بوغبا افضل من يطبق (عندك خت ما عندك شيل) في الملعب
صابنها
محمد عبدالماجد
بوغبا افضل من يطبق (عندك خت ما عندك شيل) في الملعب
في مباراة الهلال والامل الودية – أي كورة استملها والي الدين خضر (بوغبا) وطلعت منه الجمهور على قلته صفق ليه.
أنا افتكرت (وردي) شغال حفلة في الجانب الاخر.
قعدت اتلفت متل (كراسي النص).
لعب بوغبا الشوط الثاني امام الامل عطبرة استلم في هذا الشوط اكثر من 23 كورة ، صفقوا ليه (23) مرة.
ولا كورة طلعت منو غلط.
الاجمل من هذا الكورة بتطلع منه بشكل جميل وإبداعي.
في احصائية مشاركة بوغبا امام فايبرز اليوغندي رصدت الاحصائية الدرجة الكاملة لبوغبا في الاستلام والتسليم.
ما في كورة طلعت منه غلط.
الجميل ان بوغبا بطلعها في المكان الصاح.
بنقلها في الحتة التى يفترض ان تذهب ليها الكورة.
بوغبا عندو (مضرب) نموذجي …الكورة بتطلع منو بميزان الموية.
ما شاءالله.
الواضح ان بوغبا افضل لاعب يمكن يستلم ويسلم …عنده (كنترول) نموذجي في الاستلام وفي التمرير.
عنده قدرة في السيطرة على الكرة حتى بعد ان تخرج منه.
هو لاعب عنده قدرة على السيطرة على الكورة وهي بعيدة منه …يعني عنده خاصية (الريموت كنترول).
قولوا ما شاء الله يا جماعة.
انتوا ما تضيقوا – اصبروا بنحكي ليكم أي حاجة.
وبالتفاصيل الدقيقة.
لاعب بهذه الكيفية غير موجود في الملاعب الآن.
هناك اكثر من لاعب في الملاعب السودانية يتميزون بخصائص خاصة لا توجد عند غيرهم.
بوغبا بتميز في عملية الاستلام تحت الضغط والتسليم تحت الضغط ايضا.
وكل هذه الاشياء تتم بصورة (جميلة) – يراعى بوغبا في ذلك اللمسة الابداعية.
هذه الخاصية التى يتميز بها والي الدين خضر يمكن الاستفادة منها بصورة مثلي ..ويمكن تطويرها اكثر ، لأن قدرات الوالي في هذا الجانب (خيالية).
ممكن بوغبا يحلك من أي (زحمة) بنقل الكورة في الحتة الفاضية ..ويمكن كذلك (ملكاته) في تطويع الكورة الاستفادة منها في التصويب على المرمى وفي المخالفات الثابتة.
بوغبا عنده قدرة في التصويب والتمرير بدقة عجيبة.
لم اشاهد لاعب في السنوات الاخيرة بهذه المميزات التى يجمع فيها بوغبا بين دقة التصويب وقوته.
عادة عندما تكون الكرة قوية تفقد دقتها.
وعندما تكون الكرة دقيقة ..تفقد قوتها.
بوغبا ما عندو كلام زي دا.
الدقة مع القوة.
في انجلترا قالوا بطلقوا على بوغبا لاعب مانشيستر يونتايد لقب (والي الدين خضر).
وبوغبا ما بصدق بهذا اللقب.
الفرحة بتكتلو.
لمن يقولوا ليه والي الدين خضر ما بصدق روحو.
والي الدين خضر ظهر في الملاعب وهو صغير وكان يمكن ان يكون في حتىة ثانية لولا الاصابات التى تعرض لها اللاعب.
الآن يمكن الاستفادة من بوغبا بشكل كبير – شريطة ان يعرف اللاعب المحافظة على نفسه من الاصابات.
التغذية الجيدة والراحة التامة والتمارين القوية يمكن ان تحمي اللاعب من الاصابة.
الهلال الآن فيه جهاز فني وجهاز طبي قادر بإذن الله ان يشكل الحماية الكافية للاعبي الهلال من الاصابات.
والهلال فيه عدد كبير من اللاعبين مما يجعل (الارهاق) بعيدا عنه ..لأن كل مباراة ممكن المشاركة فيها بعناصر محددة.
كشف الهلال الحالي سوف يجنب كل عناصره عامل الارهاق.
رغم ان الاصابات في احيان كثيرة تكون (قدر) ربنا يحفظ جميع اللاعبين – لكن مع ذلك على اللاعب ان يحافظ على نفسه وان يلعب بقوة وغيرة ، لأن اللعب باسترخاء واستهتار يمكن ان يعرض اللاعب للإصابة.
اعود الى بوغبا واقول ان اللاعب فيما يبدو طبق احدى شعارات الثورة (عندك خت ما عندك شيل) في المستطيل الاخضر.
التطبيق الكروي لـ (عندك خت ما عندك شيل) لو عاوزين تشوفه …تعالوا شوفوه عند والي الدين خضر.
بوغبا.
يستلم بي رواقة.
ويسلم بي مزاج.
والفريق الخصم ما بكون فاهم أي شيء.
بكونوا قاعدين يتلفتوا بس.
