل الحاجة البتريحو.

• ما في زول اقرب منه من اللاعبين.

• يمكن يكون في ناس علماء.

• وفي ناس خبراء.

• لكن زوران يبقى هو الاقرب للاعبين.

• بمرنهم.

• وقاعد معاهم اليوم كله.

• عارف متين يشرك سليم.

• ومتين يطلع الشغيل.

• ومتين يجيب موفق.

• ومتين يشيل بشه.

• دي حاجات حقتو براهو.

• ما تدخلوا فيها.

• وما تفسدوا لينا الهلال بالتنظيرات.

• اسوأ حاجة في الدنيا دي (التنظير).

• نحن في السودان عندنا (التنظير) عكس الشيء (العملي).

• وعندنا الفي البر عوام.

• وطيار.

• وبعمل أي حاجة.

• وعارف كل شيء.

• عليكم الله خلوا المدرب يشتغل.

• وما تعملوا لينا حركات الكاردينال دا تاني.

• الكاردينال دخل ليه اسلوب في الهلال – الجمهور بقى مدرب.

• والمشجع عاوز يشيل المدرب من المباراة التانية.

• والاعلامي عامل فيها اخطر زول.

• ودا مفروض.

• ودا ما مفروض.

• ……….

متاريس

• نحن في الطريق الى هلال جديد.

• هلال حديث.

• هلال بيلعب كورة.

• ح تستمتعوا كثيرا بهذا الهلال.

• الرهان قائم على هذا الهلال.

• وعلى الجهاز الفني.

• واصلو ما في شفقة.

• وما في خوف.

• سوف يفعل الهلال الكثير في هذا الموسم.

• بس اصبروا.

• وما تبقوا كلكم (مدربين).

• لوائح الكرة بتحدد زول واحد يقيف في المنطقة الفنية.

• وانتوا كلكم عاوزين تقيفوا في المنطقة الفنية.

• عاوزين تعملوا شنو ما عارف؟

• في ناس (ريحة السمك) في الفول بفتشوها.

• ……..

• ترس اخير : الليلة الفرح بالكوم.