اللاعب لمن تكون لياقته عالية ..ولمن يكتسب حساسية المباريات ، خاصة التنافسية يمكن ان يعطي بشكل كبير ويمكن ان يكون بعيد عن الاصابات.
معظم الاصابات تنتج بسبب عدم الجاهزية.
ما في لاعب يجافز ويشارك وهو مرهق او غير جاهز.
وما في لاعب يجامل على حساب صحته وسمعته ويلعب وهو مصاب.
الهلال الآن فيه عدد كبير من اللاعبين أي لاعب شاعر بانه غير قادر على المشاركة او العطاء يمكن يعتذر.
من ابوعشرين لغاية الغربال …ما عندنا مشكلة.
أي لاعب عنده بديل لا يقل عنه في شيء.
الاساسي والاحتياطي في الهلال بقى واحد.
أي تشكيلة تلعب ..ما عندنا رأي فيها.
اذا كان الدالي الذي لم يدخلكشف الهلال بهذا المستوى ..كيف سوف يكون حال الذين تم قيدهم في الكشف.
علما ان الدالي وياسر مزمل ابعدتهما الاصابة …وكلاهما سوف يعود لكشوفات الهلال ان شاءالله في مارس القادم.
في مباريات الهلال الودية وفي تمارينه الاخيرة ، اعجبتنا جاهزية جمال سالم والذي تسبب وجود ابوعشرين في رفع مستواه.
جمال سالم أيضا في هذه الايام يقدم في اعظم المستويات.
ما عندنا لاعب في الهلال ممكن يقعد ساي.
أي لاعب في الهلال عنده دور وعنده يوم.
الحارس ابوجا ..كل من شاهده اشاد به.
الجهاز الفني للهلال معجب بهذا الحارس ويرى فيه (المستقبل) القريب للهلال.
بل يمكن ان يكون ابوجاالآن الحارس الاساسي للهلال.
اصلو ما في لاعب في الهلال مستواه لا يؤهله للمشاركة.
الجميل في توليفة الهلال ان هناك اكثر من 7 عناصر او 8 عناصر ممكن يلعبوا في أي خانة.
بداية من بويا والسمؤال ..ممكن يلعبوا في الاطراف وممكن يلعبوا في قلب الدفاع.
الطيب عبدالرزاق ممكن يلعب في قلب الدفاع وممكن يلعب في الطرف اليمين وممكن يلعب في الارتكاز.
صلاح عادل ومجاهد فاروق ممكن يلعبوا في الوسط بكل خاناته وممكن يلعبوا في الدفاع.
بشه وموفق وعبدالرؤوف ممكن يلعبوا في الوسط وممكن يلعبوا في الهجوم.
وعلى ذلك قس.
اصلو ما في مشكلة في الهلال.
أي لاعب في الهلال بيلعب.
واي لاعب في الهلال ممكن يلعب في أي خانة.
يا جماعة كديابا قالوا هداف.
تاني اكتر من كدا شنو؟
اعمل ليكم شنو؟
اقول ايه؟
الله يحفظ الهلال.
والله يبعد الاصابات والعوارض من الهلال.
وفي حماك ربنا.
ما عندنا مشكلة.
………..
متاريس
سوداكال قاعد.
الزول دا غلب ناس المريخ عديل كدا.
ان شالوه ما بنشال …وان قلعوه ما بتقلع.
يقعد بس.
لا اتحاد ولا جمعية عمومية ولا فيفا ولا لجنة الانتخابات قدرت عليه.
سوداكال على ما يبدو فاهم القانون وعندو مستشارين على وزن.
احسن حاجة الدوري الممتاز هذا الموسم مجموعة واحدة.
دوري المجموعتين ظالم.
المرحلة الاولى من الدوري كانت بتكون بدون قيمة وبدون منافسة.
فريق ما يكسب مباراة في المرحلة الاولى ممكن يقعد في الدوري.
وفريق يفقد نقاط كتيرة في المرحلة الاولى يمكن يشيل الممتاز.
بعدين الدوري يعني تواجه جميع الاندية.
التسجيلات القادمة باقى ليها اقل من 3 اشهر.
والدالي ومويس برجعوا كشوفات الهلال.
ورمضان عجب ومحمد الرشيد.
مفروض في ظروف كورونا الاندية تعمل على رفع الكشف الى 35 لاعب.
او 33 لاعب على الاقل.
هناك صور ونداء ظهر في مواقع التواصل الاجتماعي لحاجة لاعب الهلال السابق النذير محمود لعملية مستعجلة.
نتمنى من جميع الاهلة المساهمة في هذا الامر.
النذير محمود كان لاعب هلالي قلبه حار – لعب بحماس وقوة واعطي الهلال ولم يستبق شيئا.
مجلس الهلال ايضا يجب المساهمة في علاج هذا اللاعب.
نسأل الله العافية والصحة للاعب الهلال السابق النذير محمود.
يجب ان يكون الهلال حاضر في مثل هذه المواقف.
ملعب الهلال في حاجة الى رعاية اضافية في ظل الضغط الذي اصبح يتعرض له الملعب في المباريات والتمارين.
الدولة يفترض ان تراجع الملاعب الاخرى وتعيد تأهيلها.
……….
ترس اخير : واستاد الهلال يرحب بالجميع.
